புதுடெல்லி: ‘இந்தியாவின் தனி நபர் வருவாய் குறித்த சர்வதேச நிதியத்தின் கணிப்பு, பாஜ.வின் 6 ஆண்டு கால வெறுப்பு நிறைந்த கலாசார தேசியவாதத்தின் சாதனையாகும்,’ என்று ராகுல் காந்தி தெரிவித்துள்ளார். இந்தியாவின் பொருளாதாரம் கொரோனா தொற்றினால் மிக மோசமாக பாதிகப்பட்டு உள்ளதாகவும், நடப்பாண்டில் இது 10.3 சதவீதத்துக்கு சரியும் என்றும் சர்வதேச நிதியம் நேற்று முன்தினம் வெளியிட்ட `உலகப் பொருளாதார கண்ணோட்டம்’ அறிக்கையில் தெரிவிக்கப்பட்டுள்ளது. மேலும், நடப்பு நிதியாண்டில், தனிநபர் வருவாயில் இந்தியாவை வங்கதேசம் நெருங்கி உள்ளதாகவும் அதில் கூறப்பட்டுள்ளது. இது பற்றி காங்கிரஸ் முன்னாள் தலைவர் ராகுல் காந்தி நேற்று வெளியிட்ட டிவிட்டர் பதிவில், `தனிநபர் வருவாயில் வங்கதேசம் இந்தியாவை மிஞ்ச இருக்கிறது. இது பாஜ.வின் 6 ஆண்டு கால வெறுப்பு நிறைந்த கலாசார தேசியவாதத்தின் சாதனையாகும்,’ என்று கூறி மத்திய அரசை கிண்டல் செய்யும் வகையில், கைதட்டும் படத்துடன் சர்வதேச நிதியத்தின் கணிப்பு வரைபடத்தையும் இணைத்துள்ளார்.