கம்பம், நவ. 21: உத்தமபாளையம் யாதவர் தெருவை சேர்ந்த சோணை முருகன் மனைவி ஆனந்தி (35). முத்துலாபுத்தில் உள்ள வங்கியில் மேலாளராக பணிபுரிந்து வருகிறார். இவர் நேற்று தனது குடும்பத்தினருடன் கம்பம் வடக்கு காவல்நிலையம் அருகேயுள்ள மண்டபத்தில் உறவினர் திருமணத்திற்கு வந்தார். மண்டபம் அருகே வந்த போது மர்மநபர் ஒருவர் திடீரென ஆனந்தி கழுத்திலிருந்த ரூ.40 மதிப்புள்ள தங்க செயினை பறித்து கொண்டு தப்பி சென்றார். இதனால் அதிர்ச்சியடைந்த ஆனந்தி உடனே இதுகுறித்து போலீசாருக்கு தகவல் கொடுத்தார். கம்பம் வடக்கு இன்ஸ்பெக்டர் சிலைமணி, எஸ்ஐ திவான் மைதீன் உள்ளிட்ட போலீசார் விரைந்து செயல்பட்டு நகை திருடிய மர்மநபரை கைது செய்தனர். விசாரணையில் அவர் கம்பம்- கோம்பை ரோடு ஆர்ஆர் நகரை சேர்ந்த விவேக் (30) என்பதும், இவர் மீது ஏற்கனவே 8க்கும் மேற்பட்ட திருட்டு வழக்குகள் நிலுவையில் உள்ளது என்பது தெரிந்தது. திருட்டு சம்பவம் நடந்த அரை மணிநேரத்தில் குற்றவாளியை கைது செய்த போலீசாரை அதிகாரிகள், பொதுமக்கள் பாராட்டினர்.