ஸ்ரீநகர்: தொடர் போராட்டங்களில் சிக்கி தவித்த ஜம்மு காஷ்மீரில் இயல்புநிலை திரும்ப ஆரம்பித்துள்ளது. ஜம்மு காஷ்மீரின் ஹந்த்வாரா நகரில் சிறுமி ஒருவர் ராணுவ வீரரால் பாலியல் சில்மிஷம் செய்யப்பட்டதாக புகார் கூறப்பட்டது. இதை கண்டித்து பல்வேறு நகரங்களில் நடைபெற்ற தொடர் போராட்டத்தில் ஈடுபட்ட 5 பேர் பாதுகாப்பு படையினரால் சுட்டுக்கொல்லப்பட்டனர். இந்த நிலையில் நேற்று முன்தினம் குப்வாரா மாவட்டம் டிரெக்காம் பகுதியில் நடைபெற்ற கலவரத்தில் 2 பேர் காயம் அடைந்தனர். அவர்கள் ஸ்ரீநகர் மருத்துவமனையில் சிகிச்சை பெற்று வருகின்றனர். தொடர் போராட்டம் காரணமாக வதந்தி பரவுவதை தவிர்க்க செல்போன், இணையதள சேவை தொடர்ந்து துண்டிக்கப்பட்டுள்ளது. இந்த நிலையில் ஸ்ரீநகரில் இயல்பு நிலை திரும்பியுள்ளதாக போலீஸ் அதிகாரி ஒருவர் தெரிவித்தார். இதனால் சிலபகுதிகளில் விதிக்கப்பட்ட தடைகள் நீக்கப்பட்டுள்ளன. இயல்பான வாகன போக்குவரத்தும் இருந்தது.