சென்னை : அதிமுக கூட்டணியில் இருந்து தேமுதிக வெளியேறுவதாக தேமுதிக தலைவர் விஜயகாந்த் பரபரப்பு அறிக்கை ஒன்றை வெளியிட்டார். இத்தகைய சரியான முடிவை கட்சித் தலைமை தற்போது எடுத்துள்ளதாக தேமுதிக மாவட்ட செயலாளர்கள் வரவேற்பு அளித்துள்ளனர் உள்ளாட்சி தேர்தலிலேயே தேமுதிகவை அதிமுகவினர் அவமானப்படுத்தியதாக தொண்டர்கள் குமுறுகின்றனர்.மேலும் அதிமுகவுக்கு அழிவு காலம் ஆரம்பம் என்றும் அதிமுகவுடன் கூட்டணியை முறித்துக் கொண்டது தேமுதிகவுக்கு விடிவுகாலம் என்றும் தொண்டர்கள் தெரிவித்துள்ளனர்.

இதைத் தொடர்ந்து செய்தியாளர்களிடம் பேட்டியளித்த ஒரு தேமுதிக நிர்வாகி ஒருவர் ஆவேசமாகப் பேசினார். அப்போது பேசிய அவர், “இந்தத் தேர்தலில் அதிமுகவை தேமுதிக முடித்துவைக்கும். தேமுதிகவை முதுகில் குத்தி எடப்பாடியும் ஓபிஎஸ்ஸும் நம்பிக்கை துரோகம் செய்திருக்கிறார்கள். சசிகலாவுக்குச் செய்ததுபோல் எங்களுக்கும் செய்திருக்கிறார்கள். நான் அவர்கள் இருவருக்கும் சவால் விடுகிறேன். முடிந்தால் 2021 தேர்தலில் அதிமுக மட்டும் ஆட்சியைப் பிடித்துவிட்டால் தேமுதிக கட்சியைக் கலைத்துவிடுகிறோம். உங்களால் முடியுமா? விஜயகாந்துக்கு நம்பிக்கை துரோகம் செய்தவர்கள் யாரும் நன்றாக இருந்த சரித்திரம் இல்லை” என்றார்.