சென்னை: கொரோனா பரவலை தடுக்க தொழிற்சாலை, தனியார் நிறுவனங்கள் ஊழியர்களுக்கு தடுப்பூசி போடுவதற்கான ஏற்பாடுகளை கட்டாயம் செய்ய வேண்டும் என்றும், வழிகாட்டு நடைமுறைகளை பின்பற்றாத தொழிற்சாலை, நிறுவனங்கள் மீது உரிய நடவடிக்கை எடுக்கப்படும் என்றும் தமிழக அரசு எச்சரித்துள்ளது. தமிழகத்தில் மீண்டும் கொரோனா தொற்று பரவல் அதிகரிப்பால் ஊரடங்கு தளர்வில் அரசு பல்வேறு கட்டுப்பாடுகளை நாளை முதல் அறிவித்துள்ளது. அந்த வகையில், தொழிற்சாலைகள், வணிக வளாகங்கள், தனியார் நிறுவனங்கள், அலுவலகங்கள் மற்றும் உணவு விடுதிகளில் பணிபுரியும் பணியாளர்கள், அலுவலர்கள் மற்றும் பொதுமக்களின் உடல் வெப்ப நிலை பரிசோதனை செய்யப்படுவதையும், கை சுத்திகரிப்பான் உபயோகப்படுத்துவதையும், முகக்கவசம் அணிவதையும் சம்பந்தப்பட்ட நிறுவனங்கள் உறுதி செய்து, அனுமதிக்க வேண்டும்.

முகக்கவசங்கள் அணியாமல் இருப்பவர்களை கட்டாயமாக அனுமதிக்கக்கூடாது. தொழிற்சாலைகளில் பணிபுரியும் பணியாளர்களுக்கு, மத்திய அரசு அவ்வப்போது வழங்கும் அறிவுரைகளுக்கு ஏற்ப தடுப்பூசி போடுவதற்கான ஏற்பாடுகளை தொழிற்சாலை நிர்வாகம் செய்ய வேண்டும். மேலும், நிலையான வழிகாட்டு நடைமுறைகளை முறையாக பின்பற்றாத தொழிற்சாலைகள் மற்றும் நிறுவனங்கள் மீது உரிய நடவடிக்கை மேற்கொள்ளப்படும். இவ்வாறு தமிழக அரசு தெரிவித்துள்ளது.