கம்பம் : தென்மேற்கு பருவமழை தீவிரமடைந்ததால் இரு மாதங்களுக்கு பின் சுருளி அருவியில் தண்ணீர் ஜோராகக் கொட்டுகிறது. தேனி மாவட்டத்திலுள்ள சுற்றுலாத்தலங்களில் முக்கியமானது சுருளி அருவி. மழைக்காலங்களில் ஹைவேவிஸ் மலைப்பகுதியில் உள்ள தூவானம் அணை, ஈத்தக்காடு, அரிசிப்பாறை பகுதியிலிருந்து இதற்கு தண்ணீர் வரத்து இருக்கும்.

மழை இல்லாததாலும், பராமரிப்புப் பணிக்காக தூவானம் அணை தண்ணீர் முற்றிலும் நிறுத்தப்பட்டதாலும், சுருளி அருவிக்கு முற்றிலும் நீர்வரத்து நின்று போனது. இதனால் அருவிக்கு குளிக்க வந்த சுற்றுலா பயணிகள் ஏமாற்றத்துடன் திரும்பி சென்றனர். தற்போது ஹைவேவிஸ் மலை பகுதியில் தென்மேற்குப் பருவமழை பெய்து வருவதால் சுருளி அருவிக்கு தண்ணீர் வர தொடங்கியது. இதனால் இரண்டு மாதங்களுக்கு பின் மீண்டும் சுருளி அருவியில் தண்ணீர் ஜோராகக் கொட்டுகிறது. சுற்றுலா பயணிகளும் அதிகளவில் வர தொடங்கி உள்ளனர்.