சென்னை: பல்வேறு கோரிக்கைகளை வலியுறுத்தி கம்யூனிஸ்ட் தலைவர்கள் நேற்று முன்தினம் முதல்வர் எடப்பாடி பழனிசாமியை சந்தித்தனர்.இந்திய கம்யூனிஸ்ட் கட்சி மாநில செயலாளர் முத்தரசன் வெளியிட்ட அறிக்கை:முதல்வர் எடப்பாடி பழனிசாமியை நேற்று முன்தினம் மாலை அவரது இல்லத்தில் இந்திய கம்யூனிஸ்ட் கட்சியின் மாநில செயலாளர் முத்தரசன், துணை செயலாளர் கே.சுப்பராயன் எம்பி, செயற்குழு உறுப்பினர்கள் பெரியசாமி, முன்னாள் எம்.எல்.ஏ. ஆறுமுகம் மற்றும் மாநிலக் குழு உறுப்பினர் சுந்தரம் ஆகியோர் நேரில் சந்தித்து கீழ்க்கண்ட கோரிக்கைகளை நிறைவேற்ற வலியுறுத்தப்பட்டது.

ஊராட்சிகளில் பணியாற்றி வரும் தூய்மைக் காவலர்களுக்கு கடந்த மார்ச் 16ம் தேதி சட்டப் பேரவையில் அறிவித்தபடி மாதாந்திர ஊதியத்தை 3600 ஆகவும், குடிநீர் விநியோகப் பணியாளர்களுக்கு 4000 ஆகவும் உயர்த்தி வழங்க அரசாணை வெளியிட வேண்டும். இப்பணியாளர்களை நிரந்தரம் செய்ய வேண்டும்.அரசு ஆரம்பப் பள்ளிகளில் பயின்று வரும் அறிவுக் கூர்மையுள்ள மாணவர்களை தனியார் பள்ளிகளில் சேர்க்கவும், அதற்கான கட்டணங்களை கட்டுமான தொழிலாளர் வாரியம் செலுத்தும் எனவும் அறிவிக்கப்பட்டிருப்பது அரசுப்பள்ளியின் முக்கியத்துவத்தை குறைத்து விடும் என்பதால் இந்த முடிவை ரத்து செய்ய வேண்டும்.டாஸ்மாக் பணியாளர்களுக்கு ஓய்வூதியம் வழங்கவும், அவர்களை இஎஸ்ஐ திட்டத்தில் இணைக்கவும் வேண்டும். இவ்வாறு அறிக்கையில் கூறப்பட்டுள்ளது.