சிவகங்கை, டிச.9: அனைவருக்கும் வீடு திட்டத்தில் நகராட்சி பகுதிகளில் பயனாளிகளை தேர்வு செய்ய சிறப்பு முகாம்கள் நடக்க உள்ளன. சிவகங்கை மாவட்ட நிர்வாகம் சார்பில் தெரிவித்துள்ளதாவது: சிவகங்கை மாவட்டத்தில் அனைவருக்கும் வீடு திட்டத்தில் பயனாளிகள் தாங்களாகவே வீடுகட்டிக் கொள்ள மாவட்டத்தில் உள்ள மூன்று நகராட்சிப் பகுதிகளில் நகராட்சி எல்லைக்குட்பட்ட சொந்த இடத்தில் ஓடு, குடிசை வீடுகளில் வசித்து வருபவர்களின் வீடுகளை புதிய கான்கிரீட் வீடுகளாக கட்டுவதற்கு பயனாளிகளை தேர்வு செய்ய சிறப்பு முகாம்கள் நடக்க உள்ளது. தமிழ்நாடு குடிசைப்பகுதி மாற்றுவாரியத்தின் சார்பில் இத்திட்டம் செயல்படுத்தப்படுகிறது.

இத்திட்டத்தில் மானியமாக ரூ.2.10 லட்சம் பயனாளிகளின் வங்கிக்கணக்கில் நான்கு தவணைகளாக நேரடியாக செலுத்தப்படும். பதிவு செய்யப்பட்ட பத்திரம் அல்லது பட்டா வைத்திருந்து அதாவது நகராட்சி பகுதிகளில் சொந்த இடம் வைத்திருந்து, வீடு கட்டாதவர்கள் மற்றும் பட்டா வைத்திருந்து தங்களது சொந்த இடங்களில் தகர வீடு, குடிசை வீடு கட்டி வசித்து வருபவர்களுக்கு கான்கிரீட் வீடு கட்டுவதற்கான சிறப்பு முகாம்கள் நடக்க உள்ளன. டிச.12ல் சிவகங்கை, டிச.13ல் காரைக்குடி, டிச.14ல் தேவகோட்டை ஆகிய இடங்களில் முகாம் நடக்க உள்ளது. கூடுதல் விபரம் அறிய 97891 59329 என்ற செல் எண்ணில் தொடர்பு கொள்ளலாம். இவ்வாறு தெரிவிக்கப்பட்டுள்ளது.