பாப்பாரப்பட்டி, நவ.21: பாப்பாரப்பட்டி அடுத்த வள்ளூர் கிராமத்தை சேர்த்தவர் கண்ணன்(35). சென்ட்ரிங் தொழிலாளி. இவரது மனைவி குமுதா(30). ஊருக்கு வெளியே உள்ள நிலத்தில் வீடுகட்டி வசித்து வந்தனர். குமுதா, கைக்குழந்தையுடன் அருகில் உள்ள தனது தாய் வீட்டில் உள்ளார். இதனால் கண்ணன் வேலை செய்யும் இடத்திலேயே தங்கி, வேலை செய்து வருகிறார். வாரம் ஒருமுறை வீட்டுக்கு வருவது வழக்கம். இந்நிலையில், நேற்று முன்தினம் இரவு, கண்ணன் வீட்டுக்கு வந்த மர்மநபர்கள், கடப்பாரையால் கதவை உடைத்து உள்ளே நுழைந்து, பீரோவை உடைத்து அதில் இருந்த ₹16 ஆயிரத்தை திருடிச்சென்றனர். நேற்று காலை அந்த வழியாக சென்றவர்கள், கண்ணன் வீட்டின் கதவு உடைக்கப்பட்டு இருப்பது குறித்து, தாய் வீட்டில் இருந்த  குமுதாவிற்கு தகவல் தெரிவித்தனர். அவர் பாப்பாரப்பட்டி போலீசில் புகார் செய்தார். சம்பவ இடத்துக்கு வந்த போலீசார், திருட்டு குறித்து விசாரித்து வருகின்றனர்.