வண்ணாரப்பேட்டை : சென்னை வண்ணாரப்பேட்டை மேற்கு கிருஷ்ணப்ப கிராமணி தோட்டம் தெருவை சேர்ந்தவர் உமாபதி (52). பைக் மெக்கானிக். இவரது மனைவி உஷா. இவர்களுக்கு 2 மகள், ஒரு மகன் உள்ளனர். கடந்த 31ம் தேதி இரவு வேலை முடிந்து உமாபதி வீட்டுக்கு புறப்பட்டார். தண்டையார்பேட்டை மணிகூண்டு அருகே இரவு 8.30 மணியளவில் சாலையை கடந்தபோது, அவ்வழியாக வேகமாக சென்ற ஆட்டோ, உமாபதி மீது பயங்கரமாக மோதிவிட்டு நிற்காமல் சென்றுவிட்டது. இதில் தலையில் படுகாயமடைந்த அவர், உயிருக்கு போராடினார். இதை பார்த்த அப்பகுதி மக்கள், உடனடியாக அவரை மீட்டு, ஸ்டான்லி அரசு மருத்துவமனைக்கு அனுப்பினர். நேற்று முன்தினம் உமாபதிக்கு மூளைச்சாவு ஏற்பட்டது.புகாரின்படி கொருக்குப்பேட்டை போலீசார் வழக்குப்பதிவு செய்து, விபத்து ஏற்படுத்திய ஆட்டோவை தேடி வருகின்றனர்.

இதற்கிடையில் மூளைச் சாவு அடைந்த உமாபதியின் உடல் உறுப்புகளை தானம் செய்வது குறித்து மருத்துவ குழுவினர், அவரது உறவினர்களிடம் பேசினர். அவர்களும், அதற்கு சம்மதித்தனர். இதை தொடர்ந்து அறுவை சிகிச்சை மூலம் இதயம், கல்லீரல், 2 கிட்னி ஆகியவை அகற்றப்பட்டன. பின்னர் அவற்றை ஸ்டான்லி மற்றும் தனியார் மருத்துவமனைகளில் அவற்றை ஒப்படைத்தனர்.