சென்னை: நெருக்கடி நிலையை அமல்படுத்தி தினமும் பொய்யை சொன்ன காங்கிரசார், பாஜவை பற்றி பேச எந்த அருகதையும் இல்லை என்று எச்.ராஜா கூறியுள்ளார். பிரதமர் நரேந்திர மோடியின் 74வது பிறந்த தினத்தை முன்னிட்டு பாஜ சார்பில் திருவல்லிக்கேணி ஐஸ்ஹவுஸ் பகுதியில் ‘மோடி நாட்டுக்கு பாதுகாப்பு; தலைக்கவசம் உயிருக்கு பாதுகாப்பு’ என்ற வாசகத்துடன் வாகன ஓட்டிகளுக்கு இலவசமாக ஹெல்மெட் வழங்கும் விழிப்புணர்வு நிகழ்ச்சி நேற்று நடந்தது.

விழாவிற்கு பாஜ மாநில செயலாளர் எஸ்.சதீஷ்குமார் தலைமை வகித்தார். இதில் சிறப்பு விருந்தினராக பாஜ ஒருங்கிணைப்பு குழு தலைவர் எச்.ராஜா பங்கேற்று 574 வாகன ஓட்டிகளுக்கு இலவச ஹெல்மெட்டுகளை வழங்கினார். தொடர்ந்து எச்.ராஜா அளித்த பேட்டி: திருப்பதி லட்டு பிரசாதத்தில் பன்றிக் கொழுப்பும், மாட்டுக் கொழுப்பும் கலக்கப்பட்டதுதான் தற்போதைய அதிர்ச்சித் தகவலாக உள்ளது. ராகுல்காந்தியை நான் தேசவிரோதி என்று விமர்சித்ததாக கூறுகிறார்கள். ஆனால் ஒட்டுமொத்த நாடு முழுவதும் அவரது இந்திய விரோத நடவடிக்கை விவாதப் பொருளாகி இருக்கிறது.

மத்திய அமைச்சர் நிர்மலா சீதாராமன் பொய்யான தகவல்களை வெளியிட்டதாக கூறும் காங்கிரசார், நெருக்கடி நிலையை அமல்படுத்தி தினமும் பொய்யைச் சொன்னவர்கள், பொய்யாகவே பிறந்தவர்கள், நிர்மலா சீதாராமன் மீது குற்றச்சாட்டு சொல்வதற்கு எந்த அருகதையும் இல்லாதவர்கள். இவ்வாறு அவர் கூறினார். இந்நிகழ்ச்சியில் மாவட்ட தலைவர் விஜய் ஆனந்த், மீனவர் அணி செயலாளர்கள் சவுந்தர், பிரேம் உள்ளிட்டோர் கலந்து கொண்டனர்.

சென்னை: தமிழகத்தில் உள்ள டாஸ்மாக் கடைகளில் மதுபாட்டிலுக்கு பில் வழங்கும் நடைமுறை விரைவில் செயல்படுத்தப்படவுள்ளது. இதற்காக 2 இடங்களில் இன்று முதல் சோதனை ஓட்டம் நடத்தப்படும் என டாஸ்மாக் அதிகாரிகள் தெரிவித்தனர். தமிழகத்தில் தற்போது 4,829 டாஸ்மாக் கடைகள் மூலம் மதுபானம் விற்பனை செய்யப்படுகிறது. தரமான மதுபாட்டில்களை, நியாயமான விலைக்கு விற்பனை செய்ய டாஸ்மாக் கடைகளை நவீனமயமாக்கும் முயற்சிகளை டாஸ்மாக் நிர்வாகம் எடுத்து வருகிறது.

குறிப்பாக டாஸ்மாக் கடைகளில் விற்பனை செய்யப்படும் மது பாட்டில்களுக்கு ரசீது வழங்குதல், மதுபாட்டில்களில் பார்கோட் அச்சிட்டு அதன் மூலம் தொடர்ச்சியாக கண்காணிப்பது உள்ளிட்ட நடவடிக்கைகளை நிர்வாகம் மேற்கொண்டது. இதற்காக மென்பொருள் தயாரிக்க ஒன்றிய அரசின் பொதுத்துறை நிறுவனமான ரயில்டெல் நிறுவனத்துக்கு ரூ.294 கோடி மதிப்பிலான பணி ஆணை வழங்கப்பட்டுள்ளது.  இந்நிலையில் டாஸ்மாக் கணினிமயமாக்கும் பணிகள் நிறைவு பெற்றுள்ளதாகவும், 2 கடைகளில் சோதனை ஓட்டம் நடத்தப்படும் என்றும் டாஸ்மாக் அதிகாரிகள் தெரிவித்தனர். இது குறித்து டாஸ்மாக் அதிகாரிகள் கூறியதாவது:

டாஸ்மாக் கடைகளின் செயல்பாடுகளை கணினிமயமாக்கும் நடவடிக்கையின் ஒரு பகுதியாக இந்த பில்லிங் முறை செயல்படுத்தப்படவுள்ளது. புதிய அமைப்பு முதலில் நகரம் மற்றும் மாவட்டங்களில் உள்ள தேர்ந்தெடுக்கப்பட்ட கடைகளில் தொடங்கப்படும். இது குறைபாடுகளைக் கண்டறிய உதவும். அனைத்து சிக்கல்களும் தீர்க்கப்பட்டவுடன், விரைவில் அனைத்து கடைகளிலும் செயல்படுத்தப்படும்.

டாஸ்மாக் கடைகளில் உள்ள விற்பனையாளர்கள் கையடக்க ஸ்கேனர் மூலம் ஒவ்வொரு பாட்டிலிலும் உள்ள கலால் வரியுடன் கூடிய லேபிள்களை ஸ்கேன் செய்ய வேண்டும், அதில் ரசீதுகள் வரும். ஸ்கேன் செய்யாமல் பாட்டிலை விற்றால், சரக்குகளை தணிக்கை செய்யும் போது முரண்பாடுகள் தெரியவரும். தற்போது பில் நடைமுறை இல்லாத சூழலில், புதிய திட்டத்தின் படி வரவு, செலவு கணக்குகள் சரியான முறையில் பராமரிக்க உதவி செய்யும்.

மதுபாட்டில்களை ஸ்கேன் செய்தால், அந்த பாட்டில் எங்கே வாங்கப்பட்டது, எந்த தேதியில் வாங்கப்பட்டது, இது எந்த பேட்ச்சை சேர்ந்தது, மதுபான ஆலையில் இருந்து எப்போது வெளியே கொண்டு வரப்பட்டது போன்ற பல்வேறு விவரங்களை தெரிந்து கொள்ள முடியும். இதற்காக டாஸ்மாக கடைகளுக்கு முன்பு வரிசையில் நின்று மது வாங்க கட்டைகள் மூலம் தடுப்பு அமைக்கப்பட்டுள்ளது. இவ்வாறு அவர்கள் கூறினர்.

சென்னை: தமிழக அரசு ஆதரவுடன் சென்னையில் அறிவியல் கண்காட்சி 24ம் தேதி முதல் 26ம் தேதி வரை நடைபெறுகிறது. இதுகுறித்து சென்னையில் உள்ள அறிவியல் நகரம் முதன்மை செயலர் நேற்று வெளியிட்டுள்ள அறிக்கை: சென்னை அறிவியல் விழாவில் பிரமாண்டமான அறிவியல் கண்காட்சி அரங்குகள் மற்றும் அறிவியல் செய்முறை விளக்கங்கள், அறிவியல் லேசர் ஒளி, ஒலி காட்சி ஆகியன இடம் பெறுகின்றன.

சென்னை அறிவியல் விழாவை வருகிற 24ம் தேதி பகல் 1.30 மணி அளவில் உயர் கல்வித்துறை அமைச்சர் பொன்முடி துவக்கி வைக்கிறார். விழா 26ம் தேதி வரை பெரியார் அறிவியல் மற்றும் தொழில்நுட்ப மைய (பிர்லா கோளரங்கம்) வளாகத்தில் காலை 10 மணி முதல் மாலை 5 மணி வரை பார்வையாளர்களுக்காக நடைபெறும். இவ்வாறு அதில் கூறப்பட்டுள்ளது.

* கல்லூரியில் படிக்கும் போதே விலைமாதர்களுடன் பழக்கம், ஊதியத்தில் 60 சதவீதத்தை பெண்களுக்கே வாரி இறைத்தார்

சென்னை: பாலியலுக்கு அழைத்து வந்த இளம்பெண்ணை கொலை செய்த வழக்கில் கைது செய்யப்பட்ட சைக்கோ இன்ஜினியர் மணிகண்டனுக்கு கல்லூரியில் படிக்கும் போதே விலை மாதர்களுடன் பழக்கம் இருந்ததும், சென்னைக்கு வந்த பிறகு, அதன் தாக்கம் தீவிரமானதாகவும் போலீசார் நடத்திய விசாரணையின் மூலம் தெரியவந்துள்ளது. சென்னை துரைப்பாக்கம் குமரன் குடில் நகர் மெயின் ரோட்டில் உயர் காவல் துறை அதிகாரி ஒருவர் புதிதாக கட்டி வரும் கட்டிடத்தின் அருகே நேற்று முன்தினம் இளம்பெண் ஒருவர் கொடூரமாக கொலை செய்யப்பட்டு சூட்கேசில் உடலை அடைத்து வீசப்பட்டிருந்தது.

தகவல் அறிந்து துரைப்பாக்கம் போலீஸ் இன்ஸ்பெக்டர் பிரபு உடனே சம்பவ இடத்திற்கு சென்று சூட்கேசில் சடலமாக கிடந்த பெண்ணை மீட்டு பிரேத பரிசோதனைக்காக அனுப்பி வைத்தார். பிறகு கொலையான பெண்ணின் அடையாளங்களை வைத்து அவர் யார், எந்த ஊரை சேர்ந்தவர் என விசாரணை நடத்தினர். அதேநேரம் பெண்ணை கொலை செய்து சூட்கேசில் வீசிய நபர் யார் என்பது குறித்தும் விசாரித்தனர். இன்ஸ்பெக்டர் பிரபு ஏற்கனவே விபசார தடுப்பு பிரிவில் சிறிது காலம் பணியாற்றி வந்தார்.

இதனால் சூட்கேசில் சடலமாக கிடந்த பெண்ணின் அடையாளங்களை வைத்து, பலமுறை பாலியல் புரோக்கர்களை கைது செய்யும் போது, அவர்களிடம் இருந்து மீட்கப்பட்ட பெண் போல் இருப்பதாக சந்தேகமடைந்து, தனது பாணியில் விசாரணையை அவர் நடத்தினார். அதில் தான், பாலியல் புரோக்கர்கள் கொடுத்த தகவலின்படி மாதவரம் ஸ்ரீகிருஷ்ணா நகர், பொன்னியம்மன்மேடு பகுதியை சேர்ந்த வெள்ளையம்மாள் (எ) தீபா (35) என அவர் அடையாளம் கண்டறியப்பட்டது.

அதேநேரம் சூட்கேஸ் வீசப்பட்ட பகுதிகளில் உள்ள சிசிடிவி கேமரா பதிவுகள் மூலம் வாலிபரையும் போலீசார் அடையாளம் கண்டனர். ஆனால் அவர் யார், எந்த பகுதியை சேர்ந்தவர் என்று உடனே கண்டுபிடிக்க முடியாத நிலை ஏற்பட்டுள்ளது. கைது செய்யப்பட்ட மணிகண்டனிடம் நடத்திய விசாரணை குறித்து போலீசார் கூறியதாவது: சிவகங்கை மாவட்டம் உலகம்பட்டி பழைய ஊரணி தெருவை சேர்ந்த மீனாட்சி சுந்தரம் என்பவரின் மகன் மணிகண்டன். இவர் மெக்கானிக்கல் இன்ஜினியர் படிப்பை சொந்த மாவட்டத்திலேயே முடித்துள்ளார். பள்ளி படிக்கும் போதே மணிகண்டனுக்கு தவறான பழக்கம் இருந்துள்ளது.

பிறகு இன்ஜினியரிங் கல்லூரிக்கு சென்ற பிறகு, இளம் பெண்களுடன் பழக்கத்தில் தனி நபராக ஈடுபட்டுள்ளார். அதற்கான பண தேவைக்கு, கல்லூரியில் செய்முறை தேர்வுக்கு பணம் கட்டணம் என பல பொய்களை தனது அம்மாவிடம் கூறி பணத்தை வாங்கி வந்து, விலை மாதர்களுடன் உல்லாசமாக இருந்து வந்துள்ளார். இன்ஜினியரிங் படிப்பு முடிந்ததும், சொந்த ஊரில் ஊதாரியாக சுற்றி கொண்டு, திருமணமான பெண்களுடன் அடிக்கடி உல்லாசமாக இருந்து வந்துள்ளார்.

இது மணிகண்டன் அம்மாவின் கவனத்திற்கு வந்தது. இதே நிலை நீடித்தால் மகன் கெட்டுப்போய் விடுவான் என்று சென்னை துரைப்பாக்கத்தில் வசித்து வரும் தனது மகளிடம் நடந்த சம்பவத்தை கூறி, அவரது தாய் கடந்த ஒன்றரை வருடங்களுக்கு முன்பு சென்னைக்கு மணிகண்டனை அனுப்பி வைத்துள்ளார். தனது அக்கா வீட்டிலேயே தங்கி பல இடங்களில் வேலை தேடி வந்துள்ளார் மணிகண்டன். கடைசியாக பெருங்குடியில் பிரபல கார் விற்பனை மற்றும் பழுதுபார்க்கும் நிறுவனத்தில் மாதம் ரூ.16 ஆயிரம் ஊதியத்தில் வேலைக்கு சேர்ந்துள்ளார்.

ஐடி நிறுவனங்கள் அதிகம் உள்ள பகுதி என்பதால், பாலியல் புரோக்கர்களிடம் தன்னுடன் பணியாற்றும் நண்பர்கள் மூலம் பழக்கமானார். அந்த பழக்கத்தில் மணிகண்டன் வாரத்திற்கு ஒரு முறை என மாதம் 4 முறை பாலியல் புரோக்கர் மூலம் இளம்பெண்களுடன் உல்லாசமாக இருந்து வந்துள்ளார். அதேபோல் கடந்த 3 மாதங்களுக்கு முன்பு இளம்பெண் ஒருவருடன் உல்லாசமாக இருந்த நேரத்தில் சைக்கோ போல் மணிகண்டன் இளம்பெண்ணை பல இடங்களில் கடித்து உள்ளார். இதுபற்றி அந்த பெண் தன்னை அனுப்பிய பாலியல் புரோக்கரிடம் கூறியதாக கூறப்படுகிறது.

உடனே இளம்பெண்ணை அனுப்பிய புரோக்கர் தனது நண்பர்களுடன் சேர்ந்து மணிகண்டனை தாக்கி அவரிடம் இருந்து மருத்துவ செலவுக்கு பணத்தை பறித்துள்ளார். மணிகண்டன் தான் சம்பாதிக்கும் பணத்தில் 60 சதவீதம் உல்லாசத்திற்கு மட்டும் பயன்படுத்தி வந்துள்ளார். இது போதாது என்று ஊரில் உள்ள தனது தாயிடம் பணம் பெற்றும் பெண்களுடன் உல்லாசமாக இருந்து வந்துள்ளார். அதன் பிறகு பாலியல் புரோக்கர் மணிகண்டனுக்கு இளம்பெண்களை அனுப்புவதை நிறுத்திவிட்டார். பிறகு மணிகண்டன் துரைப்பாக்கம் ரேடியல் சாலையில் திருநங்கைகளுடன் சென்று வந்துள்ளார்.

துரைப்பாக்கத்தில் உள்ள மணிகண்டன் அக்கா குடும்பத்துடன் ஊருக்கு சென்றால், தன்னுடன் வேலை செய்யும் நெருங்கிய நண்பர் ஒருவருடன் சேர்ந்து இளம் பெண்ணை வீட்டிற்கு அழைத்து வந்து இருவரும் உல்லாசமாக இருந்து வந்துள்ளனர். அதன்படி தான் தனது அக்கா திருவையாறுக்கு குடும்பத்துடன் சென்ற போது, தன்னுடன் பணியாற்றும் நண்பர் ஒருவர் மூலம் பாலியல் புரோக்கரை தொடர்பு கொண்டு தீபாவை வரவழைத்துள்ளார். அதன் பிறகு தான் பேசிய பணம் கொடுக்காததால் ஏற்பட்ட தகராறில் மணிகண்டன் போதையில் என்ன செய்வது என்று தெரியாமல் சுத்தியலால் அடித்து கொன்றுள்ளார்.

இதுபோன்ற பாலியல் உறவில் அதிக நாட்டத்துடன் மணிகண்டன் இருந்து வந்ததால், விரைவில் திருமணம் செய்ய அவரது தாய் மற்றும் சகோதரி முடிவு செய்து பல இடங்களில் மணிகண்டனுக்கு உறவினர்கள் மூலம் பெண் பார்த்து வந்துள்ளனர். அதற்குள் மணிகண்டன் தன் சுய நினைவிழந்து, சைக்கோ போல் பாலியலுக்கு அழைத்து வந்த பெண்ணை கொன்றது விசாரணையில் தெரிய வந்ததாக போலீசார் தெரிவித்தனர்.

* புகார் வந்த 2 மணி நேரத்தில் குற்றவாளி கைது எப்படி?
புதிதாக போலீஸ் உயர் அதிகாரி கட்டி வரும் வீட்டின் அருகே சூட்கேஸ் வீசப்பட்டு, அதில் இளம்பெண்ணின் உடல் இருப்பதை பார்த்த போலீசார் அந்த பகுதி சிசிடிவி கேமரா பதிவுகள் மூலம் வாலிபர் வீசிச்செல்வதை கண்டுபிடித்தனர். ஆனால், அந்த நபர் யார் என்பது தெரியவில்லை. எனவே, இன்ஸ்பெக்டர் பிரபு, பாலியல் புரோக்கர்களின் உதவி மூலம் தீபா யாருடன் வந்தார் என்பது குறித்து தகவல்களை அதிரடியாக சேகரித்தார்.

அப்போது தான், மணிகண்டன் (23) பாலியல் புரோக்கர் ஒருவர் மூலம், உல்லாசத்துக்கு தீபாவை கடந்த 17ம் தேதி 8 மணி நேரத்திற்கு ரூ.18 ஆயிரம் விலை பேசி அழைத்து சென்றது தெரியவந்தது. உடனே அடுத்த 2 மணி நேரத்தில் கொலை செய்யப்பட்ட தீபாவின் கடைசியாக துண்டிக்கப்பட்ட செல்போன் சிக்னல்களை வைத்து, உடல் வீசப்பட்ட 2வது தெருவில் பதுங்கி இருந்த கொலையாளி மணிகண்டனை இன்ஸ்பெக்டர் பிரபு தலைமையிலான போலீசார் அடையாளம் கண்டு கைது செய்தனர்.

சென்னை: ஆம்ஸ்ட்ராங் கொலை வழக்கில் கைது செய்யப்பட்ட முன்னாள் காங்கிரஸ் மாநில நிர்வாகி அஸ்வத்தாமன் உட்பட 15 பேர் குண்டர் தடுப்பு சட்டத்தின் கீழ் கைது செய்து சென்னை பெருநகர காவல்துறை நடவடிக்கை எடுத்துள்ளது. சென்னை பெரம்பூர் பகுதியில் பகுஜன் கட்சி மாநில தலைவர் ஆம்ஸ்ட்ராங் (52) கடந்த ஜூலை 5ம் தேதி கொடூரமாக அவரது வீட்டின் முன்பு வெட்டி படுகொலை செய்யப்பட்டார். ஆம்ஸ்ட்ராங் தேசிய கட்சியின் மாநில தலைவர் என்பதால் தமிழகம் உட்பட நாடு முழுவதும் பெரும் பரபரப்பை ஏற்படுத்தியது.

குற்றவாளிகள் மீது முன்னெச்சரிக்கை நடவடிக்கை எடுக்காததால் சென்னை பெருநகர போலீஸ் கமிஷனர் சந்தீப் ராய் ரத்தோர் அதிரடியாக மாற்றப்பட்டார். அவருக்கு பதில் தமிழ்நாடு காவல்துறை சட்டம் ஒழுங்கு கூடுதல் டிஜிபியாக இருந்த அருண் நியமனம் செய்யப்பட்டார்.
ஆம்ஸ்ட்ராங் கொலை தொடர்பாக செம்பியம் போலீசார் வழக்குபதிந்து ஆற்காடு சுரேஷ் சகோதரர் பொன்னை பாலு, கூலிப்படை தலைவன் குன்றத்தூர் திருவெங்கடம் உள்ளிட்ட 11 பேர் கைது செய்தனர். அவர்களில் திருவேங்கடம் காவலில் எடுத்து விசாரணை நடத்திய போது, போலீசார் மீது தாக்குதல் நடத்தி தப்பித்தபோது போலீசார் தற்பாதுகாப்புக்காக சுட்டத்தில் ரவுடி திருவேங்கடம் உயிரிழந்தார்.

அதன்பிறகு கைதானவர்களிடம் நடத்திய விசாரணையை தொடர்ந்து திருவல்லிக்கேணியை சேர்ந்த முன்னாள் பிரபல ரவுடி தோட்டம் சேகர் மனைவியும் வழக்கறிஞரான மலர்கொடி, வழக்கறிஞர்களான அரிகரன் மற்றும் வியாசர்பாடி பிரபல ரவுடி நாகேந்திரன் மகனும் இளைஞர் காங்கிரஸ் முன்னாள் மாநில பொதுச்செயலாளர் அஸ்வத்தாமன் (31) உட்பட 28 பேர் இந்த வழக்கில் இதுவரை கைது செய்து சிறையில் அடைக்கப்பட்டனர்.

அதனை தொடர்ந்து தற்போது ஆம்ஸ்ட்ராங் படுகொலை வழக்கில் பழைய வண்ணாரப்பேட்டையை சேர்ந்த கு.அரிகரன் (27), திருவல்லிக்கேணி பகுதியை சேர்ந்த அதிமுக முன்னாள் நிர்வாகியான வழக்கறிஞர் மலர்கொடி (49), திருநின்றவூர் பகுதியை சேர்ந்த சதீஷ்குமார் (31), திருவள்ளூர் மாவட்டம் முன்னாள் அதிமுக நிர்வாகியான வழக்கறிஞர் கோ. அரிகரன் (37), முன்னாள் பாஜ சென்னை மாவட்ட நிர்வாகி புளியந்தோப்பு பகுதியை சேர்ந்த அஞ்சலை (51), காமராஜர் சாலை பகுதியை சேர்ந்த சிவா (35),

பெரம்பூர் பகுதியை சேர்ந்த பிரதீப் (28), கோடம்பாக்கம் பகுதியை சேர்ந்த முகிலன் (32), கோடம்பாக்கம் பகுதியை சேர்ந்த விஜயகுமார் (எ) விஜய் (21), விக்னேஷ் (எ) அப்பு (27), வியாசர்பாடியை சேர்ந்த இளைஞர் காங்கிரஸ் கட்சியின் முன்னாள் மாநில நிர்வாகி அஸ்வத்தாமன் (31), ராணிப்பேட்டையை சேர்ந்த பிரபல ரவுடி ஆற்காடு சுரேஷ் மனைவி பொற்கொடி (40),

கோடம்பாக்கத்தை சேர்ந்த ராஜேஷ் (40), செந்தில்குமார் (எ) குமரா (27), கே.கே.நகரை சேர்ந்த கோபி (23) ஆகிய 15 பேரை செம்பியம் போலீசார் பரிந்துரைப்படி போலீஸ் கமிஷனர் அருண், குண்டர் தடுப்பு சட்டத்தின் கீழ் கைது செய்து சிறையில் அடைக்க உத்தரவிட்டார். ஏற்கனவே ஆம்ஸ்ட்ராங் படுகொலை வழக்கில் கடந்த 7ம் தேதி 10 பேர் குண்டர் தடுப்பு சட்டத்தின் கீழ் கைது செய்யப்பட்டுள்ளது குறிப்பிடத்தக்கது.

சென்னை: இந்து சமய அறநிலைய துறை உதவி ஆணையர் பதவிக்கான விண்ணப்பதாரர்கள் உரிய சான்றிதழை பதிவேற்றம் செய்ய டிஎன்பிஎஸ்சி நிர்வாகம் காலக்கெடு வழங்கியுள்ளது. இதுகுறித்து டிஎன்பிஎஸ்சி தேர்வுக் கட்டுப்பாட்டு அலுவலர் அ.ஜான் லூயிஸ் வெளியிட்ட அறிவிப்பு: தமிழ்நாடு அரசுப் பணியாளர் தேர்வாணையம் வாயிலாக இந்து சமய அறநிலைய ஆட்சித் துறையில் உதவி ஆணையர் (குரூப் 1-பி பணி) பதவிகளுக்கான காலிப் பணியிடங்களில் நேரடி நியமனம் செய்வதற்கு விண்ணப்பதாரர்களால் சான்றிதழ் பதிவேற்றம் செய்யப்பட்டது.

இதில் சான்றிதழ் சரிபார்ப்புக்கு பின்னர் சில விண்ணப்பதாரர்கள் உரிய சான்றிதழ்களை முழுமையாக, குறைபாடாக, சரியாக பதிவேற்றம் செய்யப்படாமல் உள்ளது கண்டறியப்பட்டுள்ளது. எனவே, இத்தகைய விண்ணப்பதாரர்களுக்கு இறுதி வாய்ப்பு வழங்கும் விதமாக வருகிற 3ம் தேதி இரவு 11.59 மணி வரை விடுபட்ட மற்றும் சரியான சான்றிதழ்களை பதிவேற்றம் செய்ய மீண்டும் வாய்ப்பு வழங்கப்படுகிறது.

இத்தகவல் அவ் விண்ணப்பதாரர்களுக்கு மட்டும் குறுஞ்செய்தி மற்றும் மின்னஞ்சல் மூலமாக அறிவுறுத்தப்பட்டுள்ளது. எனவே, அவ்விண்ணப்பதாரர்கள் அனைவரும் மின்னஞ்சலில் தெரிவிக்கப்பட்டுள்ள சான்றிதழ்களை தேர்வாணைய இணையதளத்தில் ஒருமுறைப் பதிவு (ஓடிஆர்) வாயிலாக பதிவேற்றம் செய்ய அறிவுறுத்தப்படுகிறார்கள். இவ்வாறு அதில் கூறப்பட்டுள்ளது.

சென்னை: சைபர் குற்றங்களில் வங்கி கணக்குகளை முடக்குவதற்கு முன்பு பின்பற்ற வேண்டிய விதிமுறைகளை வகுத்து, அதை அனைத்து மாநில காவல்துறையும் பின்பற்ற உத்தரவிடக் கோரிய வழக்கில் ஒன்றிய உள்துறை அமைச்சகம் பதிலளிக்குமாறு சென்னை உயர் நீதிமன்றம் உத்தரவிட்டுள்ளது. சந்தேகத்துக்கு இடமான முறையில் பண பரிவர்த்தனை நடந்துள்ளதாகக் கூறி குஜராத், கேரளா, கர்நாடகா, மும்பை உள்ளிட்ட பிற மாநில போலீசாரின் உத்தரவின்படி தங்கள் வங்கிக் கணக்கை முடக்கியதை எதிர்த்து சென்னை கோபாலபுரத்தில் இயங்கி வரும் சிகேபிஎஸ் ஸ்டீல் நிறுவனத்தின் இயக்குனர் அஜீத் குமார் சென்னை உயர் நீதிமன்றத்தில் வழக்கு தொடர்ந்தார்.

அவர் தாக்கல் செய்த மனுவில், சைபர் குற்றங்களில் வங்கி கணக்குகளை முடக்கும் முன்பு பின்பற்ற வேண்டிய விதிகள் எதுவும் இல்லை. எந்த வழக்கிற்காக வங்கி கணக்குகளை முடக்கினார்கள். எந்த மாநிலத்தில் உள்ள கணக்குகளை முடக்கினார்கள் என்று தெரிவிக்கவில்லை. இதனால் தங்கள் நிறுவனம் கடுமையாக பாதிக்கப்பட்டுள்ளது. எனவே, சைபர் குற்றங்களில் வங்கி கணக்குகளை முடக்குவது தொடர்பாக விதிகளை வகுத்து அதை நாடு முழுவதும் உள்ள காவல்துறையினர் பின்பற்றுமாறு நடவடிக்கை எடுக்க ஒன்றிய அரசுக்கு உத்தரவிட வேண்டும் என்று கோரப்பட்டிருந்தது.

இந்த வழக்கு நீதிபதி எம்.தண்டபாணி முன்பு விசாரணைக்கு வந்தது. அப்போது, மனுதாரர் தரப்பில் ஆஜரான மூத்த வழக்கறிஞர் ஏ.நடராஜன், வங்கிக் கணக்கு முடக்கம் செய்வதற்கு முன்பு நோட்டீஸ் கொடுத்து எதற்காக முடக்க போகிறோம், எந்த வழக்கில் முடக்கப் போகிறோம் என்று தகவல் தெரிவித்த பிறகு தான் முடக்க வேண்டும். ஆனால், இந்த நடைமுறை எதுவும் இல்லை. எனவே, வங்கி கணக்குகளை முடக்குவது தொடர்பான விதிமுறையை வகுக்க வேண்டும் என்று வாதிட்டார். வழக்கை விசாரித்த நீதிபதி, இந்த மனுவுக்கு நான்கு வாரங்களில் பதிலளிக்குமாறு ஒன்றிய உள்துறை அமைச்சகம் மற்றும் சைபர் க்ரைம் காவல்துறைக்கு உத்தரவிட்டு விசாரணையை தள்ளி வைத்தார்.