டெல்லி: ஆன்லைனில் முன்பதிவு செய்யும் ரயில் டிக்கெட்டுகளை Cash on delivery முறையில் வீடு தேடி வந்து கொடுத்துவிட்டு பணத்தை பெற்றுக்கொள்ளும் வசதியை இந்திய ரயில்வே உணவு மற்றும் சுற்றுலா கழகமான ஐ.ஆர்.சி.டி.சி. அறிமுகப்படுத்தி உள்ளது. பயணம் செய்வதற்கான ரயில் டிக்கெட்டுகளை ஆன்லைனில் முன்பதிவு செய்யும்போது, பணம் செலுத்துவதற்கு நெட் பேங்கிங் அல்லது கிரெடிட் கார்டு அல்லது ஏ.டி.எம். கார்டு வசதியையோ பயன்படுத்தும் முறை அமலில் உள்ளது. ஆனால், சிலருக்கு நெட் பேங்கிங் வசதி இருக்காது. சிலரோ தங்களது கிரெடிட் கார்டு மற்றும் ஏ.டி.எம். கார்டு குறித்த தகவல்களை வெளியிட தயங்குவார்கள்.

இதையெல்லாம் கருத்தில் கொண்டு ஐ.ஆர்.சி.டி.சி புதிய முறையை அறிமுகப்படுத்தி உள்ளது. இதன்படி வழக்கம்போல ரயில் டிக்கெட்டுகளை ஆன்லைனில் முன்பதிவு செய்யலாம். பின்னர் நாம் முன்பதிவு செய்த பயணச்சீட்டின் பிரிண்ட்டை எடுத்துக் கொண்டு, ஐ.ஆர்.சி.டி.சி. ஊழியர் நமது வீட்டிற்கு நேரிலேயே வருவார். அவரிடம் பயணச்சீட்டிற்கான பணத்தை கொடுத்து, டிக்கெட்டை பெற்றுக்கொள்ள வேண்டும்.

இந்த எளிய வசதியைப் பெற, பயணம் செய்வதற்கு 5 நாட்களுக்கு முன்னரே டிக்கெட்டை முன்பதிவு செய்ய வேண்டும் என்பது குறிப்பிடத்தக்கது. டிக்கெட்டை வீட்டுக்கே வந்து அளிக்கும் சேவைக்காக தூங்கும் வசதி கொண்ட இரண்டாம் வகுப்பு டிக்கெட் ஒன்றுக்கு ரூ.40ம், ஏ.சி. வகுப்பு டிக்கெட் ஒன்றுக்கு ரூ.60ம் கூடுதலாக வசூலிக்கப்படும் என அறிவிக்கப்பட்டுள்ளது. முதற்கட்டமாக இந்த புதிய சேவை 200க்கும் மேற்பட்ட நகரங்களில் அமல்படுத்தப்பட்டு உள்ளது.