பள்ளிபாளையம், நவ.11: பள்ளிபாளையத்தில் நடந்த விசைத்தறி தொழிலாளர்களுக்கான போனஸ் பேச்சுவார்த்தையில் இழுபறி ஏற்பட்டதால், இன்று மாலை 3ம் கட்ட பேச்சுவார்த்தை நடைபெறும் என அறிவிக்கப்பட்டுள்ளது.பள்ளிபாளையம் விசைத்தறி தொழிலாளர்களுக்கான தீபாவளி போனஸ் பேச்சுவார்த்தை நேற்று முன்தினம் இரவு நடைபெற்றது. ஜவுளி உற்பத்தியாளர்கள் சங்க நிர்வாகிகள் கந்தசாமி, சண்முகம், வாத்தியார் பாலசுப்ரமணியம், யோகநாதன், நந்தகுமார் உள்ளிட்டோர் பங்கேற்றனர். சிஐடியூ தொழிற்சங்கத்தின் நிர்வாகிகள் அசோகன், மோகன், அசன் உள்ளிடோர் பங்கேற்று பேசினர்.

இந்த பேச்சுவார்த்தையில் தொழிற்சங்கத்தினர் 20 சதவீதத்தில் இருந்து 15 சதவீதமாக இறங்கி வந்தனர். ஆனால், ஜவுளி உற்பத்தியாளர்கள் தரப்பில் 8.33 சதவீதத்தில் இருந்து சற்று உயர்த்தி போனஸ் வழங்குவதாக உறுதியளித்தனர். ஆனால், சங்கத்தின் மற்ற நிர்வாகிகளுடன் கலந்து பேசிய பின்பே முடிவு அறிவிக்கப்படுமென தெரிவித்ததால், உடன்பாடு ஏற்படவில்லை. இதையடுத்து, 3ம் சுற்று பேச்சுவார்த்தை இன்று(11ம் தேதி) மாலை 7 மணிக்கு நடைபெறுமென அறிவிக்கப்பட்டுள்ளது.