சென்னை: கொரோனா போன்ற கொடிய நோய்களை குணமாக்க புதிய கண்டுபிடிப்புகளை ஊக்கப்படுத்த வேண்டும் என மத்திய அரசுக்கு சென்னை உயர் நீதிமன்றம் அறிவுறுத்தியுள்ளது. சென்னை உயர் நீதிமன்றத்தில் ஈரோடு மாவட்டம் கோபிசெட்டிப்பாளையத்தை சேர்ந்த எஸ்.மாதேஸ்வரன் என்ற ஓய்வு பெற்ற சுகாதார ஆய்வாளர் தாக்கல் செய்த மனுவில் கூறியிருப்பதாவது: உலகம் முழுவதும் கடுமையான பாதிப்பை கொரோனா வைரஸ் ஏற்படுத்தியுள்ளது. கொரோனா தொற்றை கட்டுப்படுத்த சஞ்சீவி மூலிகை கூறுகள் மூலம் 'அபியாஸ் வைரஸ் கில்லர் 180' என்ற மருந்தை கண்டுபிடித்துள்ளேன். விஞ்ஞான ரீதியில் அதனை நிரூபிக்க தயாராக உள்ளேன். ஏற்கனவே அரசின் அனுமதியோடு எச்ஐவி குறித்து ஆய்வு செய்து எச்ஐவி பாதிப்புக்கு உள்ளாகியிருந்த மூன்று நோயாளிகளை குணப்படுத்தி உள்ளேன்.

எனவே, நான் கண்டுபிடித்துள்ள கொரோனா நோய்க்கான மருந்து குறித்து சுகாதாரத்துறை அதிகாரிகளிடம் விளக்கும் வகையில், அந்த நிபுணர் குழு முன்பு ஆஜராக அனுமதிக்குமாறு அரசுக்கு உத்தரவிட வேண்டும். இவ்வாறு மனுவில் கூறியிருந்தார். இந்த மனு நீதிபதிகள் கிருபாகரன், ஹேமலதா ஆகியோர் அடங்கிய அமர்வில் நேற்று விசாரணைக்கு வந்தது. மனுதாரர் சார்பில் வக்கீல்கள் டி.ராஜகோபால், சத்தியம் சி.சரவணன் ஆகியோர் ஆஜராகி, கொரோனாவுக்கு மருந்து கண்டுபிடித்திருப்பதை அரசுக்கு எடுத்துரைக்க மனுதாரருக்கு அனுமதி வழங்க வேண்டும் என்று வாதிட்டனர்.

 இதைக்கேட்ட நீதிபதிகள், கொரோனா போன்ற கொடிய நோய்களை ஒழிக்க புதிய கண்டுபிடிப்புகளுக்கும், ஆராய்ச்சிகளுக்கும் மத்திய அரசு வாய்ப்பளிப்பளிக்க வேண்டும். கண்டுபிடிப்புகளுக்கான உரிய நிதியும் ஒதுக்க வேண்டும். இந்த வழக்கில் இந்திய மருத்துவ ஆராய்ச்சி கழகத்தையும், மத்திய ஆயுஷ் துறையையும் சேர்க்க உத்தரவிடப்படுகிறது. வழக்கில் விரிவான உத்தரவு பின்னர் பிறப்பிக்கப்படும் என்று உத்தரவிட்டனர்.