மதுரை: ‘‘பெட்ரோல், டீசல் விலை உயர்வு உலக நாடுகளின் பிரச்னை’’ என்று பாஜ மாநில தலைவர் எல்.முருகன் தெரிவித்தார். மதுரை தெற்கு தொகுதிக்குட்பட்ட காமராஜர் சாலை பகுதியில் பாஜ சார்பில் தெற்கு சட்டமன்ற தொகுதி அலுவலகத்தை மாநில தலைவர் எல்.முருகன் நேற்று திறந்து வைத்தார். பின்னர் அவர் நிருபர்களிடம் கூறும்போது, ‘‘தமிழக பாஜ சார்பில் 234 தொகுதிகளிலும் தேர்தல் அலுவலகங்கள் திறப்பு உள்ளிட்ட தேர்தல் பணிகளை தொடங்கியுள்ளோம். புதுச்சேரியில் எம்எல்ஏக்களுக்கு பாஜ பேரம் பேசவில்லை. கூட்டணி பேதமின்றி அனைத்து தொகுதிகளிலும் தேர்தல் பணிகளை தொடங்கியுள்ளோம். பெட்ரோல், டீசல் விலை உயர்வு என்பது உலக நாடுகளின் பிரச்னை. அதை குறைக்க வழிவகை செய்வோம். வரும் 25ம் தேதி கோவையில் பிரதமர் தலைமையில் நடைபெறும் மாநாட்டிற்கு கூட்டணி கட்சிகளுக்கு அழைப்பு விடுக்கவில்லை’’ என்றார்.