சிங்கப்பூர்: ஆடிப்பூர மகா பிரம்மோற்சவத்தையொட்டி சிங்கப்பூர் ஈசூன் ஸ்ரீ மகா மாரியம்மன் ஆலயத்தில் முத்திரைத் திருவிழாவான ஸ்ரீ வேம்பு அம்மன் விழா வெகு விமர்சையாக நடைபெற்றது. ஒரு மண்டல காலம் புனித நீரில் ஆதிவாசம் செய்த ஸ்ரீ வேம்பு அம்மன் பஞ்ச தீப வழிபாட்டுடன் பிரதிஷ்டை செய்யப்பட்டது. பூக்கரகம், அக்கினிக் கப்பறை, கும்பம் என முப்பெரும் சக்திகளாக மலர்ந்து மகா தீபாராதனை நடைபெற்றது. வேம்பு அம்மன் வழிபாட்டிற்குரிய உட்பு, மிளகு முதலியவற்றை ஆலயமே வழங்கி மஞ்சள் நீராட்டினை பக்தர்கள் தாங்களாகவே செய்ய ஆலய நிர்வாகம் அனுமதியளித்தது. சிங்கப்பூரில் இத்தகு விழா இவ்வாலயத்தில் மட்டுமே நடைபெற்று வருவதால் அனைத்து பகுதிகளிலிருந்தும் பக்தர்கள் வந்திருந்தனர். விழாவில் கலந்து கொண்ட அனைத்து பக்தர்களுக்கும் பிரசாதம் வழங்கப்பட்டது.