தேனி, மே 21: தேனி மாவட்டம், போடி அருகே உள்ள சொக்கநாதபுரத்தை சேர்ந்த அழகர்சாமி மனைவி ராஜலட்சுமி. இவரது செல்போனுக்கு, பல செல்போன் எண்களில் தொடர்பு கொண்டவர்கள், ‘ஏர்போர்ட் அதாரிட்டி ஆப் இந்தியா மெகானிக்கல் துறையில் இருந்து பேசுவதாகவும், ஏர்போர்ட்டில் வேலைவாய்ப்பு உள்ளது என ஆசை வார்த்தை கூறினர். இதனை நம்பிய ராஜலட்சுமி தனது மகனுக்கு வேலை தரும்படி கேட்டுள்ளார். இந்த பணிக்காக பல தவணைகளாக செல்போன் எண்களில், தொடர்பு கொண்டவர்கள் அளித்த வங்கிக் கணக்குகளில் ரூ.7 லட்சத்து 18 ஆயிரம் வரை ராஜலட்சுமி பணம் அனுப்பினார்.

ஆனால், வேலை கிடைக்கவில்லை. தொடர்ந்து செல்போனில் தொடர்பு கொண்டவர்கள் பணம் பறிப்பதிலே குறியாக இருந்துள்ளனர். இதனால், சந்தேகமடைந்த ராஜலட்சுமி தேனி சைபர் கிரைம் போலீசில் புகார் அளித்தார். இதன்பேரில், சைபர் கிரைம் போலீஸ் சப்இன்ஸ்பெக்டர் தாமரைக்கண்ணன், ஏர்போர்ட்டில் வேலை வாங்கித் தருவதாக கூறி பண மோசடி செய்த, செல்போன் எண்களை சேர்ந்தவர்கள் மீது வழக்குப்பதிவு செய்து, அந்த செல்போன் எண்களில் பேசியவர்கள் யார், யார்? என விசாரித்து வருகின்றனர்.