பொன்னமராவதி, நவ.22: பொன்னமராவதி தாலுகாவில் உள்ள 106 வாக்குச்சாவடி மையங்களில் வாக்காளர் சேர்ப்பு சிறப்பு முகாம் தொடங்கியுள்ளது. தமிழகத்தில் வாக்காளர் சேர்ப்பு சிறப்பு முகாம் நேற்று தொடங்கியது. பொன்னமராவதி அலமேலு ஊராட்சி ஒன்றிய தொடக்கப்பள்ளி, வலம்புரிவடுகநாதன் மேல்நிலைப்பள்ளி, அஞ்சுபுளிப்பட்டி, பகவாண்டிப்பட்டி, தொட்டியம்பட்டி, கட்டையாண்டிபட்டி காரையூர், மேலத்தானியம், கீழத்தானியம், அரசமலை, தேனூர் உள்ளிட்ட பல்வேறு இடங்களில் நடைபெற்று வரும் முகாமினை திருமயம் எம்எல்ஏ ரகுபதி பார்வையிட்டு திமுக பூத் கமிட்டியினரிடம் தகுதியுள்ள அனைவரையும் வாக்காளர் பட்டியலில் சேர்க்கவேண்டும் என அறிவுரை வழங்கினார்.

இதில் ஒன்றியச் செயலாளர்கள் அடைக்கலமணி, முத்து, நகர செயலாளர் அழகப்பன் உள்பட பலர் கலந்து கொண்டனர். மேலும் பொன்னமராவதி தாலுகாவில் உள்ள 66 இடங்களில் 106 வாக்குச்சாவடி மையங்களில் இந்த முகாம் நடைபெற்றது. இந்தப் பணிகளில் 172 அலுவலர்கள் ஈடுபட்டுள்ளனர். தாலுகாவில் நடைபெற்று வரும் இந்த முகாமினை தாசில்தார் திருநாவுக்கரசு, தேர்தல் துணை தாசில்தார் பிரகாஷ் ஆகியோர் பார்வையிட்டு ஆய்வு செய்தனர். இதில் புதிதாக பெயர் சேர்த்தல், நீக்குதல், திருத்தம் செய்தல் உள்ளிட்ட பணிகள் நடைபெற்றது.