சாத்தூர், மே 12: சாத்தூர் அருகே அர்ச்சுனா ஆறும், வைப்பாறும் இனையும் இடத்தில் இருக்கன்குடி மாரியம்மன் கோயில் உள்ளது. இங்கு தமிழ்நாட்டின் பல்வேறு பகுதிகளில் இருந்தும் பக்தர்கள் வந்து அம்மனை வழிபட்டு தங்களது நேர்த்திக்கடனை செலுத்தி வருகின்றனர். ஆனால் வரும் பக்தர்கள் எந்தவித வசதியும் இங்கு இல்லை என புலம்பும் சூழ்நிலை உள்ளது. திருவிழா காலங்களில் மட்டும் தற்காலிகமாக பேருந்து நிலையங்கள் அமைக்கப்பட்டு பக்தர்கள் சிரமமின்றி செல்ல ஏற்பாடு செய்யப்படுகிறது. மற்ற நேரங்களில் வரும் பக்தர்கள் மிகவும் சிரமபடுகின்றனர். மேலும் சுகாதார வளாகங்கள் இல்லாததால் பெண் பக்தர்கள் அவதிக்குள்ளாகும் நிலை உள்ளது. எனவே இங்கு வரும் பக்தர்களின் சிரமத்தை கருத்தில் கொண்டு நிரந்தரமாக நிழற்குடையோடு கூடிய பஸ் நிலையத்தை அமைக்கவும், சுகாதாரத்தை பேண சுகாதார வளாகங்கள் அமைக்கவும், குடிநீர் வசதி ஏற்படுத்தி தரவும் மாவட்ட நிர்வாகம் விரைவான நடவடிக்கை எடுக்க வேண்டுமென சமூகஆர்வலர்கள் கோரிக்கை வைத்துள்ளனர்.