Lakshmipathi

*விவசாயிகள் தீவிரம்

தஞ்சாவூர் : தஞ்சாவூர் மாவட்டம் திருவையாறு அடுத்த வடுகக்குடி பகுதியில் வாழை விவசாயத்திற்காக ஆட்டு சாணம் மூலம் இயற்கை உரம் தயாரிக்கும் பணியில் விவசாயிகள் ஈடுபட்டு வருகின்றனர்.தஞ்சை மாவட்டத்தில் நெல்லுக்கு அடுத்தபடியாக தென்னை, கரும்பு, வெற்றிலை கொடிக்கால், வாழை அதிக அளவில் பயிரிடப்பட்டு வருகிறது.

குறிப்பாக காவிரி கரையோர பகுதிகளில் தான் அதிக அளவில் சாகுபடி செய்யப்படுகின்றன. மாவட்டத்தில் உள்ள திருவையாறு, திருக்காட்டுப்பள்ளி, கும்பகோணம், பாபநாசம், அய்யம்பேட்டை பகுதிகளில் அதிக அளவில் வாழை சாகுபடி செய்யப்படுகிறது.

தஞ்சாவூர் மாவட்டத்தில் வாழை விவசாயம் முக்கியமானது. காவிரி டெல்டா பகுதியில் பரவலாக வாழை பயிரிடப்படுகிறது. தஞ்சாவூர் மாவட்டத்தில் சுமார் 3.39 லட்சம் ஹெக்டேர் பரப்பளவில் விவசாயம் செய்யப்படுகிறது.

அதில் 2.69 லட்சம் ஹெக்டேரில் பயிர்கள் பயிரிடப்படுகின்றன.தோட்டக்கலை சாகுபடி பரப்பளவு 45,330 ஹெக்டேர் ஆகும். இதில் பழங்கள் சுமார் 4,690 ஹெக்டேர்களில் பயிரிடப்படுகின்றன. 11 ஆயிரம் ஏக்கரில் விவசாயிகள் வாழை சாகுபடி மேற்கொண்டு வருகின்றனர்.

குறிப்பாக, பொங்கல் பண்டிகைக்காக வாழைத்தார்களை விவசாயிகள் வெளிநாடுகளுக்கும் ஏற்றுமதி செய்கிறார்கள்.இந்த பகுதிகளில் வாழை இலை மற்றும் வாழை நார் பொருட்கள் தயாரிப்பின் மூலம் ஏராளமானோர் தங்கள் வாழ்க்கையை நடத்துகிறார்கள்.

தஞ்சையை சுற்றியுள்ள திருவையாறு, வடுகkkகுடி அம்மன்பேட்டை, திருக்காட்டுப்பள்ளி, மேலத்திருப்பூந்துருத்தி உள்ளிட்ட பகுதிகளில் இருந்து வாழை இலைகள் சென்னையில் உள்ள ஓட்டல்களுக்கு அனுப்பி வைக்கப்படுகின்றன.

இப்படி அனுப்பி வைக்கப்படும் இலைகளில் 2 வகைகள் உள்ளன. நுனி இலை, ஏடு என 2 வகைகளாக ஓட்டலுக்கு அனுப்பி வைக்கப்படுகிறது. அதேபோல் வாழை நார்களும் பல்வேறு மாவட்டங்களுக்கு அனுப்பி வைக்கப்படுகிறது.

இந்தநிலையில் தற்போது திருவையாறு சுற்றுவட்டார பகுதிகளில் வாழை கன்றுகள் நடும் பணி தொடங்கும் நிலையில் உள்ளது. இதற்காக வாழை விவசாயிகள் தங்கள் பகுதியில் கிடைக்கும் ஆட்டு சாணங்களை விலைக்கு வாங்கி அதனை பவுடராக நுணுக்கும் பணியில் ஈடுபட்டு வருகின்றனர்.

இது குறித்து வாழை விவசாயி மதியழகன் கூறுகையில், இன்னும் சில தினங்களில் புதிதாக வாழைக்கன்றுகள் நடும் பண்ணி தொடங்க உள்ளோம். அதற்கான அனைத்து பணிகளிலும் தற்போது ஈடுபட்டு வருகிறோம்.

காவிரி டெல்டா பகுதியான திருவையாறு திருக்காட்டுப்பள்ளி உள்ளிட்ட பகுதிகளில் தற்போது விவசாய பணிக்காக தண்ணீர் திறந்து முழுமையாக சென்று வருகிறது. அதனை பயன்படுத்தி வாழை சாகுபடியில் ஈடுபட உள்ளோம். நாங்கள் வாழை சாகுபடிக்கு செயற்கை உரங்களை பயன்படுத்துவதில்லை.

முழுமையாக இயற்கை உரத்தை மட்டுமே பயன்படுத்தி வருகிறோம். இயற்கை உரத்திற்காக எங்கள் பகுதியில் கிடைக்கும் ஆட்டு சாணத்தை பெற்று அதனை பவுடராக நுணுக்கி சாலையில் உலர்த்தி வருகிறோம்.

தமிழகத்தின் பல்வேறு பகுதிகளுக்கு திருவையாறு பகுதியில் இருந்துதான் வாழையிலை வாழைப்பழம் வாழைநார் வாழைப்பூ ஆகிய அனைத்தும் ஏற்றுமதி செய்யப்படுகிறது. நாங்கள் உற்பத்தி செய்யும் வாழை சம்பந்தப்பட்ட அனைத்து பொருட்களும் தரமானதாக இருக்கும். இதற்குக் காரணம் இயற்கை உரம் தான். இவ்வாறு அவர் கூறினார்.

சேந்தமங்கலம் : புதுச்சத்திரம் புதன்சந்தையில் மாடுகள் வரத்து அதிகரித்து விலை குறைந்து வருவதால் ரூ.2.50 கோடிக்கு வர்த்தகம் நடந்தது. புதுச்சத்திரம் ஒன்றியம், புதன்சந்தையில் வாரம்தோறும் செவ்வாய்க்கிழமை மாட்டுச்சந்தை கூடுவது வழக்கம்.

திங்கட்கிழமை இரவு தொடங்கி செவ்வாய்க்கிழமை மதியம்வரை சந்தை நடைபெறும். சந்தையில் மாடுகளை வாங்க விற்க ஆந்திரா, கர்நாடகம், கேரளா, கோயம்புத்தூர், ஈரோடு, நீலகிரி, திண்டுக்கல், சேலம் உள்ளிட்ட பல்வேறு பகுதிகளில் இருந்தும் மற்றும் உள்ளூர் விவசாயிகள், வியாபாரிகள் வருவர்.

கோடிக்கணக்கில் வர்த்தகம் நடைபெறும். நேற்று கூடிய மாட்டு சந்தையில் ஆந்திரா, கர்நாடகா, தமிழ்நாட்டின் உள் மாவட்டங்களில் இருந்து பால்மாடுகள், இறைச்சி மாடுகள், காளை மாடுகள் என அதிகளவில் மாடுகளை விற்பனைக்கு கொண்டு வந்தனர்.

கர்நாடகா, கேரளா, ஆந்திரா, தமிழக உள் மாவட்டங்களில் மாடுகளை வாங்க குறைவான வியாபாரிகள் வந்திருந்தனர். இதனால் வெளி மாநிலங்களுக்கு மாடுகள் விற்பனை குறைந்து போனது.

கர்நாடகா, கேரளாவில் தொடர் மழையின் காரணமாக அங்கிருந்து குறைவான வியாபாரிகள் மாடுகளை வாங்க வந்திருந்தனர். இதனால் மாடுகளின் விலை குறைந்தது. இறைச்சி மாடுகள் ரூ.25 ஆயிரத்திற்கும், கறவை மாடுகள் ரூ.45 ஆயிரத்திற்கும், கன்று குட்டிகள் ரூ.15 ஆயிரத்திற்கு விற்பனையானது. மொத்தம் ரூ.2.50 கோடிக்கு வர்த்தகம் நடந்தது.

* துணை முதல்வர் உதயநிதி ஸ்டாலின் வழங்குகிறார்

* ராஜேஸ்குமார் எம்பி தகவல்

நாமக்கல் : நாமக்கல்லில் நாளை நடைபெறும் அரசு விழாவில், 2001 பயனாளிகளுக்கு ரூ.33.18 கோடியில் அரசு நலத்திட்ட உதவிகளை, துணை முதல்வர் உதயநிதி ஸ்டாலின் வழங்குகிறார் என ராஜேஸ்குமார் எம்பி தெரிவித்தார்.தமிழ்நாடு துணை முதல்வரும், திமுக இளைஞர் அணி மாநில செயலாளருமான உதயநிதி ஸ்டாலின், நாளை (10ம் தேதி), நாமக்கல் மாவட்டத்தில் பல்வேறு அரசு நிகழ்ச்சிகளில் கலந்து கொள்கிறார்.

இதை யொட்டி, மாவட்ட கலெக்டர் அலுவலக வளாகத்தில் மேற்கொள்ளப்பட்டு வரும் முன்னேற்பாடு பணிகளை, மாவட்ட மத்திய கூட்டுறவு வங்கித்தலைவர் ராஜேஸ்குமார் எம்பி நேற்று ஆய்வு செய்தார். பின்னர், அவர் நிருபர்களிடம் கூறியதாவது:

தமிழ்நாடு துணை முதல்வர் உதயநிதி ஸ்டாலின், நாளை நாமக்கல் மாவட்டத்தில் பல்வேறு அரசு நிகழ்ச்சிகளில் கலந்து கொள்கிறார். இதற்காக துணை முதலமைச்சர் இன்று (9ம் தேதி) கரூர் மாவட்டத்தில் நடைபெறும் அரசு விழாவில் பங்கேற்று விட்டு, சாலை மார்க்கமாக மாலையில் நாமக்கல் மாவட்டத்திற்கு வருகை புரிகிறார்.

நாளை காலை 10 மணிக்கு, மாவட்ட கலெக்டர் அலுவலகத்தில், துணை முதல்வர் உதயநிதி ஸ்டாலின் மாவட்டத்தில் மேற்கொள்ளப்பட்டு வரும் வளர்ச்சி பணிகள் குறித்த அரசுத்துறை அதிகாரிகள் அடங்கிய ஆய்வு கூட்டத்தில் கலந்து கொள்கிறார்.

தொடர்ந்து, நாமக்கல் மாவட்டத்தில் பல்வேறு துறைகளின் சார்பில் மேற்கொள்ளப்பட உள்ள 139 பணிகளுக்கு ரூ.87.38 கோடியில் அடிக்கல் நாட்டியும், ரூ.10.80 கோடி மதிப்பில் முடிவடைந்த 36 திட்டப்பணிகளை திறந்து வைத்தும், மாற்றுத்திறனாளிகள் நலத்துறை, வருவாய் மற்றும் பேரிடர் மேலாண்மைத்துறை, மாவட்ட தொழில் மையம், தொழிலாளர் நலத்துறை, பிற்படுத்தப்பட்டோர் மற்றும் சிறுபான்மையினர் நலத்துறை உள்ளிட்ட பல்வேறு துறைகளின் சார்பில் 2001 பயனாளிகளுக்கு ரூ.33.18 கோடியில் அரசு நலத்திட்ட உதவிகளை வழங்கியும், விழா பேருரையாற்றுகிறார்.

மேலும், நாமக்கல், திருச்செங்கோடு, ராசிபுரம், குமாரபாளையம் ஆகிய நகராட்சிகள் மற்றும் நகராட்சி சுற்றுவட்டார பகுதிகளில் இருப்பவர்களுக்கு, முதற்கட்டமாக பட்டாக்கள் மற்றும் இலவச வீட்டுமனை பட்டாக்களை வழங்கவுள்ளார்.

நாளை மாலை 3 மணியளவில், மாவட்ட விளையாட்டு அரங்கில் நவீன விளையாட்டு உடற்பயிற்சி கூடத்தை துணை முதல்வர் திறந்து வைக்கிறார். தொடர்ந்து, நாமக்கல் மாவட்டத்தின் சார்பில் பல்வேறு விளையாட்டு போட்டிகளில் பங்கேற்று வெற்றி பெற்ற வீரர், வீராங்கனைகளை சந்தித்து கலந்துரையாடுகிறார்.

விழாவில், ஆதிதிராவிடர் நலத்துறை அமைச்சர் டாக்டர் மதிவேந்தன், அரசு கூடுதல் செயலாளர், நாடாளுமன்ற, சட்டமன்ற உறுப்பினர்கள், உள்ளாட்சி அமைப்புகளின் பிரதிநிதிகள் கலந்து கொள்கின்றனர். இவ்வாறு ராஜேஸ்குமார் எம்பி தெரிவித்தார்.

அப்போது, மாவட்ட கலெக்டர் துர்காமூர்த்தி, மேயர் கலாநிதி, துணை மேயர் பூபதி, மாவட்ட எஸ்பி ராஜேஸ் கண்ணன், மாவட்ட வருவாய் அலுவலர் சுமன், மாநகராட்சி ஆணையாளர் சிவக்குமார், வருவாய் கோட்டாட்சியர்கள் சாந்தி, சுகந்தி ஆகியோர் உடனிருந்தனர்.

சின்னமனூர் : சின்னமனூர் பகுதியில், முதல் போக சாகுபடி பணிகள் தொடங்கியுள்ள நிலையில், சில விவசாயிகள் மாடு கட்டி, ஏரு பூட்டி பாரம்பரிய முறையில் பரம்படிக்கும் பணிகளை மேற்கொண்டு வருகின்றனர்.

பெரியாறு அணையில் இருந்து, வழக்கம்போல் கடந்த ஜூன் 1ம் தேதி கம்பம் பள்ளத்தாக்கு முதல் போக பாசனத்திற்காக தண்ணீர் திறக்கப்பட்டது. தற்போது வரை தொடர்ச்சியாக தண்ணீர் திறக்கப்பட்டு வருகிறது. இதன் வாயிலாக சுமார் 14,700 ஏக்கர் பரப்பில் நிலங்கள் பாசன வசதி பெறுகின்றன.

இதில், தேனி மாவட்டம் சின்னமனூர் பகுதியில் சுமார் 4 ஆயிரம் ஏக்கர் பரப்பில் முல்லைப் பெரியாறு பாசன நீரைப் பயன்படுத்தி வருடம் இருபோகம் நெல் சாகுபடி நடைபெற்று வருகிறது. இந்த ஆண்டும், பாசன வசதி கிடைத்துள்ளதாலும், இதமான காலநிலை நிலவுவதாலும் சாகுபடி பணிகளை விவசாயிகள் மும்முரமாக செய்து வருகின்றனர்.

சின்னமனூர் பகுதியில் முதற்கட்டமாக மார்க்கையன்கோட்டை, குச்சனூர், துரைச்சாமிபுரம், கூழையனூர் உள்ளிட்ட பல்வேறு பகுதிகளில் நடவு பணிகள் நிறைவு பெற்றுள்ளது. 2ம் கட்டமாக சின்னமனூர், முத்துலாபுரம் பரவு, பெருமாள் கோயில் பரவு, பிள்ளைக்குழிமேடு பரவு, வேம்படிகளம் பரவு, துர்க்கை அம்மன் கோயில் பரவு உள்ளிட்ட பகுதிகளில் தற்போது நடவுப் பணிகள் தீவிரமாக நடைபெற்று வருகின்றன.

மண்ணிற்கு உரமிட்டு டிராக்டர் மூலம் சேற்றுழவு செய்யும் பணிகளும் பல்வேறு பகுதிகளில் நடைபெற்று வருகின்றன.

இந்த நிலையில், சில பகுதிகளில் விவசாயிகள் பாரம்பரிய முறையில் இரட்டை மாடுகளை கட்டி, ஏர் பூட்டி பரம்படிக்கும் பணிகளை மேற்கொண்டு வருகின்றனர். இதனை டிராக்டர் மூலம் மட்டுமே உழவு செய்து பழக்கப்பட்டவர்களுக்கு ஆச்சர்யத்துடன் பார்த்து வருகின்றனர்.

தற்போது புதிய தொழில்நுட்பங்கள் வருகை, வேலைப் பளு, வேலைக்கு ஆட்கள் கிடைக்காதது என பல்வேறு காரணங்களினால் டிராக்டர் மூலம் உழவு செய்வதும், நெல் நாற்றுக்களை இயந்திரம் மூலமாக நடவு செய்வதும், அறுவடை செய்வதும் வழக்கமான நடைமுறையாக மாறிவிட்டது.

இந்த நிலையில், மண்ணில் தண்ணீர் தேக்கி இளகச் செய்து, உரமிட்டு மாடுகட்டி ஏர் பூட்டி வயலை உழும் பாரம்பரிய முறையை விவசாயிகள் மேற்கொண்டு வருவது மீண்டும் இயற்கை விவசாயத்திற்கு திரும்புவதில் விவசாயிகளுக்கு ஆர்வம் அதிகரித்து வருவதை வெளிப்படுத்துவதாக உள்ளது.

தொடர்ச்சியான பாசன வசதி கிடைக்கும் பட்சத்தில் விவசாயிகள் பாரம்பரிய முறைகளை தொடரும் ஆர்வம் மேலும் அதிகரிக்கும் என எதிர்பார்க்கப்படுகிறது.

ஊட்டி : தாவரவியல் பூங்காவில் உள்ள மரங்களின் அடியில் புதிய புற்கள் பதிக்கும் பணி துவங்கி உள்ளது. நீலகிரி மாவட்டத்தில் முதல் மற்றும் இரண்டாவது சீசன் அனுசரிக்கப்பட்டு வருகிறது. ஏப்ரல் மற்றும் மே மாதங்களில் முதல் சீசனாகவும், செப்டம்பர் மற்றும் அக்டோபர் மாதங்களில் இரண்டாவது சீசனும் அனுசரிக்கப்படுகிறது.

முதல் சீசனின் போது, பல்வேறு கண்காட்சிகள் மற்றும் விழாக்கள் நடத்தப்படுகிறது. இதனை காண வெளி மாநிலங்கள் மற்றும் வெளி மாவட்டங்களில் இருந்து பல லட்சம் சுற்றுலா பயணிகள் ஊட்டிக்கு வருவது வழக்கம்.

அதேபோல், இரண்டாம் சீசனின் போதும் ஏராளமான சுற்றுலா பயணிகள் வருவார்கள். இதனால், இவ்விரு சீசன் சமயங்களிலும் பூங்காக்களை தோட்டக்கலைத்துறையினர் தயார் செய்வது வழக்கம்.

முதல் சீசனின் போது மலர் கண்காட்சி, ரோஜா கண்காட்சி நடத்தப்படுகிறது. இம்முறை மலர் கண்காட்சி கடந்த மே மாதம் நடத்தப்பட்டது. மலர் கண்காட்சி காண ஏராளமான ஒன்றரை லட்சத்திற்கும் மேற்பட்ட சுற்றுலா பயணிகள் ஊட்டி தாவரவியல் பூங்காவிற்கு வந்தனர். மேலும், இம்முறை மே மாதம் தொடர்ந்து மழை பெய்த நிலையில், பூங்காவில் உள்ள புல் மைதானங்கள் பாதிக்கப்பட்டன.

குறிப்பாக, சுற்றுலா பயணிகள் மழையிலேயே பூங்காவில் உள்ள புல் மைதானங்களில் நடந்து சென்ற நிலையில், புல்வெளிகள் பாதிக்கப்பட்டன. இந்த இடங்களில் தற்போது புதிய புற்கள் பதிக்கும் பணிகள் மேற்கொள்ளப்பட்டு வருகிறது.

குறிப்பாக, புல் மைதானங்களில் உள்ள மரங்களின் அடியில் இருந்த புற்கள் முழுமையாக சேதம் அடைந்த நிலையில், தற்போது புதிய புற்கள் பதிக்கும் பணிகள் துவக்கப்பட்டுள்ளது. இப்பணிகள் ஓரிரு நாட்கள் மேற்கொள்ளப்படும் என ஊழியர்கள் தெரவித்தனர்.

தற்போது, ஊட்டி தாவரவியல் பூங்கா இரண்டாம் சீசனுக்காக தயார் செய்யப்பட்டு வருகிறது. தற்போது பூங்காவில் நடவு பணிகளுக்காக பாத்திகள் தயார் செய்யப்பட்டு வருகிறது. இதன் ஒரு பகுதியாக புல் மைதானங்கள் சீரமைப்பு பணிகளும் மும்முரமாக நடந்து வருவது குறிப்பிடத்தக்கது.

ஊட்டி : அஜ்ஜூர் கிராம மக்களுக்கு எதிராக மாவட்ட வனத்துறையால் தொடங்கப்பட்ட வெளியேற்ற நடவடிக்கைககள் நிரந்தரமாக நிறுத்த வேண்டும் என வலியுறுத்தி கிராம மக்கள் பாரம்பரிய ஆடையுடன் மாவட்ட கலெக்டர் அலுவலகத்தை முற்றுகையிட்டனர். தொடர்ந்து, கிராம மக்கள் மாவட்ட கலெக்டரிடம் அளித்துள்ள மனுவில் கூறியிருப்பதாவது:

ஊட்டி அருகேயுள்ள அஜ்ஜூர் கிராமத்தில் 350 குடும்பங்கள் வசிக்கின்றோம். இங்கு வசிக்கும் மக்கள் படுகர் இனத்தை சேர்ந்த மக்கள். இங்கு சுமார் 300 ஆண்டுகளுக்கு மேல் வசித்து வருகிறோம். இந்நிலையில், நாங்கள் வசிக்கும் பகுதி வனத்துறைக்கு சொந்தமானது எனக்கூறி எங்களை வெளியேற்ற அறிவிப்புகள் அனுப்பப்பட்டுள்ளது.

தமிழ்நாடு வனச்சட்டத்தின் கீழ் எங்களை வெளியேற்ற வனத்துறை தற்போது நடவடிக்கை எடுத்துள்ளது. இந்த அறிவிப்பின்படி, நாங்கள் வசிக்கும் வீடுகள், தேயிலை தோட்டங்கள் மற்றும் விவசாய நிலங்களில் இருந்து வெளியேற வேண்டும் என வனத்துறை அறிவித்துள்ளது.

இந்த அறிவிப்பு, காடுகளை பாதுகாக்கும் நோக்கமாக கொண்டிருந்த போதிலும், எங்கள் முழு கிராமத்தின் வாழ்வாதாரத்தையும், கலாச்சாரத்தையும், இருப்பையும் நேரடியாக பாதிக்கும் நிலை உருவாகியுள்ளது.

எங்கள் கிராம நிலத்தை ஒரு காப்பு காடாக மாற்றுவதே வனத்துறையின் நோக்கமாக கூறப்பட்டுள்ளது. இந்த நடவடிக்கை மேற்கொள்ளப்பட்டால், தலைமுறை தலைமுறையாக இந்த நிலத்தில் வாழ்ந்து வேலை செய்து வந்த நூற்றுக்கணக்கான குடும்பங்கள் வெளியேற்றப்பட்டு, அவர்களின் வாழ்வாதாரத்தையும், கலாச்சார பாரம்பரியத்தையும் சீர்குலைக்கும் நிலை உருவாகும்.

இந்த நிலங்களை நாங்கள் பல தலைமுறையாக பயன்படுத்தி வருகிறோம். இது ஆக்கிரமிப்பு இல்லை. மாறாக பல நூற்றாண்டுகள் பழமையான குடியேற்றத்தின் தொடர்ச்சியாகும். நிலத்தின் மீதான எங்கள் சட்டபூர்வமான உரிமைக்கான ஆவண ஆதாரங்கள் எங்களிடம் உள்ளன.

அஜ்ஜூரில் உள்ள சில குடும்பங்களுக்கு பட்டாக்கள் வழங்கப்பட்டுள்ளன. மேலும், அதற்கான நிலப்பதிவுகள் 1912 மற்றும் 1981ம் ஆண்டிலேயே முடிக்கப்பட்டள்ளன. மேலும், நாங்கள் வசிக்கும் பகுதிக்கு தலைமுறை தலைமுறையாக வரியும் செலுத்தி வருகிறோம். இதற்கான சான்றுகள் எங்களிடம் உள்ளது. வனத்துறையினர் வெளியேற்றுத் திட்டம் செயல்படுத்தினால், இங்கு வசிக்கும் 350 குடும்பங்கள் பாதிக்கும். எங்களை வீடற்றவர்களாக மாற்றும்.

எங்களின் வாழ்வாதாரங்கள் பாதிக்கும். இந்த நடவடிக்கை எங்களின் அடிப்படடை வாழ்க்கை உரிமையையும், வாழ்வாதாரத்தையும் மீறுவதாக அமையும். மூன்று நூற்றாண்டுகளுக்கும் மேலாக இந்த நிலங்களை வளர்த்த ஒரு சமூகமாக எங்கள் மூதாதையர் உரிமைகளையும் புறக்கணிக்கும்.

முறையான மறு வாழ்வு அல்லது எங்களை உரிமைகளை அங்கிகரிக்கமால் எங்கள் கிராம நிலத்தை ஒரு காப்பு காடாக மாற்ற முன்மொழியப்பட்டிருப்பது மிகப்பெரிய அநீதியாகும். எனவே, அஜ்ஜூர் கிராம மக்களுக்கு எதிராக மாவட்ட வனத்துறையால் தொடங்கப்பட்ட வெளியேற்ற நடவடிக்கைககள் நிருந்தரமாக நிறுத்த வேண்டும்.

சட்டம் மற்றும் இயற்கை நீதியின் கொள்கையின்படி, 596/1 மற்றும் 596/2 கணக்கெடுப்பு எண்களின் கீழ் விவசாயம் நிலம் மற்றும் குடியிருப்புகளை பயன்படுத்தி வரும் 350 குடும்பங்களுக்கும் எங்கள் வரலாற்று பயன்பாட்டை அங்கீகரித்து பட்டா வழங்க நடவடிக்கை எடுக்க வேண்டும்.

2006ம் ஆண்டு வன உரிமைகள் சட்டம் உட்பட தொடர்புடைய சட்டத்தின் கீழ் எங்கள் உரிமைகள் போதுமான அளவு பாதுகாக்கப்படுவதை உறுதி செய்ய, ஒரு பழங்குடியினராக எங்கள் வரலாற்று நிலையை கருத்தில் கொண்டு எங்கள் சமூகத்தின் வகைப்பாட்டினை விரிவான மதிப்பாய்வு செய்ய வேண்டும்.

நீலகிரியில் எந்த ஒரு எதிர்கால நில பயன்பாட்டுத் திட்டமும், எங்களை போன்ற நீண்டகால சமூகங்களின் உரிமைகள் மற்றும் வாழ்வாதரங்களை கணக்கில் எடுத்துக்கொண்டு, சுற்றுச்சூழல் பாதுகாப்பு மற்றும் மனித வாழ்விடத்தை மதிக்கும் நிலையான வளர்சியை ஊக்குவிக்கும். இவ்வாறு அதில் கூறி உள்ளனர்.

*நோய் பரவும் அபாயம்

ஊட்டி : ஊட்டி தாவரவியல் பூங்கா சாலையில் பாதாள சாக்கடை தொட்டியில் அடைப்பு ஏற்பட்டு கழிவுநீர் கடும் துர்நாற்றத்துடன் வழிந்தோடுவதால் சுகாதார சீர்கேடு ஏற்பட்டு நோய் பரவும் அபாயம் உள்ளது.நீலகிரி மாவட்டம் ஊட்டி நகரில் சுமார் ஒரு லட்சத்திற்கும் அதிகமான பொதுமக்கள் வசித்து வருகின்றனர்.

இதுதவிர ஏராளமான சுற்றுலா பயணிகளும் வந்து செல்கின்றனர். ஊட்டி நகரில் தூய்மை பணிகள், வளர்ச்சி பணிகள் அனைத்தும் ஊட்டி நகராட்சி மூலமாகவே மேற்கொள்ளப்படுகின்றன. மொத்தமுள்ள 36 வார்டுகளில் 25க்கும் மேற்பட்ட வார்டுகளில் பாதாள சாக்கடை திட்டம் செயல்படுத்தப்படுகிறது.

இந்த பாதாள சாக்கடை அமைக்கப்படடு நீண்ட நாட்களாகிய நிலையில் பல இடங்களில் சேதமடைந்தும் பழுதடைந்தும் காணப்படுகின்றன. இந்நிலையில், சுற்றுலா பயணிகள் அதிகம் வந்து செல்லக் கூடிய ஊட்டி தாவரவியல் பூங்கா சாலையில் பழங்குடியினர் பண்பாட்டு மைய கட்டிடத்திற்கு அருகில் உள்ள பாதாள சாக்கடை தொட்டியில் அடைப்பு ஏற்பட்டுள்ளது.

இதனால், கழிவுநீர் கடும் துர்நாற்றத்துடன் சாலை மற்றும் கால்வாயில் வழிந்தோடி வருகிறது. இதனால், அப்பகுதியில் கடும் துர்நாற்றம் வீசுவதுடன் சுகாதார சீர்கேடு ஏற்பட்டு வருகிறது.

இதனால், நோய் பரவும் அபாயம் ஏற்பட்டுள்ள நிலையில், இதனை சரி செய்ய கோரி பொதுமக்கள் பலமுறை நகராட்சியை தொடர்பு கொண்டு தெரிவித்த போதும் அதனை கண்டு கொள்ளவில்லை என கூறப்படுகிறது. எனவே பழுதடைந்துள்ள பாதாள சாக்கடையை ஊட்டி நகராட்சி சாி செய்ய வேண்டும் என்ற கோரிக்கை எழுந்துள்ளது.

ஊட்டி : நீலகிரியில் மழை பெய்து வரும் நிலையில் அனைத்து பகுதிகளிலும் பயிர் செய்ய விவசாயிகள் ஆர்வம் காட்டி வருகின்றனர்.நீலகிரி மாவட்டத்தில் ஆண்டு தோறும் ஜூன் மாதம் துவங்கி இரு மாதங்கள் தென்மேற்கு பருவமழை பெய்யும். அதேபோல், அக்ேடாபர் மாதம் துவங்கி இரு மாதங்கள் வடகிழக்கு பருவமழை பெய்யும்.

இச்சமயங்களில் நீலகிரி மாவட்டத்தில் அனைத்து பகுதிகளிலும் விவசாயம் மேற்கொள்வது வாடிக்கை. அதேசமயம், டிசம்பர் மாதம் முதல் மே மாதம் வரை 6 மாதங்கள் நீலகிரியில் மழை குறைந்து காணப்படும். சில சமயங்களில் இந்த 6 மாதங்களில் மழை துளிகள் கூட விழாது.

இதனால், இச்சமயங்களில் தாழ்வான பகுதிகள் மற்றும் நீர் நிலைகளை ஒட்டியுள்ள பகுதிகளில் மட்டுமே விவசாயிகள் மலை காய்கறிகளை பயிரிடுவார்கள்.

தண்ணீர் பற்றாக்குறை காரணமாக மலைப்பாங்கான பகுதிகளில் விவசாயம் மேற்கொள்வதை தவிர்ப்பது வழக்கம். ஜூன் மாதத்திற்கு பின்னரே விவசாயத்தை துவக்குவார்கள். ஆனால், இம்முறை கடந்த மாதம் பெரும்பலான நாட்கள் நீலகிரியில் மழை கொட்டித் தீர்த்தது.

தொடர் மழை காரணமாக அனைத்து பகுதிகளிலும் மற்றும் மலைப்பாங்கான பகுதிகளில், காய்கறி விவசாயிகள் பயிர் செய்ய துவங்கி விட்டனர். குறிப்பாக, இத்தலார், நஞ்சநாடு, எமரால்டு, முத்தோரை பாலாடா போன்ற பகுதிகளில் கேரட், உருளைக்கிழங்கு, பீட்ரூட், முட்டைகோஸ், பூண்டு போன்ற பயிர்கள் விவசாயிகள் பயிர் செய்ய துவங்கியுள்ளனர்.

*1,382 தன்னார்வலர்கள் பங்கேற்பு

தர்மபுரி : தர்மபுரி மாவட்டம் முழுவதும் நேற்று (8ம் தேதி) முதல் கலைஞர் மகளிர் உரிமைத்தொகை பெற வீடு, வீடாக விண்ணப்பம் விநியோகம் செய்யும் பணி தொடங்கியது.

தமிழக அரசு பெண்கள் முன்னேற்றத்துக்காக, மாதந்தோறும் ஆயிரம் ரூபாய் வழங்கும் கலைஞர் உரிமைத் தொகை திட்டத்தை செயல்படுத்தி வருகிறது. ரேஷன் கார்டு வைத்திருக்கும் தகுதி வாய்ந்த ஒரு கோடியே 14 லட்சம் பெண்கள் இத்திட்டத்தில் பயனாளிகளாக உள்ளனர். இன்னும் சிலர் தகுதி இருந்தும், இந்த திட்டத்தில் சேர விண்ணப்பித்து காத்திருக்கின்றனர்.

இத்திட்டத்தில் புதிதாக விண்ணப்பித்துள்ள தகுதியான அனைவருக்கும் 3 மாதத்தில் ரூ.1,000 உரிமைத்தொகை வழங்கப்படும் என சட்டசபையில் துணை முதல்வர் உதயநிதி ஸ்டாலின் உறுதி தெரிவித்தார்.

இதையடுத்து, இதற்கான நடவடிக்கைள் மேற்கொள்ளப்பட்டு வருகிறது. மகளிர் உரிமைத்தொகை பெற, நேற்று முதல் தர்மபுரி மாவட்டத்தில் விண்ணப்பங்கள் வீடு, வீடாக விநியோகிக்கப்படுகிறது. ‘உங்களுடன் ஸ்டாலின்’ திட்டத்தின் கீழ் உள்ள தன்னார்வலர்கள் மூலம் விண்ணப்பம் வழங்கப்படுகிறது.

தர்மபுரி மாவட்டத்தில், தர்மபுரி ஒன்றியம், உங்கரானஅள்ளி ஊராட்சியில் ‘உங்களுடன் ஸ்டாலின்’ திட்டத்தின் கீழ் தன்னார்வலர்கள் மூலம் வீடு, வீடாக சென்று விண்ணப்பம் மற்றும் தகவல் கையேடு வழங்கும் பணிகளை மாவட்ட கலெக்டர் சதீஸ் நேற்று நேரில் பார்வையிட்டு, விண்ணப்பம் மற்றும் தகவல் கையேடுகளை வழங்கினார்.

இதுகுறித்து, மாவட்ட கலெக்டர் சதீஸ் கூறியதாவது: தமிழ்நாட்டிலுள்ள அனைத்து நகராட்சி, பேரூராட்சி, கிராம பஞ்சாயத்துகளில், 10 ஆயிரம் சிறப்பு முகாம்களை நடத்த ‘உங்களுடன் ஸ்டாலின்’ என்ற திட்டத்தினை அரசு அறிமுகப்படுத்தியுள்ளது. இதுகுறித்து வழிகாட்டும் நெறிமுறைகள் வெளியிடப்பட்டுள்ளது. அதன்படி, பொதுமக்களுக்கு தேவைப்படுவதாக கண்டறியப்பட்டுள்ள சேவைகள் வழங்கப்பட உள்ளது.

தமிழ்நாட்டில் உள்ள அனைத்து நகர்ப்புற மற்றும் ஊரகப்பகுதிகளில், உங்களுடன் ஸ்டாலின் திட்டம் ஜூலை 15ம் தேதி முதல்வரால் தொடங்கி வைக்கப்படுகிறது. இத்திட்டத்தின் கீழ், தர்மபுரி மாவட்டத்தில் நேற்று (8ம்தேதி) முதல், தன்னார்வலர்கள் மூலம் அரசுத்துறைகளின் சேவைகள் மற்றும் திட்டங்கள் குறித்து, அவர்கள் வசிக்கும் பகுதிகளுக்கே சென்று தகவல் கையேடுகள் மற்றும் விண்ணப்பங்கள் வழங்கும் பணிகள் நடைபெற்று வருகிறது. இப்பணிக்காக மாவட்டத்தில் சுமார் 1,382க்கும் மேற்பட்ட தன்னார்வலர்கள் ஈடுபடுத்தப்பட்டுள்ளனர்.

இந்த முகாம்களில் கலைஞர் மகளிர் உரிமைத் தொகை பெறத் தகுதியுள்ள, விடுபட்ட மகளிர் எவரேனும் இருப்பின் முகாம் நடைபெறும் நாளன்று முகாமிற்குச் சென்று விண்ணப்பத்தினை பெற்று பூர்த்தி செய்து உரிய ஆவணங்களுடன் தங்களது விண்ணப்பத்தினை அளிக்கலாம். கலைஞர் மகளிர் உரிமைத் தொகை திட்டத்திற்கான விண்ணப்பம், உங்களுடன் ஸ்டாலின் முகாம்களில் மட்டுமே வழங்கப்படும்.

மேலும், உங்களுடன் ஸ்டாலின் திட்டத்தின் கீழ், தர்மபுரி மாவட்டத்தில் அனைத்து நகராட்சி, பேரூராட்சி, கிராம பஞ்சாயத்துகளில் வரும் 15ம்தேதி முதல் வரும் அக்டோபர் 15ம்தேதி வரை 176 முகாம்கள் நடைபெற உள்ளது. இவ்வாறு கலெக்டர் தெரிவித்தார். அப்போது, தர்மபுரி தாசில்தார் சண்முகசுந்தரம் மற்றும் தன்னார்வலர்கள் உடனிருந்தனர்.

கூடலூர் : காட்டு யானைகள் ஊருக்குள் வருவதை தடுக்க அகழிகளை ஒட்டி மின் வேலி அமைக்க பொதுமக்கள் கோரிக்கை விடுத்துள்ளனர்.கூடலூர் சட்டமன்ற தொகுதிக்கு உட்பட்ட கிராமங்கள் விவசாய நிலங்கள் மற்றும் குடியிருப்பு பகுதிகளுக்குள் காட்டு யானைகளின் நடமாட்டம் அதிகரித்து வருகிறது.

யானைகள் வருவதை கண்காணித்து கிராம மக்களுக்கு தெரிவிக்கவும், யானைகளிடமிருந்து பாதுகாப்பு வழங்கவும் வனத்துறை சார்பில் பல்வேறு நவீன முயற்சிகள் மேற்கொள்ளப்பட்டு வருகின்றன.

யானைகள் வழக்கமாக வனப்பகுதியில் இருந்து ஊருக்குள் நுழையும் பகுதிகளில் கண்காணிப்பு கேமராக்கள் பொருத்தி அதன் மூலம் பொதுமக்களின் அலைபேசிகளுக்கு குருஞ் செய்தி அனுப்பும் முறை பின்பற்றப்பட்டு வருகிறது.

முதுமலை வன எல்லை தொரப்பள்ளி முதல் போஸ்பாரா மற்றும் செலுக்கடி பகுதியை ஒட்டி தேவர் சோலை வாச்சுக்கொல்லி வரை அகழிகள் அமைக்கப்பட்டுள்ளது. இந்த அகழிகளை யானைகள் பல இடங்களில் தூர்த்து அதன் வழியாக ஊருக்குள் வந்து விடுகிறது.

மேலும் மழைக்காலங்களில் மண்ணரிப்பு ஏற்பட்டு சில இடங்களில் அகழிகள் மண்மேடாகி விடுகின்றன.வன எல்லையில் அமைக்கப்படும் அகழிகளை தாண்டி காட்டு யானைகள் ஊருக்குள் வருவதை தடுக்க அகழிகளை ஒட்டி மின் வேலி அமைக்க வேண்டும் என பொது மக்கள் மற்றும் விவசாயிகளின் நீண்ட கால கோரிக்கையாக உள்ளது.

பல்வேறு காலகட்டங்களில் நடைபெற்ற சம்பவங்கள் மற்றும் போராட்டங்களை தொடர்ந்து விவசாயிகள், பொதுமக்கள் இதனை வனத்துறைக்கு வலியுறுத்தி வருகின்றனர்.

இது குறித்து விவசாயிகள் மற்றும் பொதுமக்கள் தரப்பில் கூறுகையில், ‘‘தமிழக பகுதியை ஒட்டிய கர்நாடக மாநிலம் பந்திப்பூர் புலிகள் காப்பக வனப்பகுதியை ஒட்டியுள்ள கடுவூர் வனப்பகுதியில் காட்டு யானைகள் ஊருக்குள் வருவதை தடுக்க வனத்துறையினர் சார்பில் அகழிகளை ஒட்டி மின் வேலி அமைத்து பாதுகாப்பு அளிக்கப்பட்டுள்ளது.

யானைகள் மின் வேலியை கடந்து வெளியேறாமல் இருக்கவும் வேலியை உடைத்து சேதப்படுத்தாமல் இருக்கவும் தொங்கும் மின் வேலி அமைக்கப்பட்டுள்ளது.இதனால் யானைகள் ஊருக்குள் வருவது முழுமையாக தடுக்கப்பட்டுள்ளது.

மேலும் மூன்று மாதங்களுக்கு ஒரு முறை அகழிகள் பராமரிக்கப்பட்டு வருகின்றன. இதன் காரணமாக யானைகள் அகழிகளை தாண்டி வெளியேறுவது இல்லை. இதனையே விவசாயிகளாகிய நாங்கள் தொடர்ந்து வனத்துறைக்கு வலியுறுத்தி வருகிறோம்.

யானைகள் ஊருக்குள் சுற்றுவதால் அந்த யானைகளுக்கும் மனிதர்களுக்கும் பாதுகாப்பற்ற நிலை உள்ளது. எனவே, வனத்துறையினர் இது போன்ற எளிய முறைகளை ஆய்வு செய்து கூடலூர் சுற்றுவட்ட பகுதிகளில் இதே நடைமுறையை பின்பற்றினால் யானைகள் ஊருக்குள் வருவதை வெகுவாக குறைத்து பொது மக்களுக்கு பாதுகாப்பு அளிக்கலாம்’’ என்றனர்.