புதுடெல்லி: அரசு பணி, பதவி உயர்வில் எஸ்சி, எஸ்டி பிரிவினருக்கு இடஒதுக்கீடு வழங்கும் விவகாரத்தில் முந்தைய நீதிமன்ற உத்தரவை மறுபரிசீலனை செய்யக் கோரி உச்ச நீதிமன்றத்தில் புதிய சீராய்வு மனு தாக்கல் செய்யப்பட்டுள்ளது. அரசு பணி, பதவி உயர்வில் எஸ்சி, எஸ்டி வகுப்பினருக்கான இடஒதுக்கீடு தொடர்பான வழக்கை விசாரித்த உச்ச நீதிமன்றம், சாதி ரீதியான இடஒதுக்கீட்டை பின்பற்ற வேண்டிய அவசியமில்லை எனக் கூறியதோடு, வழக்கை உயர் அமர்வுக்கு மாற்ற மறுத்து கடந்த 2018ம் ஆண்டு செப்டம்பர் 26ம் தேதி முந்தைய தலைமை நீதிபதி அமர்வு தீர்ப்பளித்திருந்தது. இதை எதிர்த்து பல்வேறு மாநிலங்கள் தரப்பில் உச்ச நீதிமன்றத்தில் தாக்கல் செய்யப்பட்ட மனுக்கள் தற்போதைய தலைமை நீதிபதி அமர்வில் நிலுவையில் உள்ளது. இந்த நிலையில் உத்தரகாண்ட் மாநிலத்தின் பொதுப்பணித் துறையில் உள்ள உதவி பொறியாளர், அரசு பதவி உயர்வில் எஸ்சி, எஸ்டி பிரிவினருக்கு என இடஒதுக்கீடு வழங்க வேண்டும் என தொடரப்பட்ட வழக்கை விசாரித்த உச்ச நீதிமன்ற நீதிபதி நாகேஷ்வரராவ் மற்றும் ஹேமந்த் குப்தா ஆகியோர் அமர்வு, கடந்த பிப்ரவரி 8ம் தேதி ஓர் உத்தரவை பிறப்பித்தது.

 அதில், ‘‘அரசு பணிகளில் எஸ்சி, எஸ்டி பிரிவினருக்கு இடஒதுக்கீடு வழங்கக்கோரி மாநில அரசுக்கு நீதிமன்றம் உத்தரவிட முடியாது. இதில் எந்த அடிப்படை உரிமையும் கிடையாது. மேலும் இடஒதுக்கீடு வழங்கலாமா, வேண்டாமா என்பது அரசின் முழுமையான விருப்பத்திற்கு உட்பட்டதாகும்’’ என்று கூறப்பட்டிருந்தது. இந்நிலையில், இந்த விவகாரத்தில் அம்பேத்கர் பொறியாளர் சங்கம் தரப்பில் உச்ச நீதிமன்றத்தில் ஒரு சீராய்வு மனு தாக்கல் செய்யப்பட்டுள்ளது. அதில், ‘‘அரசு பணியில் எஸ்சி, எஸ்டி பிரிவினருக்கு இடஒதுக்கீடு வழங்கும் விவகாரத்தில் நீதிமன்றம் முந்தைய உத்தரவை மறு ஆய்வு செய்ய வேண்டும். அதேபோல் பணியாளர்களின் வாழ்வாதாரத்தையும் நீதிமன்றம் கருத்தில் கொள்ள வேண்டும்’’ என குறிப்பிடப்பட்டுள்ளது. இதையடுத்து வழக்கு விரைவில் விசாரணைக்கு வரும் என எதிர்பார்க்கப்படுகிறது. இதில் மேற்கண்ட தீர்ப்புக்கு எதிராக தான் நாடாளுமன்றத்தில் பெரும் விவாதம் நடைபெற்றது என்பது குறிப்பிடத்தக்கது.