சென்னை: தமிழக தலைமை தேர்தல் அதிகாரி சத்யபிரதா சாகு நேற்று வெளியிட்டுள்ள அறிக்கை: 2021 தமிழ்நாடு சட்டமன்ற தேர்தலில் பொதுமக்களின் பங்கேற்பை அதிகரிக்க விழிப்புணர்வு ஏற்படுத்தும் விதமாக மாநில அளவிலான இணையவழி வினாடி வினா போட்டி நடக்கிறது. இதில் ஆர்வமுள்ள மக்கள் அனைவரும் பங்கேற்கலாம். போட்டியில் அனைத்து சுற்றுகளும் “Goal Quiz sports” என்ற YouTube இணையவழி தளத்தில் நடத்தப்ப டும். இதில் பங்கேற்கும் ஆர்வமுள்ளவர்கள் நேரடியாக முதல் நிலைப்போட்டியில் கலந்து கொள்ளலாம். முதல்நிலை போட்டி மூன்று சுற்றுகளை கொண்டது. முதல் சுற்று போட்டி வருகிற 25ம் தேதி மாலை 4 மணிக்கும், 2ம் சுற்று 26ம் தேதி காலை 11 மணி, மூன்றாம் சுற்று 26ம் தேதி மாலை 4 மணிக்கும் நடைபெறும். சரியான பதில்களை முதலில் பதிவிடும் நபரே பின்வரும் சுற்றுகளில் பங்கேற்க தகுதியானவர். ஒரு நபர் ஒருமுறை மட்டுமே பதிலை பதிவிட வேண்டும். முதல் பரிசு ரூ.50,000, இரண்டாம் பரிசு ரூ.25,000, மூன்றாம் பரிசு ரூ.15,000 வழங்கப்படும்.