நமது கலாச்சாரத்தில் பெண்கள் அணியும் ஆபரணங்களில் வளையல்களுக்கு முக்கிய இடம் உண்டு. கண்ணாடி, செம்பு, வெள்ளி, தங்க, வைரம் என்று பல்வேறு உலோகங்களால் தயாரிக்கப்பட்ட வளையல்கள் பண்டைய காலம் முதல் பழக்கத்தில் இருந்து வருகின்றன.பாதுகாப்பு மற்றும் பராமரிப்பதில் இருக்கும் சிரமங்கள் காரணமாக கண்ணாடி வளையல்களின் உபயோகம் குறைந்து வருகிறது. நவீனகாலத்திற்கு ஏற்றவாறு சில்வர், ரோஸ்கோல்ட், நூல், பிளாஸ்டிக் ஆகியவற்றால் தயாரிக்கப்படும் வளையல்களை தற்போது பலரும் அணிகிறார்கள். இத்தகைய உலோகங்களால் ஆன வளையல்களை பொலிவு மங்காமல் பராமரிப்பது எப்படி? இதோ சில ஆலோசனைகள்.
அனைத்து உலோக வளையல்களையும் மொத்தமாக ஒரே பெட்டியில் பாதுகாத்து வைப்பதைத் தவிர்க்க வேண்டும். ஒவ்வொரு உலோகத்துக்கும் ஒரு தனிப்பட்ட பண்பு உண்டு. அவை ஒன்றோடொன்று சேரும்போது ரசாயன மாற்றங்கள் ஏற்படலாம். இவ்வாறு எளிதாக ரசாயன மாற்றத்திற்கு உள்ளாகும் நகைகள் மலிவான விலைக்கு கிடைக்கும். இவற்றை தவிர்த்து தரமான உலோகங்களால் தயாரிக்கப்பட்ட
வளையல்களை வாங்குவதும் சிறந்தது.
பல்வேறு உலோகத்தால் ஆன வளையல்களை அவற்றுக்காக கொடுக்கப்பட்ட பிரத்தியேக பெட்டிகளில் வைப்பது நல்லது. காற்று புகாதவாறு பெட்டி அல்லது அறையில் அவற்றை பத்திரப்படுத்தி வைத்தால் பொலிவு குறைவதை தவிர்க்கலாம்.செம்பு உலோகத்தால் தயாரிக்கப்பட்ட வளையல்களை அவ்வப்போது பருத்தி துணியைக் கொண்டு துடைத்து பாலீஷ் செய்யலாம். செம்பு வளையல்களை எப்போதும் கைகளில் அணிந்து இருந்தால் சருமத்துடன் ஏற்படும் உராய்வு காரணமாக பொலிவு குறையாமல் இருக்கும். வியர்வை படும்போது செம்பு நிறம் மாறும் தன்மை கொண்டது. எனவே செம்பு வளையல்கள் கைகளில் இறுக்கமாக இல்லாதவாறு பார்த்துக் கொள்ள வேண்டும்.
ஸ்டெர்லிங் சில்வர் வளையல்கள் நேரடியாக சூரிய வெளிச்சத்தில் படும்போது அவற்றின் பொலிவு குறையும். எனவே, இரவு நேர நிகழ்ச்சிகளுக்கு இவ்வகை வளையல்களை அணிந்து செல்லலாம். குளிப்பது, பாத்திரம் துலக்குவது, வீட்டை சுத்தம் செய்வது ஆகிய வேலைகளைச் செய்யும் போது வளையல்களை கழற்றி வைக்க வேண்டும். தண்ணீர் அடிக்கடி படும்போது வளையல்கள் அதன் பொலிவை இழக்கக் கூடும்.வளையல்களை பாதுகாத்து வைக்கும் இடத்தில் ஈரப்பதம் அதிகம் இல்லாதவாறு பார்த்துக் கொள்ள வேண்டும். ஈரப்பதத்தை உறிஞ்சும் தன்மை கொண்ட சாக்பீஸ், சிலிகான், ஜெல் ஆகியவற்றை வளையல் பெட்டிகளில் வைக்கலாம். வளையலில் நிறமற்ற நெயில் பாலீஷ் கோட்டிங் போட்டும் வைக்கலாம்.கல் வளையல்களை துணி கொண்டு சுற்றி ஒன்றுடன் ஒன்று உராயாமல் பாதுகாப்பது மிக அவசியம்.
– அ.ப. ஜெயபால்
