புதுச்சேரி: புதுச்சேரியில் தேசிய ஜனநாயக கூட்டணியில் இருந்து என்.ஆர்.காங்கிரஸ் வெளியேறுவதை தடுக்க தொடர்ந்து அழுத்தம் கொடுத்து வரும் பாரதிய ஜனதா கட்சி, என்.ரங்கசாமியை டெல்லிக்கு வரவும் அழைப்பு விடுத்துள்ளது. புதுச்சேரி சட்டப்பேரவை தேர்தலில் முதலமைச்சர் வேட்பாளராக தம்மை அறிவிக்க பாஜக மறுப்பதால் கூட்டணியில் இருந்து வெளியேறி தனியாக தேர்தலை சந்திக்க ரங்கசாமி தலைமையிலான என்.ஆர்.காங்கிரஸ் முடிவு செய்துள்ளது. ஆனால் என்.ஆர்.காங்கிரஸ் இல்லாமல் தேர்தலை எதிர்கொண்டால் பாஜக கூட்டணி பெறும் தோல்வி அடையும் என்று கணிப்புகள் வெளியாகியுள்ளன. இதனால் என்.ஆர்.காங்கிரஸை கூட்டணியில் தக்கவைக்க பாஜக நெருக்கடி கொடுத்து வருகிறது.

தொடர்ந்து, பெங்களூருவில் இருந்து புதுச்சேரி வந்த பாஜக மேலிட பொறுப்பாளர்கள் ரங்கசாமியை அவரது இல்லத்தில் சென்று சந்தித்துள்ளனர். அப்போது ரங்கசாமியுடன் வீடியோ காலில் பேசிய மத்திய உள்துறை அமைச்சர் அமித்ஷா, அவரை தனி விமானம் மூலம் டெல்லிக்கு வரும் படி அழைப்பு விடுத்ததாக கூறப்படுகிறது. ரங்கசாமியின் கோரிக்கைகளை டெல்லியில் பேசி தீர்த்துக் கொள்ளலாம் என்று அமித்ஷா தெரிவித்ததாக தகவல்கள் வெளியாகியுள்ளன. ஆனால் அமித்ஷாவின் அழைப்புக்கு ரங்கசாமி இதுவரை எந்த பதிலும் கூறாமல் மவுனம் காத்து வருகிறார்.