ஜம்மு : ஜம்மு காஷ்மீரில்  வன்முறையை ஏற்றுகொள்ளமுடியாது என்று அம்மாநில முதலமைச்சர் மெஹ்பூபா முஃப்தி தெரிவித்துள்ளார். குப்வாரா மாவட்டம் ஹண்ட்வாராவில் பள்ளிக்கு சென்றுவிட்டு வீடு திரும்பிய மாணவிக்கு பாதுகாப்பு படை வீரர் ஒருவர் பாலியல் தொந்தரவு கொடுத்ததாக கூறப்படுகிறது. இதனை கண்டித்து இளைஞர்கள் பாதுகாப்பு படை வீரர்கள் மீது கல்வீச்சீல் ஈடுபட்டுள்ளனர். கூட்டத்தை கலைக்க பாதுகாப்பு படையினர் துப்பாக்கிச் சூடு நடத்தியதில் ஐந்து பேர் உயிரிழந்தனர். இதனை கண்டித்து காஷ்மீர் பள்ளத்தாக்கு முழுவதும் முழு அடைப்பு போராட்டம் நடைபெற்று வருகிறது. போராட்டக்காரர்களை கலைக்க போலீசார் கண்ணீர் புகை குண்டுகளை வீசினர்.

துப்பாக்கிச் சூடு மற்றும் கலவரத்தில் உயிரிழந்தவர்களின் குடும்பத்தினரை அம்மாநில முதலமைச்சர் மெஹ்பூபா முஃப்தி சந்தித்து பேசினார். வன்முறையை ஒருபோதும் ஏற்றுகொள்ளமுடியாது என்று அப்போது அவர் கூறினார். மேலும் உரிய விசாரணை நடத்தப்படும் என்றும் அவர் உறுதி அளித்தார். காஷ்மீர் பள்ளத்தாக்கில் மாகம், லங்காடே, ஹண்ட்வாரா, குப்வாரா உள்ளிட்ட இடங்களில் ஊரடங்கு உத்தரவு பிறப்பிக்கப்பட்டுள்ளது. மேலும் கலவரம் காரணமாக ஸ்ரீ நகரில் கூடுதல் துணை ராணுவ படையினர் குவிக்கப்பட்டுள்ளனர்.