Sunday, April 21, 2024
Home » ஆத்தூர் சீரக சம்பாவில் அசத்தல் பிரியாணி…!

ஆத்தூர் சீரக சம்பாவில் அசத்தல் பிரியாணி…!

by Lavanya

அரிசியைப் போலவே சுவையும் பாரம்பரியமானது…

சென்னையில் பிரியாணி என்றால் அது பாசுமதி அரிசிதான். பாசுமதி அரிசியில் பிரியாணி என்பது அரபுக் கலாச்சாரம். பாசுமதி அரிசி தமிழகத்தில் வந்த பிறகு, அதில் பிரியாணி செய்யத் தொடங்கினார்கள். நமது ஊரில் பிரியாணிக்கு பலநூறு ஆண்டு வரலாறு இருக்கிறது. அந்த வரலாற்றில் சீரகசம்பா அரிசியில்தான் பிரியாணி செய்திருக்கிறார்கள். உண்மையில், தமிழகத்தில் தென் மாவட்டங்களில் பிரியாணி என்றால் அது சீரகசம்பா பிரியாணிதான். இந்த சீரகசம்பா பிரியாணியை சென்னை மக்களுக்கு ருசி மாறாமல் கொடுத்து வரும் உணவகம்தான், சென்னை திருமங்கலத்தில் இருந்து முகப்பேர் செல்லும் சாலையில் வேவ்ஸ் சிக்னலுக்கு அருகில் இருக்கும் ‘தவுசுக்குட்டி பிரியாணி’. சமீபத்தில் பயங்கர பிசியான இந்த சீரக சம்பா பிரியாணி கடைக்கு ஃபுட்டீஸ்கள் வரிசையில் நின்று சாப்பிட்டுச் செல்கின்றனர். எப்படித்தான் இவ்வளவு சுவையான பிரியாணியை கொடுக்க முடியுது என கேட்க, சிரித்தவாறே பேச்சைத் தொடங்கினார், உணவகத்தின் உரிமையாளர் தினேஷ்.‘‘எனக்கு சொந்த ஊரு திண்டுக்கல்தான். படிச்சது இஞ்சினியரிங்கா இருந்தாலும் திண்டுக்கல் ஸ்டைல்ல ஒரு பிரியாணி கடையை சென்னையில் தொடங்கணும்னு ரொம்ப இஷ்டம்.

அந்த கனவு தவசுக்குட்டி பிரியாணி மூலம் எனக்கு இன்றைக்கு நிறைவேறி இருக்கு. திண்டுக்கல் ஸ்டைல் பிரியாணிக்கு இந்தப் பகுதியில் நல்ல வரவேற்பு கிடைக்கும் என்று எனக்குத் தெரியும். ஆனால் சென்னை மக்கள் இந்த அளவுக்கு இந்த பிரியாணியை கொண்டாடுவாங்கன்னு நான் எதிர்பார்க்கவே இல்லை. இது முழுக்க முழுக்க திண்டுக்கல் ஸ்டைல் பிரியாணிதான். தென்மாவட்டங்களில் பெரும்பாலும் எல்லா விஷேசத்திலும் திண்டுக்கல் ஸ்டைல் சீரக சம்பா பிரியாணி தனக்கான இடத்தை பிடித்து இருக்கும். திண்டுக்கல் பிரியாணியோட சுவைக்கு காரணமாக இருக்குற அடிப்படை விஷயங்கள்னு பார்த்தா, முதல்ல இந்தப்பகுதியில விளையுற சீரக சம்பா அரிசியை பத்திதான் சொல்லணும். சென்னை, வேலூர், பெங்களூர் உள்ளிட்ட பிற பகுதிகள்ல பிரியாணிக்கு நீளமான பாசுமதி அரிசி பயன்படுத்துவாங்க. ஆனா எங்கள் தவசுக்குட்டிபிரியாணியில் இயற்கை முறையில் விளைந்த சீரக சம்பா அரிசியை மட்டும்தான் பயன்படுத்துகிறோம்.திண்டுக்கல்லை ஒட்டிய ஆத்தூர் வட்டாரத்துல விளையும் சீரக சம்பா அரிசி தான் இந்த பிரியாணியின் சுவையின் அடித்தளமே. பழனி மலை, சிறுமலை என இரண்டு மலைத்தொடர்களுக்கு நடுவே அமைந்திருக்கும் திண்டுக்கல்லுக்கு மலைகளிலிருந்து வரும் மழை நீரே நீராதாரமா இருக்கு. இந்த தண்ணீரில் விளையுற சீரக சம்பா அரிசிக்கு ஒரு தனி ருசியே இருக்கும். இந்த அரிசியில் பிரியாணி செய்வதால் அதன் ருசி சாப்புடுறவங்கள சுண்டி இழுக்கும்.

பெரும்பாலும் மற்ற உணவகங்களில் வெள்ளாட்டுக் கறி என்று சொல்லி செம்மறி ஆட்டை மட்டுமே பயன்படுத்துவார்கள். நாங்கள் நுனி புல்லாக மேய்ந்த வெள்ளாடுகளைதான் எங்கள் பிரியாணியில் பயன்படுத்துறோம். கறியில் இருந்து இறங்கக் கூடிய சாறு சீரக சம்பா அரிசியோட சேர்ந்து தரமான ருசியை நமக்குக் கொடுக்கும்.அதேபோல இந்த பிரியாணிக்கு பயன்படுத்தப்படுற மசாலாக்களும் இதற்கு ஒரு காரணம். பொதுவா பிரியாணி நல்லா கலரா தெரியணும்னு செயற்கை பொடிகள் பயன்படுத்துவாங்க. இதுல அந்தமாதிரி எதுவும் இல்லாம இயற்கையான பொருட்களை கொண்டு மட்டுமே இந்த பிரியாணி தயாரிக்கிறோம். இதில் சேர்க்கக்கூடிய மசாலாக்கள் அனைத்தையும் நாங்க ஆட்டுக்கல்லில் அரைத்து மட்டுமே பயன்படுத்துகிறோம். மசாலாவை மிக்ஸி ஜாரில் போட்டு அரைச்சா ரொம்பவும் மையா அரைபட்டுவிடும். அதனால் மசாலாவின் ருசி கறியிலும், அரிசியிலும் இறங்காது. மசாலா கொரகொரப்பாஇருக்குறதால ஒவ்வொரு வாய் சோறு போடும்போதும் பிரியாணியை புதியதாய் சாப்பிடுவது போலவே இருக்கும்.அதேபோல் எல்லா இடங்களிலும் குறிப்பிட்ட காலமாகவே எந்த உணவு தயார் செய்றதுன்னாலும் அதற்கு கேஸ் ஸ்டவ் மட்டும்தான் பயன்படுத்துறாங்க. இந்த அடுப்பில் கறி எப்படி பஞ்சு போல வேகும். அதற்கு குக்கரில் கறியை தனியா வேகவைத்து அரிசியோடு சேர்க்கிறார்கள். இப்படி ஒரு உணவை தயாரிக்கும் போது கறியில் ஒரு ருசி, அரிசியில் ஒரு ருசியும்தான் இருக்கும். அது எப்படி பிரியாணி ஆக முடியும். பிரியாணி என்றாலே மசாலா, ஆட்டுக்கறி, சீரக சம்பா அரிசின்னு எல்லாமே ஒன்னோடு ஒன்று சேர்ந்து வேகணும். அப்போதான் பிரியாணியோட முழு ருசியும் நமக்குக் கிடைக்கும். ஆகவே நாங்கள் விறகு அடுப்பில் மட்டுமே பிரியாணியை தயார் செய்கிறோம்.

அதனால் தம் போடும் போது அரிசி ஒட்டிக்கொள்ளாமல் தனித் தனியே பிரிந்து வரும். ஆட்டுக்கறியை எலும்புடன் எடுக்கும் போதே கறி தனியாக எலும்பு தனியாக பிரிந்து வந்துவிடும். இதற்கு முக்கிய காரணம் விறகு அடுப்பு மட்டும்தான். அதே மாதிரி பிரியாணிக்கான தயிர் பச்சடி, பிரியாணி தயாரிக்க பயன்படுத்தப்படும் நெய்னு எல்லாமே நாட்டு மாட்டுப் பாலில் இருந்து எடுக்குறதுதான். ஆட்டுக்கறி பிரியாணி மட்டுமில்லாமல் கோழிக்கறி பிரியாணியும் திண்டுக்கல் ஸ்டைலில் தயார் செய்து வாடிக்கையாளர்களுக்கு கொடுக்கிறோம். இதற்கும் விறகு அடுப்பு மட்டும்தான். இதுபோக சிக்கன் 65வும் கொடுத்துட்டு இருக்கோம். அனைத்து டிஸ்ஸிற்கும் தேவையான மசாலாவை நானே தயார் செய்து சமையல்காரர்களுக்கு கொடுக்கிறேன். இதனால் பிரியாணியில் டேஸ்ட்டில் எந்தவொரு மாற்றமும் இருக்காது. அனைத்து உணவுகளையும் முகப்பேறில் உள்ள எங்கள் கிளவுடு கிச்சனில் தயார் செய்கிறோம். அதிக நேரம் வேக வைத்தால் மசாலா கருகிவிடும், அதேபோலதான் கறியும். அரிசிய போட்டு ரொம்ப நேரம் வேகவிட்டால் சாப்பாடு கொழைந்துவிடும். மசாலா வேக வைக்கிறது, கறியை வேக வைக்கிறது, கறி வெந்ததும் அரிசியை போட்டு கொதிக்கவிட்டு தம் போட்டு கீழ இறக்கற வரைக்கும் எல்லாமே டைமிங்தான். நண்பகல் 12 மணிக்கு தொடங்கும் உணவகம் இரவு 8 மணி வரை செயல்படும். மதியம் 2 மணிக்கெல்லாம் பிரியாணி முடிந்துவிடும். சீரக சம்பா பிரியாணி என்பதால் தென்மாவட்டங்களில் இருந்து வந்து இங்கு வேலை செய்பவர்கள் முதல் ஆளாக கடைக்கு வந்துவிடுவார்கள். பாசுமதி அரிசியில் ரசாயன பொருட்கள் சேர்த்து சாப்பிட்டு அழுத்துப் போனவர்கள் எங்களது உணவகத்தை தேடி வருகின்றனர். உணவகம் திறந்ததுமே கூட்டம் கட்டுக்கடங்காமல் இருக்கும். இதனால் உணவுகளை பார்சல் மட்டுமே செய்து கொடுக்கிறோம். ஆன்லைன் டெலிவரியும் செய்து கொண்டு இருக்கிறோம். கிட்டதட்ட ஒரு நாளைக்கு ஆயிரம் பார்சல் வரை விற்பனையாகிறது. விடுமுறை நாட்களில் கூட்டம் இன்னும் அதிகமாக இருக்கும்” என்கிறார் தினேஷ்.

– சுரேந்திரன் ராமமூர்த்தி

 

You may also like

Leave a Comment

20 + 5 =

Dinakaran is a Tamil daily newspaper distributed in India. As of March 2010, Dinakaran is the largest Tamil daily newspaper in terms of net paid circulation, which was 1,235,220. In terms of total readership, which was 11.05 Lakhs as of May 2017, it is the second largest. Dinakaran is published from 12 centers in India namely Delhi, Mumbai, Chennai, Bengaluru, Madurai, Coimbatore, Trichy, Salem, Nagercoil, Vellore, Nellai and Pondicherry.

Address

@2024-2025 – Designed and Developed by Sortd.Mobi