சின்னாளபட்டி, மே 21: விருதுநகரைச் சேர்ந்தவர் முனியாண்டி மகன் ராமர் (45). இவர்,  சிவகாசியிலிருந்து பால் பாக்கெட் கவர்களை பிக்அப் வேனில் ஏற்றிக் கொண்டு, கோவை மாவட்டம் அன்னூர் செல்ல, திண்டுக்கல்-பழனி சாலையில் சென்று கொண்டிருந்தார். அப்போது, பெரியகோட்டை செங்கல் சூளையிலிருந்து செங்கல் ஏற்றி வந்த லாரியை செல்வராஜ் என்பவர் ஓட்டி வந்தார். இவர், ராஜக்காபட்டி பிரிவில் நின்றிருந்த பஸ்சை ஓவர்டேக் செய்யும்போது எதிர்பாராத விதமாக பிக்அப் வேன் மோதினார். இந்த விபத்தில் பிக்அப் வேன் தலைகுப்புற கவிழ்ந்தது. மேலும், லாரி அருகில் இருந்த ஒர்க்ஷாப்பில் புகுந்தது.

 இதில், பிக்அப் வேன் டிரைவர் ராமர் மற்றும் கிளீனர்  வீரபாண்டிக்கு தலை மற்றும் கை, கால்களில் காயங்கள் ஏற்பட்டன. லாரி டிரைவர் செல்வராஜூக்கு முதுகு, கால்களில்  காயங்கள் ஏற்பட்டது. இதனால், போக்குவரத்து பாதிக்கப்பட்டது. ரெட்டியார்சத்திரம் போலீசார் போக்குவரத்தை சீரமைத்து, காயமடைந்தவர்களை அரசு  மருத்துவமனைக்கு அனுப்பி வைத்தனர்.