தர்மபுரி, ஜூன் 4: தர்மபுரி அருகே மகேந்திரமங்கலம் வேலாம்பட்டி கிராமத்தைச் சேர்ந்தவர் மாறன். இவரது மனைவி ராஜம்மாள்(75). இவர், பழைய பிளாஸ்டிக் பொருட்களை சேகரிக்கும் பணியில் ஈடுபட்டு வந்தார். கடந்த 1ம் தேதி வழக்கம்போல், பொருட்களை சேகரிக்க சென்ற ராஜம்மாள் மீண்டும் வீடு திரும்பவில்லை. அவரை குடும்பத்தினர் பல்வேறு இடங்களில் தேடி வந்த நிலையில், அதே பகுதியில் உள்ள விவசாய கிணற்றில் ராஜம்மாள் சடலமாக கிடந்தார். தகவலறிந்த மகேந்திரமங்கலம் போலீசார், சம்பவ இடம் வந்து சடலத்தை கைப்பற்றி விசாரித்தனர். அதில், பிளாஸ்டிக் பொருட்களை சேகரிக்க சென்றபோது கிணற்றில் தவறி விழுந்து ராஜம்மாள் உயிரிழந்திருப்பது தெரியவந்தது. தொடர்ந்து இதுகுறித்து விசாரிக்கின்றனர்.