சென்னை: சைபர் கிரைம் குற்ற வழக்குகளில் கடந்த 5 மாதத்தில் ரூ.10.45 கோடி மீட்கப்பட்டுள்ளதாக காவல்துறை தகவல் தெரிவித்துள்ளது. அதிகரித்து வரும் சைபர் குற்றப் புகார்களைக் கருத்தில் கொண்டு, சென்னை பெருநகர காவல்துறையின் மத்திய குற்றப்பிரிவின் சைபர் குற்றப் பிரிவு, 4 மண்டலங்களின் சைபர் குற்றப் பிரிவு காவல் நிலையங்கள் (Zonal CCPS) மற்றும் 12 மாவட்டங்களின் சைபர் குற்றக் குழுக்கள் (CCT), தேசிய சைபர் குற்றப் புகார் போர்ட்டலில் (NCRP) நிதி சைபர் குற்றங்களை உடனடியாகப் பதிவு செய்தல், மோசடி வங்கிக் கணக்குகளை உடனடியாக முடக்குதல், நீதிமன்ற உத்தரவுகளின் அடிப்படையில் பாதிக்கப்பட்டவர்களுக்கு முடக்கப்பட்ட தொகையை திரும்பப் பெறுதல் மற்றும் சைபர் குற்ற வழக்குகளில் குற்றம் சாட்டப்பட்டவர்களைக் கைது செய்தல் ஆகியவற்றில் தேவையான நடவடிக்கைகளை எடுத்து வருகின்றன.
நிதி சைபர் குற்றங்களின் சமீபத்திய செயல்பாட்டு முறையில் (Modus Operandi) ஆன்லைன் வர்த்தக மோசடி (Online Trading Scam), டிஜிட்டல் கைது மோசடி (Digital Arrest Scam), ஆன்லைன் பகுதி நேர வேலை மோசடி (Online Part time Job Scam), கிரிப்டோகரன்சி மோசடி (Cryptocurrency Scam) மற்றும் வாட்ஸ்அப் ஹேக்கிங் மோசடி (WhatsApp Hacking Scam) ஆகியவை அடங்கும். ஜனவரி 1, 2025 முதல் மே 31, 2025 வரை, சென்னை பெருநகர காவல்துறைக்கு நிதி இழப்பு தொடர்பான சைபர் புகார்கள் மொத்தம் 4,357 புகார்கள் வந்துள்ளன, 2024 ஆம் ஆண்டின் இதே காலகட்டத்தில் இது 3,888 புகார்களாக இருந்தது. ஜனவரி 1, 2025 முதல் மே 31, 2025 வரை பாதிக்கப்பட்டவர்கள் இழந்த தொகையில், கடந்த ஆண்டு இதே காலகட்டத்தில் ஏற்பட்ட ரூ.182 கோடியுடன் ஒப்பிடும்போது, இந்த வருடத்தின் இழப்பு தொகை ரூ.218.45 கோடி ஆகும். ரூ.218.45 கோடியில், மொத்தம் ரூ.48 கோடி முடக்கப்பட்டு, நீதிமன்ற உத்தரவுகளின் அடிப்படையில், ரூ.10.45 கோடி பாதிக்கப்பட்டவர்களின் வங்கிக் கணக்கில் திரும்ப பெறப்பட்டுள்ளது, இது கடந்த ஆண்டு ரூ.6.52 கோடியாக இருந்தது.
நிதி சைபர் குற்றங்களால் பாதிக்கப்பட்டவர்களுக்கு முடக்கப்பட்ட தொகையை திரும்பப் பெறுவது, ஜூலை 2024 இல் வெளியிடப்பட்ட மாண்புமிகு சென்னை உயர்நீதிமன்றத்தின் சுற்றறிக்கையால் எளிதாக்கப்பட்டுள்ளது. நிதி சைபர் குற்றங்களில் முடக்கப்பட்ட தொகையை திரும்பப் பெறுவதற்கு NCRP பதிவு போதுமானது என்றும், இந்த உத்தரவை சென்னை பெருநகர காவல்துறையின் சைபர் குற்றக் காவல் நிலையங்கள் முழுமையாகப் பின்பற்றி வருகின்றன, இதன் மூலம் நிதி சைபர் குற்றங்களால் பாதிக்கப்பட்டவர்களுக்கு முடக்கப்பட்ட தொகை திரும்பப் பெறப்படுவதை உறுதி செய்கிறது. இருப்பினும், பாதிக்கப்பட்டவர்கள் Golden hour என்று சொல்லக்கூடிய சைபர் குற்றம் நடந்து உடனடியாகவும் மிக விரைவாகவும் நிதி இழப்பு தொடர்பான சைபர் குற்றங்களைப் புகாரளிக்கும் போது மட்டுமே இது பயனுள்ளதாக இருக்கும்.
ஜனவரி 1, 2025 முதல் மே 31, 2025 வரையிலான காலகட்டத்தில், சென்னை பெருநகர காவல்துறை சைபர் கிரைம் குழுக்களால் மொத்தம் 59 குற்றவாளிகள் கைது செய்யப்பட்டனர். அவர்களில் 42 பேர் தமிழ்நாட்டைச் சேர்ந்தவர்கள் மற்றும் 17 பேர் பிற மாநிலங்களைச் சேர்ந்தவர்கள். பொதுமக்கள் சைபர் குற்றங்களால் பாதிக்கப்படுவதைத் தடுக்க, பொதுமக்களிடையே விழிப்புணர்வை ஏற்படுத்துவதற்காக சென்னை பெருநகர காவல்துறை பல்வேறு முயற்சிகளை மேற்கொண்டுள்ளது. சென்னையில் உள்ள ஐ.டி. நிறுவனங்கள், பள்ளிகள், கல்லூரிகளில் விழிப்புணர்வு நிகழ்ச்சிகள் நடத்தப்பட்டன, சைபர் குற்ற விழிப்புணர்வு பேரணி, வணிக வளாகங்களில் விழிப்புணர்வு நிகழ்ச்சிகள், மூத்த குடிமக்களுக்கான விழிப்புணர்வு நிகழ்ச்சிகளும் நடத்தப்பட்டன. இதுவரை 50,000க்கும் மேற்பட்டோர் இந்த விழிப்புணர்வு நிகழ்ச்சிகளில் பங்கேற்றுள்ளனர்.
டிஜிட்டல் கைது மோசடி குறித்து நடிகர் திரு. யோகி பாபு, அவர்களின் குறும்படம் <https://www.instagram.com/reel/DA00nJTSMQc/?igsh-MWFocDZ6am> 10aHJ6dQ==) மற்றும் ஆன்லைன் வர்த்தக மோசடி குறித்து நடிகர் திரு.அசோக் செல்வன் அவர்களின் குறும்படம் (<https://www.instagram.com/reel/DIoNZIES6kc/?igsh-eWFwcW0zMX>NxOG04) சமூக ஊடக தளங்களில் சென்னை பெருநகர காவல்துறையால் வெளியிடப்பட்டது.
சென்னை காவல்துறை ஆணையாளர் ஆ.அருண், கூரியர் ஊழியர்கள் மற்றும் சட்ட அமலாக்க அதிகாரிகள் என்று கூறி தெரியாத எண்களிலிருந்து வரும் அழைப்புகள், வாட்ஸ்அப் குழுக்களில் முதலீட்டு குறிப்புகள் பகிரப்படுவது, போலி முதலீட்டு செயலிகள் மற்றும் வலைத்தளங்கள், வாட்ஸ்அப் கணக்குகளை ஹேக்கர்கள் மூலம் அணுக முயற்சிப்பது மற்றும் போலி ஆன்லைன் பகுதி நேர வேலை மோசடி செய்பவர்கள் குறித்து பொதுமக்கள் விழிப்புணர்வுடன் இருக்குமாறு அறிவுறுத்தியுள்ளார். எந்தவொரு சைபர் குற்றம் குறித்தும் அருகிலுள்ள சைபர் குற்ற காவல் நிலையத்தில் உடனடியாகப் புகாரளிக்கவும், நிதி இழப்பு ஏற்பட்டால், உடனடியாக 1930 என்ற எண்ணை அழைக்கவும் அல்லது www.cybercrime.gov.in என்ற முகவரியில் புகார் அளிக்கவும் காவல் ஆணையாளர் பொதுமக்களை கேட்டுக்கொண்டுள்ளார்.
