SUN குழுமத்திலிருந்து வெளிவரும் காலை நாளிதழ்

பாஜவுடன் இனி கூட்டணி வேண்டாம் உள்ளாட்சி தேர்தலில் அதிமுக தனித்து போட்டி? கட்சி நிர்வாகிகள் தலைமையிடம் வலியுறுத்தல்

2021-08-01@ 00:43:06

சென்னை: தமிழகத்தில் விரைவில் நடைபெற உள்ள உள்ளாட்சி தேர்தலில், பாஜவுடன் கூட்டணி வேண்டாம், அதிமுக தனித்து போட்டியிட வேண்டும் என்று கட்சி தலைமையை அதிமுக நிர்வாகிகள் வலியுறுத்தி வருகின்றனர். தமிழகத்தில் விரைவில் உள்ளாட்சி தேர்தல் நடைபெற உள்ளது. முதல் கட்டமாக காஞ்சிபுரம், செங்கல்பட்டு, வேலூர், ராணிப்பேட்டை, திருப்பத்தூர், விழுப்புரம், கள்ளக்குறிச்சி, திருநெல்வேலி, தென்காசி ஆகிய 9 மாவட்டங்களில் ஊரக உள்ளாட்சி தேர்தல் நடத்தப்படுகிறது. இந்த தேர்தலை வருகிற செப்டம்பர் மாதம் 15ம் தேதிக்குள் நடத்தி முடிக்க திட்டமிடப்பட்டுள்ளது. இதற்கான பணிகளில் மாநில தேர்தல் ஆணையம் ஈடுபட்டுள்ளது.

இந்த 9 மாவட்டங்களில் மாவட்ட ஊராட்சி வார்டு உறுப்பினர், ஊராட்சி ஒன்றிய வார்டு உறுப்பினர், கிராம ஊராட்சி தலைவர், கிராம ஊராட்சி வார்டு உறுப்பினர் தேர்தல் நடத்துவதற்கான, தேர்தல் நடத்தும் அலுவலர்கள் மற்றும் உதவி தேர்தல் நடத்தும் அலுவலர்களை உடனடியாக நியமிக்க மாநில தேர்தல் ஆணையம் மாவட்ட கலெக்டர்களுக்கு உத்தரவிட்டுள்ளது. மேலும், வார்டுவரையறை செய்வது, வாக்குச்சாவடிகள் அமைப்பது, வாக்காளர் பட்டியல் தயார் செய்யும் பணிகளையும் விரைந்து முடிக்க உத்தரவிடப்பட்டுள்ளது. இதைத்தொடர்ந்து, வருகிற டிசம்பர் மாதத்திற்குள் மாநகராட்சி, நகராட்சி, பேரூராட்சி பகுதிகளுக்கு தேர்தல் நடத்த தமிழக அரசு திட்டமிட்டுள்ளது.

தமிழகத்தில் உள்ளாட்சி தேர்தலை சந்திக்க அனைத்து கட்சிகளும் தயாராகி வருகிறது. அதிமுகவை பொறுத்தவரை, உள்ளாட்சி தேர்தலில் தனித்தே போட்டியிட வேண்டும் என்று கட்சி நிர்வாகிகள் மேலிடத்தை வலியுறுத்தி வருகிறார்கள். குறிப்பாக, விழுப்புரம் மாவட்ட அதிமுக முன்னாள் அமைச்சர் சி.வி.சண்முகம் மற்றும் நிர்வாகிகள், வருகிற உள்ளாட்சி தேர்தலில் தனித்தே போட்டியிட வேண்டும் என்று எடப்பாடி பழனிசாமி மற்றும் ஓ.பன்னீர்செல்வத்திடம் நேரடியாக கோரிக்கை வைத்துள்ளனர்.

ஏற்கனவே, சி.வி.சண்முகம், கடந்த சட்டமன்ற தேர்தலில் பாஜவுடன் அதிமுக கூட்டணி வைத்ததால்தான் தோல்வி அடைந்தோம். அதனால், பாஜவுடன் இனி தேர்தல் கூட்டணி கிடையாது என்று வெளிப்படையாகவே பேசியுள்ளார். இதே கருத்தைத்தான் பல அதிமுக நிர்வாகிகளும் தொடர்ந்து வலியுறுத்தி வருகிறார்கள். பாஜவுடன் அதிமுக கூட்டணி வைத்து தேர்தலை சந்தித்தால், சிறுபான்மையினர் ஓட்டு முழுமையாக அதிமுக வேட்பாளர்களுக்கு கிடைக்காமல் போய் விடுகிறது. மறைந்த எம்ஜிஆர், ஜெயலலிதா போன்றவர்கள் சிறுபான்மை மக்களுடன் மிகவும் நெருக்கமாக இருந்தார்கள்.

ஆனால், தற்போது டெல்லியில் பாஜ தலைமை கொடுக்கும் நெருக்கடி காரணமாக, தமிழகத்தில் பாஜவுடன் கூட்டணி வைக்க வேண்டிய நிலைமை அதிமுக கட்சி தலைமைக்கு ஏற்பட்டுள்ளது. இந்த நெருக்கடியை உடைத்து வெளியே வர வேண்டும் என்று அதிமுக மூத்த நிர்வாகிகள் பலரும் வெளிப்படையாக தலைமைக்கு கோரிக்கை வைக்க தொடங்கி உள்ளனர். கட்சி முன்னணி நிர்வாகிகள் தொடர்ந்து நெருக்கடி கொடுத்தாலும், அதிமுகவின் முன்னணி தலைவர்கள், பாஜவை கூட்டணியில் இருந்து கழட்டிவிட முடியாமல் தவித்து வருகிறார்கள்.

ஆனாலும், வருகிற உள்ளாட்சி தேர்தலில் பாஜ, பாமக ஆகிய கூட்டணி கட்சிகளுடன் இணைந்து போட்டியிடாமல், அனைத்து வார்டுகளிலும் அதிமுக தனித்தே போட்டியிட முடிவு செய்துள்ளதாக கூறப்படுகிறது. இந்த உள்ளாட்சி தேர்தலில் கிடைக்கும் வெற்றி மற்றும் தோல்வியை கருத்தில் கொண்டு வரும் காலங்களில் அதிமுக கூட்டணி குறித்து புதிய முடிவெடுக்க திட்டமிட்டுள்ளது. குறிப்பாக, எம்ஜிஆர், ஜெயலலிதா மறைவுக்கு பிறகு எடப்பாடி பழனிசாமி மற்றும் ஓ.பன்னீர்செல்வம் இணைந்து செயல்பட்டாலும், பாராளுமன்ற பொதுத்தேர்தல் மற்றும் சட்டமன்ற பொதுத்தேர்தலில் இதுவரை அதிமுக அதிக இடங்களில் வெற்றிபெற்றதில்லை என்பது குறிப்பிடத்தக்கது.

இதனால் மாஜி அமைச்சர் சண்முகம்போல, மேலும் பல மாவட்டங்களிலும் இதே கோரிக்கையை நிர்வாகிகள் எழுப்பத் தொடங்கியுள்ளனர். தமிழகத்தில் இல்லாத கட்சிக்கு நாமே உறுப்பினர்களை கொடுக்க வேண்டுமா? பாஜவை சேர்ப்பதால் உள்ளாட்சி தேர்தலில் நாம் படுதோல்வியை சந்திக்க வேண்டியது வரும் என்றும் அவர்கள் தலைமையை எச்சரிக்கத் தொடங்கியுள்ளனர். இதனால் கூட்டணியை மாவட்ட நிர்வாகிகளே முடிவு செய்து, அவர்களே தேவைக்கு ஏற்பட இடங்களை ஒதுக்கிக் கொள்ளலாம் என்று அனுமதி வழங்க மேலிட நிர்வாகிகள் திட்டமிட்டுள்ளதாக கூறப்படுகிறது. இதனால் இப்போதே அதிமுக கூட்டணிக்குள் புதிய பரபரப்பு தொற்றிக் கொண்டுள்ளது. பாஜவை சேர்ப்பதால் உள்ளாட்சி தேர்தலில் படுதோல்வியை சந்திக்க வேண்டி வரும் என அதிமுக நிர்வாகிகள், கட்சி தலைமையை எச்சரிக்கத் தொடங்கியுள்ளனர். இதனால் இப்போதே அதிமுக  கூட்டணிக்குள் புதிய பரபரப்பு தொற்றிக் கொண்டுள்ளது.

மேலும் செய்திகள்

Like Us on Facebook Dinkaran Daily News
  • wildfire-13

    கலிபோர்னியாவில் வேகமாக பரவும் காட்டுத்தீ!: 13,400 ஏக்கர் காடுகள் தீயில் கருகி நாசம்..!!

  • plane-crashe-13

    அமெரிக்காவில் குடியிருப்பு மீது விழுந்து நொறுங்கிய சிறிய ரக விமானம்!: ஏராளமான வாகனங்கள், வீடுகள் தீக்கிரை..2 பேர் பலி..!!

  • wine-12

    இஸ்ரேலில் மண்ணில் புதையுண்டு கிடந்த 1,500 ஆண்டுகள் பழமையான ஒயின் தயாரிப்பு ஆலை கண்டெடுப்பு..!!

  • Tiruppp1

    திருப்பதியில் நவராத்திரி பிரம்மோற்சவம்... கண்கவர் புகைப்படங்கள்!!

  • andhratirupp

    திருமலை ஏழுமலையானுக்கு பட்டு வஸ்திரம் சமர்பித்த ஆந்திரா முதல்வர் ஜெகன்மோகன் ரெட்டி

படங்கள் வீடியோ கல்வி சினிமா ஜோ‌திட‌ம்