புதுச்சேரி: புதுச்சேரியில் சுற்றுலா பயணிகளை கவரும் வகையில் விடுமுறை நாட்களில் போக்குவரத்து போலீசார் கருநீல, வெள்ளை நிற டி-சர்ட் சீருடை அணிய உத்தரவிடப்பட்டுள்ளது. வெளிநாட்டு சுற்றுலா பயணிகள் அதிகளவில் வந்து செல்லும் மாநிலங்கள், யூனியன் பிரதேசங்களில் போக்குவரத்து போலீசாருக்கு புதிய  சீருடைகளை அந்தந்த மாநில அரசுகள் அறிமுகப்படுத்தி வருகின்றன. மணிப்பூர், கோவா உள்ளிட்ட மாநிலங்களில் ஏற்கனவே புதிய சீருடை போலீசாருக்கு வழங்கப்பட்டுள்ளது. புதுச்சேரியில் போக்குவரத்து போலீசார் வெள்ளை நிற பேன்ட் மற்றும் சட்டையை சீருடையாக அணிந்து வந்தனர். இந்தநிலையில், வெள்ளை சட்டைக்கு பதிலாக கருநீலம், வெள்ளை  நிறத்துடன் கூடிய டி-சர்ட் போக்குவரத்து போலீசாருக்கு  சீருடையாக நேற்று வழங்கப்பட்டுள்ளது.

இந்த  சீருடைகளை போக்குவரத்து  போலீசாருக்கு முதல்வர் நாராயணசாமி, டிஜிபி  கருத்தரங்கு அறையில் வழங்கி தொடங்கி வைத்தார். புதிய சீருடையை பணியில் இருக்கும்  இன்ஸ்பெக்டர் முதல் காவலர்கள் வரை  அனைவரும் வார விடுமுறை நாட்களான சனி,  ஞாயிறு மட்டுமின்றி அரசு விடுமுறை  நாட்களிலும் அணிய வேண்டுமென  உத்தரவிடப்பட்டுள்ளது. இதற்காக தற்போது  முதல்கட்டமாக ஒவ்வொரு காவலருக்கும்  தலா 2 செட் புதிய சீருடை  வழங்கப்பட்டுள்ளது. நிகழ்ச்சியில், தலைமை  செயலர் அஸ்வனி குமார்,  டிஜிபி பாலாஜி வஸ்தவா மற்றும் காவல்துறை  அதிகாரிகள் கலந்து கொண்டனர்.