அறந்தாங்கி: அறந்தாங்கியில் போலீசுக்கு கப்பம் கட்டு லட்சகணக்கான பணத்துடன் சூதாட்ட கிளப் நடந்து வருவது குறித்து புகார் அளித்தும் நடவடிக்கை இல்லை என அதிமுக பிரமுகர் ஒருவர் பேசும் ஆடியோ சமூக வலைதளங்களில் வைரலாகி வருவது பரபரப்பை ஏற்படுத்தியுள்ளது. புதுக்கோட்டை மாவட்டம் அறந்தாங்கி களப்பக்காட்டை சேர்ந்தவர் சக்திவேல். இவர் துரையரசபுரம் புதுக்கோட்டை மாவட்ட கூட்டுறவு நூற்பாலையில் பணியாற்றியவர். அதிமுக தொழிற்சங்க நிர்வாகி. இவரது மகன் பார்த்திபன் தற்போது அறந்தாங்கி நகர அதிமுக துணைச் செயலாளராக உள்ளார். இந்நிலையில், சக்திவேல் எஸ்பிக்கு பேசுவது போன்ற ஆடியோ மற்றும் சிலர் சீட்டு ஆடுவது போன்ற படங்கள் நள்ளிரவு முதல் சமூக வலைதளங்களில் வைரலாகி வருவது அறந்தாங்கி பகுதியில் பரபரப்பை ஏற்படுத்தியுள்ளது.

அந்த ஆடியோவில் சக்திவேல் பேசியதாவது: சாரி சார் மன்னிக்கவும் சார். நான் அறந்தாங்கி களப்பக்காட்டில் இருந்து சக்திவேல் பேசுறேன். இந்த பாரதிநகரில் வந்து மனமகிழ் மன்றம்ங்ற பெயர்ல ஒரு சீட்டாட்ட கிளப் நடந்து வருது சார். அதுக்கு யார் பர்மிசன் கொடுத்தாங்கன்னு தெரியல. அந்த கிளப்பை சுத்தி வீடுகள் இருக்கு. கிளப்பில் பாத்ரூம் இல்ல, லெட்டீன் இல்ல. பல ஆயிரம் ரூபாய் பணம் வச்சி சீட்டாடிகிட்டு இருக்காங்க. இது விஷயமா நான் அறந்தாங்கி டி.எஸ்.பி சார், இன்ஸ்பெக்டர் சார்கிட்டயும் பேசியாச்சி. எவ்வித நடவடிக்கையும் இல்லை. ஆனால் அந்த கிளப் நடக்குற இடத்தில தப்பான செய்தியை பரப்பிக்கிட்டு இருக்கான். நாங்கள்லாம் ஐகோர்ட்டுல ஆர்டர் வாங்கிட்டோம். காவல்துறையை கவனிச்சிட்டோம்னு ஒரு தப்பான செய்தியை பரப்புறான்.

கிளப் டே அண்டு நைட்டா ஓடிகிட்டு இருக்கு சார். வெளியூர்ல இருந்தும் ஆள் வர்றாங்க. பார் மாதிரி பிராந்தி சரக்கு சாப்பிடுறது, போறது. எல்லாமே ஓடிட்டு இருக்கு. தாங்கள் தக்க நடவடிக்கை எடுக்க வேண்டும் என அன்போடு வேண்டிக் கொள்கிறேன் சார். அறந்தாங்கி நகரில் காரைக்குடி சாலை, பேருந்து நிலையம் அருகில் மற்றம் சக்திவேல் குறிப்பிட்ட பாரதிநகர் உள்ளிட்ட 3 இடங்களில் காவல்துறையின் ஒத்துழைப்புடன் பெரிய அளவில் சீட்டாட்ட கிளப்புகள் நடந்து வருகின்றன. இந்த 3 இடங்களிலும் தினசரி பல லட்ச ரூபாய் பணம் வைத்து சூதாட்டம் நடைபெறுவதாகவும், கொரோனா காலம் என்பதால், இந்த சூதாட்டத்தில் விடுமுறையில் உள்ள கல்லூரி மாணவர்கள் கூட வீட்டிற்கு தெரியாமல் பணம் வைத்து சூதாடி பணத்தை இழந்து வருவதாகவும் சமூக ஆர்வலர்கள் குற்றம்சாட்டுகின்றனர். இதுகுறித்து எஸ்பி பாலாஜி சரவணனிடம் கேட்டபோது, ‘‘இதுபற்றி தகவல் ஏற்கனவே வந்துள்ளது. எனது சிறப்பு குழுவினரை அதிரடி சோதனை நடத்த உத்தரவிட்டுள்ளேன்’’ என்றார்.