பெரம்பலூர்: பெரம்பலூர் மாவட்டம் வேப்பந்தட்டை தாலுகா அனுக்கூர் கிராமத்தை சேர்ந்தவர் திலீப்குமார். இவரது மனைவி செல்வராணி(36). இவர்களுக்கு 1 மகள், 1 மகன் உள்ளனர். இந்தநிலையில் செல்வராணி மூன்றாவது முறையாக கர்ப்பமானார். நிறைமாத கர்ப்பிணியான செல்வராணிக்கு கடந்த 4ம் தேதி இரவு வீட்டில் இருக்கும்போது பிரசவ வலி ஏற்பட்டது. சிறிது நேரத்தில் அக்கம்பக்கத்து பெண்கள் உதவியுடன் வீட்டிலேயே பெண் குழந்தை பிறந்தது. பின்னர் திடீரென செல்வராணிக்கு உடல்நலக்குறைவு ஏற்பட்டது. இதனால் உறவினர்கள் அவரையும், குழந்தையையும் சிகிச்சைக்காக ஆம்புலன்ஸ் மூலம் பெரம்பலூர் அரசு தலைமை மருத்துவமனைக்கு கொண்டு சென்றனர்.

ஆனால் செல்லும் வழியிலேயே செல்வராணியும், குழந்தையும் அடுத்தடுத்து பரிதாபமாக இறந்தனர். இதையடுத்து உறவினர்கள் இருவரது உடலையும் வீட்டிற்குக் கொண்டு வந்தனர். தகவலறிந்த மங்களமேடு போலீசார் அனுக்கூர் கிராமத்திற்குச் சென்று செல்வராணி மற்றம் குழந்தையின் உடல்களை கைப்பற்றி பிரேத பரிசோதனைக்காக பெரம்பலூர் அரசு மருத்துவமனைக்கு அனுப்பி வைத்தனர். மேலும் இதுகுறித்து வழக்குப்பதிவு செய்து, விசாரணை நடத்தி வருகின்றனர்.