நிலக்கோட்டை, அக். 1: நிலக்கோட்டை யூனியனில் மாதாந்திர கவுன்சிலர் கூட்டம் நேற்று நடந்தது. ஒன்றிய தலைவர் ரெஜினாநாயகம் தலைமை வகிக்க, பிடிஓக்கள் பஞ்சவர்ணம், அண்ணாத்துரை (கி.ஊ) முன்னிலை வகித்தனர், துணை தலைவர் யாகப்பன் வரவேற்றார். கூட்டத்தில் பல்வேறு வரவு செலவினங்கள் மற்றும் மத்திய மாநில நிதிகளில் செய்யப்பட்டு வரும் பணிகள் குறித்து விவாதிக்கப்பட்டது. தொடர்ந்து கூட்டத்தில் நிலக்கோட்டை குழிப்பட்டி, குரும்பபட்டி வழியாக செல்லும் முல்லைப்பெரியாறு பாசன காவாயிலிருந்து பூசாரிபட்டி, குளத்துப்பட்டி வழியாக சுமார் 3 கிமீ தூரம் புதிய கால்வாய் வெட்டி சீத்தாபுரத்திலுள்ள குடகனாறு செங்கட்டாம்பட்டி ராஜவாய்க்காலுடன் இணைக்க வேண்டும் என்றும், இதன்மூலம் நூத்தலாபுரம், கோடாங்கி நாயக்கன்பட்டி, கோட்டூர், சிலுக்குவார்பட்டி,

குல்லலக்குண்டு உள்ளிட்ட 8க்கும் மேற்பட்ட ஊராகளிலுள்ள 10க்கும் மேற்பட்ட குளங்கள் நிரப்பபட்டு 10,000 ஏக்கருக்கும் மேற்பட்ட விவசாய நிலங்கள் பாசன வசதி பெறுவதுடன், 100க்கும் மேற்பட்ட கிராமக்களின் குடிநீர் தேவை பூர்த்தியாகும் எனவும், இப்பகுதி கிராமங்களில் ஒன்றியம், பேரூராட்சி சார்பில் குடிநீர் தேவைக்காக போடப்படும் போர்வெல் செலவீன தொகையை இக்கால்வாய் பணிக்கு செலவிட்டால் தண்ணீர் பிரச்னைக்கு தண்ணீர் பிரச்னைக்கு நிரந்தர தீர்வு காணப்படும் என விவாதித்து அணைத்து கவுன்சிலர்களின் ஆதரவோடு தீர்மானம் நிறைவேற்றப்பட்டது. இதில் கவுன்சிலர்கள் லலிதா, ரூபி சகிலா, கவிதா, கணேசன்,ராஜதுரை, சுதந்திராதேவி, அறிவு(எ) சின்ன மாயன், தியாகு, நல்லதம்பி, ரேவதி, பாலமுருகன் மற்றும் ஒன்றிய அலுவலர்கள் பங்கேற்றனர். யூனியன் மேலாளர் பாலமுருகன் நன்றி கூறினார்.