நாகர்கோவில், மே 11 :  கன்னியாகுமரி நாச்சியார்குடியிருப்பு பகுதியை சேர்ந்தவர் முத்துலிங்கம் என்ற லிங்கம். இவர் பிரபல ரவுடியாக இருந்து கொலை செய்யப்பட்டவர் ஆவார். இவரது மகன் சுஜித் (29). இவரும் ரவுடி பட்டியலில் உள்ளார். இவர் மீது தென்தாமரைக்குளம், கன்னியாகுமரி உள்ளிட்ட காவல் நிலையங்களில் கொலை முயற்சி உள்ளிட்ட பல்வேறு வழக்குகள் உள்ளன. சமீபத்தில் கன்னியாகுமரி போலீசார் மேலும் ஒரு கொலை முயற்சி வழக்கில் இவரை கைது செய்திருந்தனர். இவர் தொடர்ந்து குற்ற நடவடிக்கைகளில் ஈடுபட்டு வந்ததால், இவரை குண்டர் தடுப்பு சட்டத்தின் கீழ் கைது செய்து சிறையில் அடைக்க உத்தரவிடுமாறு மாவட்ட காவல் கண்காணிப்பாளர் ஹரிகிரண் பிரசாத் , கலெக்டர் அரவிந்த்துக்கு பரிந்துரை செய்தார். இதை ஏற்று, சுஜித்தை குண்டர் சட்டத்தில் சிறையில் அடைக்க கலெக்டர் அரவிந்த் உத்தரவிட்டார். அதன் பேரில் கன்னியாகுமரி போலீசார், சுஜித்தை குண்டர் சட்டத்தில் கைது செய்து பாளை சிறையில் அடைத்தனர். இந்த வருடம் இதுவரை 28 பேர் குண்டர் தடுப்பு சட்டத்தில் கைது செய்யப்பட்டுள்ளனர் என்பது குறிப்பிடத்தக்கது.