கிருஷ்ணகிரி : கிருஷ்ணகிரி மாவட்டம் சூளகிரி அடுத்த சின்னமோதுகானப்பள்ளியைச் சேர்ந்தவர் பூங்கொடி (30). இவர் கணவன் முருகேசன் மற்றும் இரண்டு பெண் குழந்தைகளுடன் நேற்று கிருஷ்ணகிரி கலெக்டர் அலுவலகத்தில் குறை தீர்ப்பு முகாமில் மனு அளிக்க வந்தார். கோரிக்கை மனுவை மாவட்ட வருவாய் அலுவலர் பாலசுப்பிரமணியனிடம் கொடுத்தார். ‘‘நாங்கள் வழித்தடம் ஆக்கிரமிப்பு குறித்து 2004 முதல் மனு அளித்து வருகின்றோம். எங்கள் மனு மீது என்ன நடவடிக்கை எடுத்தீர்கள் என்ற பதில் கூட வரவில்லை. தற்போது இந்த மனு மீது என்ன நடவடிக்கை எடுக்கவுள்ளீர்கள் என்பது குறித்து இப்போதே எங்களுக்கு சொல்ல வேண்டும்‘‘ என முருகேசன், பூங்கொடி தம்பதி கூறினர்.

ஆனால், மாவட்ட வருவாய் அலுவலர் உள்ளிட்ட அதிகாரிகள், உங்கள் மனு மீது விசாரணை நடத்தப்படும். ஆகவே இங்கிருந்து வெளியே செல்லுங்கள் என கூறினர். அப்போ தும் அவர்கள் அங்கிருந்து வெளியே செல்லாமல் வாக்குவாதத்தில் ஈடுபட்டனர். இதை பார்த்துக் கொண்டிருந்த மாவட்ட வருவாய் அலுவலரின் டபேதார் மற்றும் போலீசார், பூங்கொடி அவரது கணவர் முருகேசன் மற்றும் இரண்டு பெண் குழந்தைகளையும் அந்த அறையில் இருந்து வலுக்கட்டாயமாக இழுத்து வந்து வெளியில் கொண்டுபோய் விட்டனர். இதனால் அங்கு சிறிது நேரம் பரபரப்பு ஏற்பட்டது.