Saturday, March 2, 2024
Home » கூரியர் மூலம் புலித்தோல், போதை பொருட்கள் பார்சல் வந்து இருப்பதாக கூறி தொழிலதிபர்கள், பெண்களிடம் பணம் பறிக்கும் வெளிநாட்டு கும்பல்

கூரியர் மூலம் புலித்தோல், போதை பொருட்கள் பார்சல் வந்து இருப்பதாக கூறி தொழிலதிபர்கள், பெண்களிடம் பணம் பறிக்கும் வெளிநாட்டு கும்பல்

by Karthik Yash

* அடையாளம் தெரியாத செல்போன் அழைப்புகளில் பேசும் போது கவனமாக இருக்க வேண்டும்
* பொதுமக்களுக்கு போலீஸ் கமிஷனர் சந்தீப் ராய் ரத்தோர் வேண்டுகோள்

சென்னை: பிரபல கூரியர் நிறுவனங்கள் மூலம் புலித்தோல், போதை பொருட்கள், வெளிநாட்டு கரன்சிகள் பார்சல் வந்து இருப்பதாக தொழிலதிபர்கள் மற்றும் பெண்களை குறிவைத்து மிரட்டி பணம் பறிக்கும் வெளிநாட்டு மோசடி கும்பலிடம் இருந்து கவனமாக இருக்க வேண்டும் என்று சென்னை மாநகர போலீஸ் கமிஷனர் சந்தீப் ராய் ரத்தோர் பொதுமக்களுக்கு எச்சரிக்கை விடுத்துள்ளார். மேலும், அடையாளம் தெரியாத எண்களில் இருந்து வரும் அழைப்புகளில் பேசும் போது மிகவும் கவனமாக இருக்க வேண்டும் என்றும் வேண்டுகோள் விடுத்துள்ளார்.தமிழ்நாட்டில் கடந்த சில மாதங்களாக வசதியான நபர்கள் மற்றும் பெண்களை குறிவைத்து மோசடி நபர்கள் சிலர், செல்போனில் தொடர்பு கொண்டு உங்கள் பெயரில் பார்சல் வந்துள்ளது.

அந்த பார்சலில் போதை பொருட்கள் மற்றும் வெளிநாட்டு பணம் இருப்பதாகவும், இதனால் உங்களிடம் விசாரணை நடத்த வேண்டும் என்று மிரட்டி பல லட்சம் ரூபாய் அவர்களின் வங்கி கணக்கிற்கு பணத்தை மாற்றி மோசடி செய்யும் சம்பவம் தற்போது அதிகரித்துள்ளது. இது குறித்து சென்னை மத்தியக் குற்றப்பிரிவு போலீசில் புகார்கள் வந்த வண்ணம் உள்ளன. இதனால் இதுபோன்ற குற்றங்கள் மீது கடும் நடவடிக்கை எடுக்க கூடுதல் கமிஷனர் செந்தில்குமாரிக்கு கமிஷனர் சந்தீப் ராய் ரத்தோர் உத்தரவிட்டுள்ளார். மேலும், மோசடி நபர்களிடம் இருந்து பொதுமக்கள் ஏமாறாமல் கவனமாக இருக்க வேண்டும் என்று சென்னை மாநகர போலீஸ் கமிஷனர் சந்தீப் ராய் ரத்தோர் அறிக்கை மூலம் வேண்டுகோள் விடுத்துள்ளார்.

அதன் விவரம் வருமாறு: இந்தியா முழுவதும் கடந்த சில மாதங்களாக வயதான தம்பதிகள், தொழிலதிபர்கள் மற்றும் பெண்களை குறிவைத்து அடையாளம் தெரியாத தொலைபேசி எண்களில் இருந்து ‘பெட்டெக்ஸ்’ மற்றும் புளூடார்ட் கூரியர் நிறுவனங்களில் இருந்து பேசுவது போல், உங்களுடைய பெயரை சரியாக குறிப்பட்டு, உங்களுடைய ஆதார் எண்ணை பயன்படுத்தி இந்தியாவில் இருந்து வெளிநாட்டிற்கு புலித்தோல், போதை பொருட்கள், வெளிநாட்டு கரன்சிகள், போலி பாஸ்போர்ட்கள் மற்றும் சில கடத்தல் பொருட்கள் கொண்ட பார்சல்கள் வந்துள்ளது என்றும், இதுதொடர்பாக மும்பை சைபர் க்ரைம் மற்றும் சிபிஐ, குற்ற பிரிவு போலீசார் உங்களிடம் விசாரணை செய்ய வேண்டியுள்ளது என்று கூறி, அழைப்பு மற்றொரு நபருக்கு பார்வேர்டு செய்வார்கள்.

அதில் பேசும் நபர்கள்,‘நாங்கள் சைபர் க்ரைம் போலீசார் பேசுகிறோம்’ என்று கூறி நமது செல்போனில் ‘ஸ்கைப்’ ஆப் பதிவிறக்கம் செய்ய வைத்து, அதன் பிறகு மோசடி நபர்கள் ஸ்பைக் ஆப் மூலம் வீடியோ காலில் தொடர்பு கொண்டு, உங்களுடைய ஆதார் எண்ணை பயன்படுத்தி சட்டவிரோதமாக பல்கோடி ரூபாய்க்கு பணப்பரிமாற்றம் நடைபெற்று இருப்பதாகவும், மேலும், பல வங்கிகளில் கணக்கு துவங்கி முறையற்ற பணப்பரிமாற்றம் நடை பெற்று உள்ளதாக கூறி, உங்களுடைய வங்கி சேமிப்பு கணக்கு போன்றவை ஆய்வு செய்ய வேண்டும். எனவே உடனடியாக உங்கள் ஆர்.பி.ஐ வங்கி கணக்கிற்கு பணத்தை உடனடியாக அனுப்பும்படி கூறுவார்கள்.

அவர்கள் பேசும் போது தொலைபேசி அழைப்பை கட் செய்தாலோ அல்லது அவர்கள் பேசுவதை பற்றி மற்ற நபர்களிடம் தெரிவித்தாலோ உங்களை உடனடியாக கைது செய்துவிடுவோம். கைது நடவடிக்கை எடுக்க வேண்டாம் என்றால், அவர்கள் சொல்லுவது போல் பணத்தை அனுப்பும் படியும் அந்த பணத்தை ஆய்வு செய்த பின்னர் மீண்டும் உங்கள் வங்கி கணக்கிற்கு மாற்றப்படும் என்று கூறுவார்கள்.நாம் நம்புவதற்காக ஏற்கனவே போலியாக தயார் செய்து பத்திரிகை செய்திகள், வலைத்தளங்கள், புகைப்படங்களை ‘ஸ்கைப்’ ஆப் மூலம் நமக்கு அவர்கள் அனுப்பி வைப்பார்கள். அதை உண்மை என்று நம்பி பலர் தங்களுடைய வங்கி கணக்களில் இருந்து சேமிப்பு பணம் மற்றும் வைப்பு தொகை பணத்தை, அவர்கள் அனுப்பும் வங்கி கணக்கிற்கு அனுப்பி வைத்து பின்னர், நாம் ஏமாற்றப்படுகிறோம்.

எனவே நம்முடைய தனிப்பட்ட மற்றும் வங்கி விவரங்களை வைத்து நமக்கு தெரியாமல் நம்முடைய பெயரில் வங்கிகளில் தனி நபர் கடன் பெற்று அதன் மூலமாகவும் ஏமாற்றுகிறார்கள். பணத்தை பெற்ற உடன் மோசடி நபர்கள், நமக்கு ‘ஸ்கைப்’ அப்பில் அனுப்பிய அனைத்து மெசெஜ்கள் மற்றும் தடயங்களை அழித்துவிடுகிறார்கள். இத்தகைய குற்ற செயல்களில் ஈடுபடுபவர்கள் தங்களை போலீஸ் கண்டுபிடித்துவிடக்கூடாது என்பதற்காக அடையாளம் தெரியாத நபர்களின் பெயரில் வங்கி கணக்கு மற்றும் தொலைபேசி எண்களை பயன்படுத்தி பொதுமக்களை ஏமாற்றி வருவதும், இத்தகைய குற்ற செயல்களை வெளிநாடுகளில் இருந்து கொண்டு பொதுமக்களை ஏமாற்றி வருவதால், அவர்களை அடையாளம் கண்டு கைது செய்வதில் சிரமம் ஏற்பட்டுள்ளது.

எனவே பொதுமக்கள் அடையாளம் தெரியாத தொலைபேசி எண்களில் இருந்து தொடர்பு கொள்ளும் நபர்களிடம் பேசும் போது கவனமாக இருக்க வேண்டும். முன் பின் தெரியாத நபர்களிடம் நம்முடைய தனிப்பட்ட வங்கி சார்ந்த மற்றும் பிற விவரங்களை தெரிவிக்க கூடாது. அடையாளம் தெரியாத வங்கி கணக்குகளுக்கு பணத்தை அனுப்பி ஏமாற வேண்டாம். இதுபோன்ற ஏதேனும் பணம் இழப்பு ஏற்பட்டால் பொதுமக்கள் உடனடியாக சைபர் க்ரைம் உதவி எண் ‘1930’ மற்றும் வலைத்தள முகவரி https://cybercrime.gov.in ல் புகார் தெரிவிக்க வேண்டும்.இவ்வாறு அந்த அறிக்கையில் கூறப்பட்டுள்ளது. பொதுமக்கள் அடையாளம் தெரியாத தொலைபேசி எண்களில் இருந்து தொடர்பு கொள்ளும் நபர்களிடம் பேசும் போது கவனமாக இருக்க வேண்டும். முன் பின் தெரியாத நபர்களிடம் நம்முடைய தனிப்பட்ட வங்கி சார்ந்த மற்றும் பிற விபரங்களை தெரிவிக்க கூடாது.

You may also like

Leave a Comment

seven + 20 =

Dinakaran is a Tamil daily newspaper distributed in India. As of March 2010, Dinakaran is the largest Tamil daily newspaper in terms of net paid circulation, which was 1,235,220. In terms of total readership, which was 11.05 Lakhs as of May 2017, it is the second largest. Dinakaran is published from 12 centers in India namely Delhi, Mumbai, Chennai, Bengaluru, Madurai, Coimbatore, Trichy, Salem, Nagercoil, Vellore, Nellai and Pondicherry.

Address

@2023 – Designed and Developed by Sortd.Mobi