சீர்காழி, ஏப். 26: சீர்காழியில் மாவட்ட அரசு இசைப்பள்ளி பல ஆண்டுகளாக வாடகை கட்டடத்தில் இயங்கி வருகிறது. இசைப் பள்ளியில் பல்வேறு பகுதிகளைச் சேர்ந்த நூற்றுக்கும் மேற்பட்டவர்கள் படித்து வருகின்றனர். இசை பள்ளிக்கு புதிய கட்டிடம் கட்ட வேண்டும் என தொடர்ந்து கோரிக்கை விடுக்கப்பட்டு வந்த நிலையில் சீர்காழி ரயில்வே ரோடு நகரில் ரூ.1 கோடியில் மாவட்ட இசை பள்ளிக்கு புதிய கட்டிடம் கட்ட அரசு நிதி ஒதுக்கீடு செய்து அதற்கான பூமி பூஜை, அடிக்கல் நாட்டு விழா நடைபெற்றது. விழாவில் சீர்காழி எம்எல்ஏ பன்னீர்செல்வம் கலந்து கொண்டு புதிய கட்டிடம் கட்ட அடிக்கல் நாட்டினார். இதில் பொதுப்பணித்துறை உதவி செயற்பொறியாளர நாகவேல், உதவி பொறியாளர் ஜாண்டி ரோஸ், திமுக நகர செயலாளர் சுப்பராயன், இசைப் பள்ளி தலைமையாசிரியர் முருகேசன், நாதஸ்வர ஆசிரியர் சிவசுப்பிரமணியன், ஆசிரியர் பாலசுப்ரமணியன் கலந்து கொண்டனர். இசை பள்ளி கட்டிடத்தை கலைநயத்துடன் கட்ட வேண்டுமென தமிழ் ஆர்வலர்கள் கோரிக்கை விடுத்துள்ளனர்.