சேந்தமங்கலம், நவ.3:  எருமப்பட்டி வட்டார தோட்டக்கலைத்துறை உதவி இயக்குனர் ஜெயபிரபா வெளியிட்டுள்ள செய்திக்குறிப்பு:
எருமப்பட்டி  வட்டாரத்தில் சின்ன வெங்காயம் அதிகளவில் சாகுபடி செய்யப்பட்டுள்ளது. பயிர்  செய்த 20 முதல் 25 நாட்களுக்குள் அடி அழுகல் அல்லது குமிழ் அழுகல்,  செருக்களை எனப்படும் பூஞ்சான் நோய் தாக்குதல் அதிகளவில் தென்படும். பருவமழை  மற்றும் தட்பவெப்பநிலை காரணமாக இந்த நோய் ஏற்படுகிறது. இந்த நோயானது 40  நாட்களில் முற்றிலும் பயிர்களை சேதமடைய செய்து விடும். இதனை கட்டுப்படுத்த  ஒருங்கிணைந்த பயிர் பாதுகாப்பு நடைமுறையை மேற்கொள்ள வேண்டும்.

அதன்படி,  வெங்காய பயிர் செய்வதற்கு நல்ல வடிகால் வசதி உள்ள நிலத்தை தேர்வு  செய்வதுடன், உயரமான பார்களை அமைத்து விதைகளை உயரமாக நடவு செய்ய வேண்டும்.  அடி அழுகல் நோய் விதை மூலம் அதிகளவில் பரவுவதால் நோய் தாக்குதல் இல்லாத  தரமான விதைகளை தேர்வு செய்ய வேண்டும். விதை நேர்த்தி செய்வதற்கு ஒரு கிலோ  விதைக்கு 10 கிராம் சூடோமோனஸ் அல்லது நான்கு கிராம் டிரைக்கோடெர்மா விரிடி  கொண்டு 24 மணி நேரம் உலர் வெட்டு விதை நேர்த்தி செய்ய வேண்டும். மேலும்,  விவசாயிகளுக்கு சந்தேகம் இருந்தால், வட்டார தோட்டக்கலை அலுவலகத்திற்கு  நேரில் வந்து தெரிந்து கொள்ளலாம்.