சென்னை: பத்திரிகையாளர் நல வாரியம் அமைத்து தமிழக அரசு அரசாணை வெளியிட்டுள்ளது. இதுகுறித்து தமிழக அரசு வெளியிட்ட அரசாணை: 2021-22ம் ஆண்டிற்கான சட்டமன்றப் பேரவை கூட்டத்தொடரில், செய்தித்துறை அமைச்சர் செய்தி மற்றும் விளம்பரம் தொடர்பான மானியக்கோரிக்கையின் மீதான அறிவிப்புகளில், தமிழ்நாட்டில் முதன்முறையாக உழைக்கும் பத்திரிகையாளர்களை முன்களப் பணியாளர்களாக முதலமைச்சர் அறிவித்துப் பெருமை சேர்த்துள்ளார்.

அதனடிப்படையில் உழைக்கும் பத்திரிகையாளர்களுக்கு வழங்கப்பட்டு வரும் அனைத்துத் திட்டங்களையும் ஒருங்கிணைத்துச் செவ்வனே செயல்படுத்துவதோடு நலவாரிய உதவித் தொகைகள் மற்றும் நலத் திட்ட உதவிகள் அளித்திடும் வகையில் ‘பத்திரிகையாளர் நல வாரியம் அமைக்கப்படும்’ என்ற அறிவிப்பை வெளியிட்டார். அதனை செயல்படுத்தும் விதமாக, உழைக்கும் பத்திரிகையாளர்களுக்கு வழங்கப்பட்டு வரும் அனைத்துத் திட்டங்களையும் ஒருங்கிணைத்துச் செவ்வனே செயல்படுத்துவதோடு, நலவாரிய உதவித் தொகைகள் மற்றும் நலத்திட்ட உதவிகள் அளித்திடும் வகையில் ‘பத்திரிகையாளர் நல வாரியம்’ ஒன்றை உருவாக்கி ஆணை வெளியிடப்படுகிறது. இவ்வாறு கூறப்பட்டுள்ளது.