kannappan

வால்பாறை : வால்பாறை பகுதியில் பருவமழை பெய்து வருகிறது. தேயிலை தோட்ட பகுதிகள், தேயிலை தோட்டங்களை ஒட்டிய வனங்கள் பசுமையாக மாறி விட்டன. இதனால் தேயிலை தோட்டங்களுக்கு இடையில் இருக்கும் பகுதியில் வனப்பகுதிக்கு உள்ளிருந்து வரும் காட்டெருமைகள் மேய்ச்சலில் ஈடுபடுவதுடன் உலா வந்த வண்ணம் உள்ளது.

இவ்வாறு மேய்ச்சலுக்கு வரும் காட்டெருமைகள் தேயிலை தோட்ட பகுதிகளுக்குள்ளேயே படுத்து ஒய்வெடுத்து வருகின்றன.இந்த சமயத்தில் தேயிலை தோட்டப்பகுதிக்கு தேயிலை இலை பறிக்கும் பணிக்காக தொழிலாளர்கள் செல்லும்போது தேயிலை செடிகளுக்கு மத்தியில் படுத்து ஒய்வெடுத்துக் கொண்டிருக்கும் காட்டெருமைகள் திடீரென குதித்து எழுந்து ஒட முயற்சிக்கும் அப்போது தொழிலாளர்கள் பயந்து ஒடி கீழே விழுந்து விடுவதற்கும், காட்டெருமைகளிடம் சிக்கி தாக்குதலுக்கும் ஆளாக வேண்டிய சூழ்நிலை ஏற்படுகிறது.

எனவே தோட்டத்தொழிலாளர்கள் கவனமாக பணியாற்ற வேண்டும் என வனத்துறை அதிகாரிகள் வலியுறுத்தி உள்ளனர். மேலும் நிர்வாகத்தினர் தேயிலைத்தோட்டங்களில் வன விலங்குகள் இல்லை என உறுதி செய்த பின்பு பணிக்கு தொழிலாளர்களை அனுப்ப வனத்துறை அதிகாரிகள் வலியுறுத்தி உள்ளனர்.

*விவசாயிகள் மகிழ்ச்சி

பொள்ளாச்சி : பொள்ளாச்சியை அடுத்த மேற்கு தொடர்ச்சி மலைப்பகுதியில், தென்மேற்கு பருவமழை தொடர்கிறது. இதனால் ஆழியார், பரம்பிக்குளம் அணைகளுக்கு தண்ணீர் வரத்து அதிகரித்ததால் விவசாயிகள் மகிழ்ச்சியடைந்தனர். பொள்ளாச்சியை அடுத்த மேற்கு தொடர்ச்சி மலைப்பகுதியில், இந்த ஆண்டு துவக்கத்தில் இருந்து பல மாதமாக மழை இல்லாததால், ஆழியார் மற்றும் பரம்பிக்குளம் அணைகளுக்கு தண்ணீர் வரத்து மிகவும் குறைவாக இருந்தது.

மே மாதத்தில் ஒரு சில வாரம் கோடை பருவமழை இருந்தாலும், அந்நேரத்தில் அணைகளுக்கு சொற்ப அளவில் தண்ணீர் வரத்து இருந்துள்ளது. பின்னர், மே மாதம் மூன்றாவது வாரத்தில் இருந்து மேற்கு தொடர்ச்சி மலைப்பகுதியில் பெய்த கன மழை காரணமாக அணைகளுக்கு தண்ணீர் வரத்து அதிகரிக்க துவங்கியது.

சில நாட்களுக்கு பிறகு கடந்த மாதம் துவக்கத்தில் இருந்து மீண்டும் பருவமழை பெய்ய துவங்கியது. இதனால், ஆழியார் மற்றும் பரம்பிக்குளம் அணைகள் நீர்மட்டம் விரைந்து உயர்ந்தது. தற்போது மேற்கு தொடர்ச்சி மலைப்பகுதியில் அவ்வப்போது மழை இருப்பதால், பிஏபி திட்ட அணைகளுக்கு தொடர்ந்து தண்ணீர் வரத்து உள்ளது. இதில், மொத்தம் 120 அடி கொண்ட ஆழியார் அணை நீர் மட்டம், தற்போது 116 அடியாக உள்ளது. வினாடிக்கு சுமார் 800 கன அடி தண்ணீர் வரத்து உள்ளது.

அதுபோல, டாப்சிலிப்பை அடுத்த மொத்தம் 72 அடி கொண்ட பரம்பிக்குளம் அணையின் நீர் மட்டம் 58.50 அடியாக உள்ளது. வினாடிக்கு 2600 கன அடி தண்ணீர் வரத்து உள்ளது. தொடர்ந்து சில வாரமாக, ஆழியார் மற்றும் பரம்பிக்குளம் அணைகளுக்கு தண்ணீர் வரத்து அதிகரிப்பால் விவசாயிகள் மகிழ்ச்சியடைந்தனர்.

பொள்ளாச்சி மற்றும் ஆழியார் அணைக்கு தண்ணீர் வரத்து தொடர்ந்து அதிகரிப்பால், நீர் மட்டம் விரைந்து உயர்வதுடன், விரைவில் முழு அடியை எட்டிவிடும் நிலையில் உள்ளதால், தொடர்ந்து ஆற்றங்கரையோர மக்களுக்கு வெள்ள அபாய எச்சரிக்கை விடுக்கப்பட்டுள்ளது என பொதுப்பணித்துறை அதிகாரிகள் தெரிவித்தனர்.

சமவெளி பகுதியில் தொடரும் மழை

பொள்ளாச்சி மற்றும்ஆனைமலை சுற்றுவட்டார கிராமங்களில், கடந்த மாதம் இரண்டாவது வாரத்தில் இருந்து தென்மேற்கு பருவமழை மீண்டும் பெய்ய துவங்கியது. இந்த மழை தற்போதும் அடிக்கடி பெய்கிறது. சிலநேரத்தில் பகல் மற்றும் இரவு என அடுத்தடுத்து மழை உள்ளது. சமவெளி பகுதியிலும் தென்மேற்கு பருவமழை தொடர்கிறது. இதனால், காய்கறி மற்றும் மானாவாரி பயிர் சாகுபடியில் ஈடுபடும் விவசாயிகள் மகிழ்ச்சியடைந்துள்ளனர்.

மூணாறு : மாட்டுப்பட்டி அணை பகுதியில் படையப்பா யானை சுற்றி வருகிறது.கேரள மாநிலம், மூணாறில் ‘படையப்பா’ என்று அழைக்கப்படும் காட்டுயானை மிகவும் பிரபலமானது. இந்த யானை எஸ்டேட் குடியிருப்பு பகுதிகளில் புகுந்து பயிர்களை சேதப்படுத்துவது, சாலையோரங்களில் இறங்கி வாகனங்களை விரட்டுவது என அட்டகாசம் நாளுக்கு நாள் அதிகரித்து வருகிறது.

கடந்த ஒரு வாரமாக தலையாறு எஸ்டேட் பகுதிகளில் முகாமிட்டிருந்த படையப்பா யானை, தற்போது மாட்டுப்பட்டி அணை பகுதியில் நடமாடி வருகிறது. நேற்று மாட்டுப்பட்டி அணை அருகே படையப்பா யானை தண்ணீர் பருக வந்துள்ளது.

அப்போது, அணையில் படகு சவாரி செய்து கொண்டிருந்த சுற்றுலாப்பயணிகள் யானை தண்ணீர் குடிக்கும் காட்சியை கண்டு ரசித்தனர். மேலும், புகைப்படம், வீடியோவாக எடுத்து சுற்றுலா பயணிகள் மகிழ்ந்தனர்.

*பயணிகள் எதிர்பார்ப்பு

மானாமதுரை : திருவாரூரில் இருந்து காரைக்குடி வரை இயக்கப்படும் பயணிகள் ரயிலை விருதுநகர் வரை நீட்டிக்க வேண்டும் என்று பயணிகள் கோரிக்கை விடுத்துள்ளனர்.திருவாரூரில் இருந்து தினமும் காலை 6:25 மணிக்கு புறப்படும் ரயில் (எண்:06197) மாங்குடி, திருநெல்லிக்காவல், திருத்துறைப்பூண்டி, முத்துப்பேட்டை, அதிராம்பட்டினம், பட்டுக்கோட்டை, பேராவூரணி, அறந்தாங்கி, கண்டமனூர் வழியாக காலை 9:35 மணிக்கு காரைக்குடி வந்து சேருகிறது. மறு மார்க்கத்தில் இந்த ரயில் காரைக்குடியில் மாலை 6 மணிக்கு புறப்பட்டு இரவு 9:20 மணிக்கு திருவாரூர் சென்றடைகிறது.

காலை 9.35 மணிக்கு வரும் ரயில் நடைமேடையில் மாலை 6 மணி வரை நிறுத்தி வைக்கப்படுகிறது. இந்த ரயிலில் திருவாரூரில் இருந்து வரும் பயணிகள் சிவகங்கை, மானாமதுரை, விருதுநகர் செல்வதற்கு காரைக்குடி ரயில்வே நிலையத்தில் இருந்து ஆட்டோ, டாக்சி பிடித்து புதிய பஸ் ஸ்டாண்ட் சென்று அங்கிருந்து மதுரை வழியாக பஸ்களில் தங்கள் ஊர்களுக்கு செல்கின்றனர். இந்த ரயிலை விருதுநகர் வரை இயக்கினால் சிவகங்கை, விருதுநகர் மாவட்ட பயணிகளுக்கு பயனுள்ளதாக இருக்கும்.

ரயில் பயணிகள் சங்க நிர்வாகி கங்காதரன் கூறுகையில், திருவாரூரில் காலை 6:25 மணிக்கு புறப்படும் ரயில் காலை 9:35 மணிக்கு காரைக்குடி வந்து அங்கிருந்து மதியம் 12 மணிக்குள் விருதுநகர் வந்து, மறு மார்க்கத்தில் மதியம் 3 மணிக்கு விருதுநகரில் இருந்து புறப்பட்டு மாலை 6 மணிக்கு காரைக்குடி சென்று, பிறகு இரவு 9:20 மணிக்கு திருவாரூர் சென்றடையும் வகையில் இயக்க வேண்டும் என பயணிகள் எதிர்பார்க்கின்றனர்.
இதுகுறித்து டெல்டா மாவட்ட, தென் மாவட்ட எம்.பி.க்கள், எம்.எல்.ஏ.க்கள் மத்திய, மாநில அரசுகளை வலியுறுத்த வேண்டும் என்றார்.

திருச்சி, மதுரை ரயில்வே கோட்ட அதிகாரிகள் பகல் 12 மணி முதல் 3 மணி வரை காரிடார் பிளாக் என்ற விதியை காரணமாக வைத்து மதியம் 1 மணிக்கு மானாமதுரை சென்ற மன்னார்குடி- மானாமதுரை டெமு ரயிலை நிறுத்தினர். தற்போது திருவாரூரில் இருந்து காரைக்குடி வரும் இந்த ரயிலை 9.30 மணிக்கு காரைக்குடியில் இருந்து இயக்கினால் காரிடார் பிளாக் எனும் நிர்வாக விதிகளுக்கு எதிராக இருக்காது என்பதால் இந்த ரயிலை விருதுநகர் வரை நீட்டிக்கலாம் என்றார்.

*பொதுமக்கள், விவசாயிகள் மகிழ்ச்சி

ஸ்ரீவில்லிபுத்தூர் : ஸ்ரீவில்லிபுத்தூரில் கடந்த மூன்று வருடங்களாக பருவ நிலைகள் மாறினாலும் தொடர்ச்சியாக குளங்கள் மற்றும் கண்மாய்கள் வற்றாமல் உள்ளது. இதனால் பொதுமக்கள், விவசாயிகள் மகிழ்ச்சி அடைந்துள்ளனர்.
பருவநிலை மாற்றங்கள் காரணமாக கொளுத்தும் வெயில், கடுமையான மழை, கடும் குளிர் என காலநிலை மாறி மாறி வருகிறது.

கோடை காலத்தில் மழையும் மழைக்காலத்தில் வெயிலும் கொளுத்துகிறது. இந்த நிலையில் ஸ்ரீவில்லிபுத்தூர் நகரில் முன்னதாகவே மழை பெய்தாலும் இரண்டு, மூன்று மாதங்கள் மழை தள்ளி பெய்தாலும் கண்மாய்கள் மற்றும் குளங்களில் கடந்த மூன்று வருட காலமாக தண்ணீர் வற்றாமல் இருக்கிறது. இதனால் பொதுமக்கள், விவசாயிகள் மகிழ்ச்சியடைந்துள்ளனர்.

இது குறித்து ஸ்ரீவில்லிபுத்தூர் நகரை சேர்ந்த குட்டி என்பவர் கூறும்போது, பல ஆண்டுகளாக கோடை காலங்களில் குளங்கள் முழுமையாக வறண்டு போய் இருந்த காலம் உண்டு. ஆனால் தொடர்ச்சியாக மூன்றாண்டுகளாக கொளுத்தும் கோடை காலத்திலும் தண்ணீர் வற்றாமல் உள்ளதால் ஸ்ரீவில்லிபுத்தூர் நகர் மக்கள் மிகுந்த மகிழ்ச்சி அடைந்துள்ளனர்.

ஸ்ரீவில்லிபுத்தூர் மடவார் வளாகம் வைத்தியநாத சுவாமி கோவிலில் பழைய மற்றும் புதிய குளங்கள், விருதுநகர் மாவட்டத்திலேயே மிகப்பெரிய கண்மாயான வில்லிபுத்தூர் பெரியகுளம் கண்மாய், ஸ்ரீவில்லிபுத்தூர் திருவண்ணாமலை சீனிவாச பெருமாள் சன்னதி கோயில் குளம், திருவில்லிபுத்தூர் திரு முக்குளம் ஆகியவை வற்றாமல் காட்சியளிக்கிறது. இதிலும் மடவார் வளாகம் வைத்தியநாத சுவாமி கோவிலின் புதிய குளம் மற்றும் பழைய குளம் முழுமையான கொள்ளளவுடன் உள்ளது.

இதனால் பெரியகுளம் கண்மாயை நம்பி விவசாயம் செய்து வரும் விவசாயிகள் மிகுந்த மகிழ்ச்சி அடைந்துள்ளனர். இதே போல் தொடர்ச்சியாக தண்ணீர் வற்றாமல் தேங்கி இருப்பதால் நிலத்தடி நீரும் உயரம் வாய்ப்புள்ளது. எனவே பொதுமக்களும் மகிழ்ச்சி அடைந்துள்ளனர் என்று தெரிவித்தார்.

*தெற்கு ரயில்வே உத்தரவு; சீசன் டிக்கெட் பயணிகள் அதிர்ச்சி
*ராமநாதபுரம் மாவட்டத்திற்கு வேலைக்கு செல்வோருக்கு சிக்கல்

மானாமதுரை : தெற்கு ரயில்வேயின் கீழ் இயங்கும் ராமேஸ்வரம்-சென்னை போட் மெயில் எக்ஸ்பிரஸ் ரயிலில் டி-ரிசர்வ் வசதி ரத்து செய்யப்பட்டுள்ளதற்கு சீசன் டிக்கெட் பயணிகள் உள்ளிட்ட பல்வேறு தரப்பினரும் எதிர்ப்பு தெரிவித்துள்ளனர்.

இந்திய ரயில்வேயில் ரிசர்வ்டு டிக்கெட், அன் ரிசர்வ்டு டிக்கெட் தவிர, டி-ரிசர்வ்டு டிக்கெட் என்ற மூன்றாவதாக ஒரு வசதி உள்ளது. இது பெரும்பாலானவர்களுக்கு தெரியாது. இந்த முறையை பயன்படுத்தி முன்பதிவில்லாத டிக்கெட்டை வைத்து முன்பதிவுள்ள ஸ்லீப்பர் கோச்சுகளில் பயணம் செய்ய முடியும்.

இது, ஒரு குறிப்பிட்ட தூரத்திற்கு முன்பதிவு செய்யாமல் ஸ்லீப்பர் வகுப்பு பெட்டியில் பயணம் செய்வதற்கான டிக்கெட் ஆகும். இதன் மூலம், குறைந்த தூரம் பயணம் செய்பவர்கள், இருக்கை முன்பதிவு செய்யாமல் பயணிக்கலாம். இந்த டிக்கெட்டின் முக்கிய நோக்கம் என்னவென்றால், முழு பயணத்திற்கும் ஸ்லீப்பர் டிக்கெட் தேவையில்லை. ஸ்லீப்பர் வகுப்பில் பயணிக்க விரும்பும் குறுகிய தூர பயணிகளுக்காக இந்த வசதி அறிமுகப்படுத்தப்பட்டது.

கொரோனா காலத்திற்கு பின் இந்த வசதியை இந்திய ரயில்வே அனைத்து மண்டலங்களிலும் அறிவித்தது. இந்த டி-ரிசர்வ் டிக்கெட்டுகள் எல்லா ரயில்களிலும் கிடைக்காது. தெற்கு ரயில்வேயில் 32 எக்ஸ்பிரஸ் ரயில்களில் தலா 2 பெட்டிகள் இந்த டி-ரிசர்வ்டு கோச் என ஒதுக்கப்பட்டது.

இதன் மூலம் குறிப்பிட்ட பீக் அவர்ஸ் நேரங்களில், இந்த எக்ஸ்பிரஸ் ரயில்களில் டி-ரிசர்வ் டிக்கெட் எடுத்து முன்பதிவு ஸ்லீப்பர் பெட்டிகளில் பயணம் செய்ய முடியும். மேலும் சீசன் டிக்கெட் வைத்திருப்பவர்களும் இந்த பெட்டிகளில் பயணிக்கலாம்.

காரைக்குடி, சிவகங்கை, மானாமதுரை, பரமக்குடியை சேர்ந்த அரசு ஊழியர்கள், தனியார் நிறுவன பணியாளர்கள், பள்ளி, கல்லூரி மாணவர்கள் என 300க்கும் மேற்பட்ட சீசன் டிக்கெட் பயணிகள் தினமும் ராமேஸ்வரம்-சென்னை போட் மெயில் எக்ஸ்பிரஸ் ரயிலில் ராமநாதபுரம், மண்டபம், ராமேஸ்வரத்திற்கு ஒன்றிய, மாநில அரசு பணிகளுக்கு தினமும் சென்று கொண்டிருந்தனர். இந்நிலையில் தெற்கு ரயில்வே இந்த டி-ரிசர்வ் கோச் வசதியை வரும் ஜூலை 2ம் தேதி முதல் போட்மெயிலில் ரத்து செய்ய உள்ளதாக அறிவித்திருப்பதற்கு சீசன் டிக்கெட் பயணிகள் உள்ளிட்ட பல்வேறு தரப்பினரும் எதிர்ப்பு ெதரிவித்துள்ளனர்.

ஒன்றிய ரயில்வே அமைச்சர் உரிய நடவடிக்கை எடுப்பாரா?

பயணிகள் சங்க நிர்வாக கங்காதரன் கூறுகையில், தெற்கு ரயில்வே ராமேஸ்வரம்-சென்னை போட்மெயில் எக்ஸ்பிரஸ் ரயிலில் கடந்த 2021ம் ஆண்டு முதல் எஸ்11, எஸ்12யை டி-ரிசர்வ் கோச்சாக அறிவித்து முக்கிய ரயில் நிலையங்களில் டி-ரிசர்வ் டிக்கெட் ெபறும் வசதியை அறிவித்தது.

ராமேஸ்வரம் புகழ்பெற்ற சுற்றுலாத்தலம் என்பதால் முன்பதிவு பெட்டிகள் அனைத்தும் நிரம்பிவிடும். முன்பதிவு டிக்கெட் கிடைக்காத பயணிகள் டி-ரிசர்வ் டிக்கெட் பெற்று ராமேஸ்வரத்தில் இருந்து காரைக்குடி வரை முன்பதிவு பெட்டிகளில் பயணம் செய்து வந்தனர்.

ராமநாதபுரம் மாவட்ட அரசு அலுவலங்களில் வேலை செய்து வரும் பரமக்குடி, மானாமதுரை, சிவகங்கை, காரைக்குடியை சேர்ந்த சீசன் டிக்கெட் பயணிகளுக்கு இந்த டி-ரிசர்வ் பெட்டிகளில் பயணம் செய்வது வசதியாக இருந்தது. இந்நிலையில் இந்த வசதியை தெற்கு ரயில்வே ரத்து செய்திருப்பது பயணிகளிடையே கடும் அதிருப்தியை ஏற்படுத்தியுள்ளது. ஒன்றிய ரயில்வே அமைச்சர் உரிய நடவடிக்கை எடுக்க வேண்டும், என்றார்.

மண்டபம் : மண்டபத்தில் மாணவர்களின் பாதுகாப்பு கருதி, ரயில்வே நடைமேம்பாலம் அமைக்க நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.மண்டபம் பேரூராட்சிக்கு உட்பட்ட கிராமப் பகுதியான ஓடைத்தோப்பு, மீனவர்காலனி, ஐ.என்.பி காலனி, தோணித்துறை, தோப்புக்காடு உள்ளிட்ட கிராமங்களில் சுமார் 300க்கும் மேற்பட்ட குடும்பங்கள் வசித்து வருகின்றன. இந்த பகுதியில் வசித்து வரும் பொதுமக்களில் பெரும்பாலானோர் மீன்பிடித் தொழிலில் ஈடுபட்டு வருகின்றனர்.

இப்பகுதிகளைச் சேர்ந்த மாணவர்கள், காந்திநகர் பகுதியில் உள்ள அரசு நடுநிலைப் பள்ளியில் பயின்று வருகின்றனர். இந்நிலையில் மண்டபம் முதல் ராமேஸ்வரம் வரை செல்லும் ரயில்வே தண்டவாளத்தை மாணவர்கள் ஆபத்தான முறையில் கடந்து, இந்த பள்ளிக்கு சென்று வருகின்றனர். ராமேஸ்வரத்திற்கு ரயில் போக்குவரத்து துவங்கப்பட்டதை அடுத்து, அதிகமான ரயில்கள் இந்த மார்க்கத்தில் சென்று வருகின்றன. மேலும் ரயில்வே நிர்வாகம், மண்டபம் ரயில்வே நிலையத்தை விரிவாக்கம் செய்யும் பணிகளையும் மேற்கொண்டு வருகிறது. மேலும் இப்பகுதியில் பாதுகாப்பு கருதி, சுற்றுச் சுவர் எடுத்து அடைத்து வருகிறது.

இதனால் இந்த பள்ளிக்கு செல்லும் மாணவர்கள், மண்டபம் நகர் பகுதி வழியாக, ராமேஸ்வரம் செல்லும் தேசிய நெடுஞ்சாலை வழியாக சென்று மீண்டும் காந்தி நகரில் உள்ள பள்ளிக்கு வரவேண்டும். இதற்காக மாணவர்கள், சுமார் பத்து கிலோ மீட்டர் தொலை தூரத்தை சுற்றி பள்ளிக்கு செல்லும் நிலை ஏற்பட்டுள்ளது. ஆகையால், இக்கிராம பகுதிகளைச் சேர்ந்த மாணவர்கள் பாதுகாப்பாக சென்று வர, ரயில்வே நடைமேடை மேம்பாலம் அமைக்க நடவடிக்கை எடுக்க வேண்டும் என பெற்றோர் மற்றும் சமூக ஆர்வலர்கள் கோரிக்கை விடுத்துள்ளனர்.

இது குறித்து இப்பகுதிகளைச் சேர்ந்த பொதுமக்கள் கூறுகையில், ஐந்து கிராமங்களைச் சேர்ந்த மாணவர்கள், பாதுகாப்புடன் பள்ளிக்கு சென்று வர நடைமேம்பாலம் அமைக்க நடவடிக்கை எடுக்க வேண்டும் அல்லது ரயில்வே கேட் அமைத்து வழித்தடத்தை ஏற்படுத்த வேண்டும். இது தொடர்பாக ஆய்வு செய்து மாற்று பாதைகள் ஏற்படுத்திக் கொடுப்பதற்கு மாவட்ட நிர்வாகம் நடவடிக்கை எடுக்க வேண்டும் என்றனர்.