காங்கோ குடியிருப்பு பகுதியில் விமானம் விழுந்து நொறுங்கியதில் உயிரிழந்தோர் எண்ணிக்கை 27 ஆக உயர்வு

ஆப்பிரிக்க நாடான காங்கோவில் ஏற்பட்ட விமான விபத்தில் உயிரிழந்தோரின் எண்ணிக்கை 27 ஆக உயர்ந்துள்ளது. அந்நாட்டின் கிழக்கு நகரமான கொமாவில் இருந்து busy bee என்ற நிறுவனத்தின் 19 இருக்கைகள் கொண்ட டர்னியர் ரக விமானம் நேற்று காலை புறப்பட்டது. புறப்பட்ட சிறிது நேரத்தில் விமானத்தின் என்ஜின் பகுதி பழுதானதால், விமானி விமான நிலையத்திற்கு திரும்பிச் செல்ல முயன்றார். ஆனால் எதிர்பாராத விதமாக அந்த விமானம் அப்பகுதியில் இருந்த குடியிருப்பு பகுதியில் விழுந்து விபத்துக்குள்ளானது. இந்த விபத்தில் விமானத்தில் இருந்த 17 பயணிகள் 2 ஊழியர்கள் மற்றும் விமானம் விழுந்த குடியிருப்புகளில் இருந்த 7 பேர் உயிரிழந்தனர். மருத்துவமனையில் அனுமதிக்கப்பட்டிருந்த ஒருவர் உயிரிழந்ததைத் தொடர்ந்து பலி எண்ணிக்கை 27 ஆக உயர்ந்துள்ளது.