டாக்கா: வங்கதேசத்தில் உள்ள கன்டெய்னர் டிப்போவில் ஏற்பட்ட தீ விபத்தில் 21 பேர் பலியான நிலையில், 450க்கும் மேற்பட்டோர் காயமடைந்துள்ளனர். வங்கதேசம் நாட்டின் சிட்டகாங்க் அடுத்த கடம்ராசூல் பகுதியில் பிஎம் கன்டெய்னர் டிப்போ உள்ளது. இந்த டிப்போவில் நேற்றிவு திடீரென தீ விபத்து ஏற்பட்டது. அப்போது பணியாற்றிக் கொண்டிருந்த தொழிலாளர்கள் உட்பட 21 பேர் தீயில் கருகி பலியாகினர். அடுத்தடுத்த கன்டெய்னர்கள் வெடித்து சிதறியதால், 450க்கும் மேற்பட்டோர் படுகாயமடைந்தனர்.

தகவலறிந்த காவல்துறை மற்றும் தீயணைப்பு துறையினர் மீட்புப்பணிகளில் தீவிரமாக ஈடுபட்டு வருகின்றனர். இதுகுறித்து ரெட் கிரசென்ட் யூத் சிட்டகாங்கின் சுகாதார மற்றும் சேவைத் துறையின் தலைவர் இஸ்தாகுல் இஸ்லாம் கூறுகையில், ‘தீ விபத்து சம்பவத்தில் 21 பேர் பலியாகி உள்ளனர். 450க்கும் மேற்பட்டோர் காயமடைந்துள்ளனர், குறைந்தது 350 பேர் மருத்துவமனையில் அனுமதிக்கப்பட்டுள்ளனர். இறந்தவர்களின் மொத்த எண்ணிக்கை தோராயமாக கணக்கிடப்பட்டுள்ளது. விபத்துக்கான காரணம் குறித்து விசாரிக்கப்பட்டு வருகிறது’ என்றார்.