நாகை,மே10: திட்டச்சேரி அருகே ஓஎன்ஜிசி அலுவலகம் முன்பு குத்தாலம் கிராம மக்கள் ஆர்ப்பாட்டம் நடத்தினர். நாகை மாவட்டம் திருமருகல் அருகே குத்தாலம் பகுதியில் ஒன்றிய அரசின் பொதுத்துறை நிறுவனமான ஓஎன்ஜிசி நிறுவனத்தின் மாசு நீர் சுத்திகரிப்பு நிலையம் செயல்பட்டு வருகிறது. ராமநாதபுரம், சிதம்பரம், சீர்காழி, மயிலாடுதுறை உள்ளிட்ட பகுதிகளில் ஓஎன்ஜிசி நிறுவனத்தில் சுத்திகரிப்பு செய்யும் போது பல மடங்கு உவர்ப்பு தன்மை கொண்ட உப்பு நீர் வெளியேறும். இந்த நீரை டேங்கர் லாரிகள் மூலம் கொண்டு வரப்படுகிறது. திருமருகல் அருகே குத்தாலம் பகுதியில் அமைந்துள்ள 1800 மீட்டர் அளவில் ராட்சத போர்வெல் மூலம் பூமிக்கடியில் செலுத்தப்படுகிறது. இதனால் கோபுராஜபுரம், நரிமணம், குத்தாலம், திட்டச்சேரி, எராவாஞ்சேரி உள்ளிட்ட கிராமங்களில் நிலத்தடி நீர் உப்பு நீராக மாறி வருகிறது. இவ்வாறு நிலத்தடி நீரை மாசுபடுத்தும் ஓஎன்ஜிசி மாசு நீர் சுத்திகரிப்பு நிலையத்தை அகற்ற கோரி சேகர் தலைமையில் கிராம மக்கள் போராட்டத்தில் ஈடுபட்டனர்.