புதுடெல்லி: மோடி சரண் அடைந்து விட்டார் என்று விமர்சனம் செய்ததன் மூலம் ராகுல்காந்தி ஆயுதப்படைகளை அவமதித்து விட்டதாக பா.ஜ கண்டனம் தெரிவித்துள்ளது.
மக்களவை எதிர்க்கட்சி தலைவர் ராகுல்காந்தி பேசும்போது,’ டிரம்ப்பிடமிருந்து ஒரு அழைப்பு வந்தது, நரேந்திர ஜி உடனடியாக சரணடைந்தார். வரலாறு ஒரு சாட்சி, இது பாஜ-ஆர்எஸ்எஸ்ஸின் தன்மை. அவர்கள் எப்போதும் தலைவணங்குகிறார்கள்’ என்று கூறியிருந்தார். இதற்கு பதிலடியாக பா.ஜ செய்தித்தொடர்பாளர் சுதான்ஷூ திரிவேதி கூறுகையில்,’ பிரதமர் மோடி சரண் அடைந்து விட்டார் என்று ராகுல் காந்தி கூறியதன் மூலம் ஆயுதப்படைகளை அவமதித்து விட்டார். இது ஆபரேஷன் சிந்தூரின் வெற்றியைக் குறைமதிப்பிற்கு உட்படுத்துவதற்கும், பாகிஸ்தானுக்கு ஆதரவான குற்றச்சாட்டை முன்வைப்பதற்கும் சமம். ராகுல்காந்தியின் இந்த விமர்சனங்கள் நோய்வாய்ப்பட்ட மற்றும் ஆபத்தான மனநிலையை பிரதிபலிக்கின்றன. பாகிஸ்தானின் ராணுவத் தலைவர், பிரதமர் மற்றும் அங்குள்ள பயங்கரவாதிகள் பாக்கிற்கு ஆதரவாகப் பேசுவதை விட ராகுல்காந்தி விஞ்சிவிட்டார்.
இந்தியாவின் பிரிவினையிலிருந்து சீனா மற்றும் பாகிஸ்தான் இந்தியப் பகுதிகளை ஆக்கிரமித்ததிலிருந்து வரலாறு நேரு-காந்தி குடும்பத்தின் சரணடைதல்களால் நிறைந்துள்ளது. ஆனால் பிரதமர் மோடியை இந்தியத் தாயின் சிங்கம் என்று வரலாறு பாராட்டும். ராகுல் காந்தி மற்றும் காங்கிரஸ் கட்சி சரணடைந்த வரலாற்றைக் கொண்டிருக்கலாம், ஆனால் பாரதம் யாருக்கும் முன்பாக ஒருபோதும் சரணடையாது. இரு தரப்பிலிருந்தும் ராணுவ நடவடிக்கைகளை நிறுத்த இந்தியாவிற்கும் பாகிஸ்தானுக்கும் இடையில் மத்தியஸ்தம் செய்வதாக டிரம்ப் கூறியதை இந்திய அரசாங்கம் ஏற்கனவே நிராகரித்துவிட்டது. இவ்வாறு அவர் கூறினார்.
