ஈரோடு, ஏப். 20: பள்ளிக்கல்வித்துறையின் சார்பில் 14 வயதிற்குட்பட்ட மாணவ, மாணவிகளுக்கான விளையாட்டு போட்டிகளை நேற்று கலெக்டர் கொடியசைத்து தொடங்கி வைத்தார்.
ஈரோடு  மாவட்டத்தில் பள்ளிக்கல்வித்துறையின் சார்பில் 14 வயதிற்குட்பட்ட பள்ளி  மாணவ, மாணவிகளுக்கான விளையாட்டு போட்டிகளில் 100 மீட்டர், 200 மீட்டர்  தடகளப் போட்டி, குண்டு எறிதல், வட்டு எறிதல் மற்றும் நீளம் தாண்டுதல்  உள்ளிட்ட பல்வேறு போட்டிகள் நேற்று ஈரோடு சிஎஸ்ஐ பள்ளி வளாகத்தில்  நடைபெற்றது.

போட்டிகளை கலெக்டர் கிருஷ்ணனுண்ணி கொடியசைத்து தொடங்கி  வைத்தார். இதில் மாவட்டம் முழுவதும் உள்ள நடுநிலை, மேல்நிலை, உயர்நிலை,  சுயநிதி, நிதியுதவி மற்றும் மெட்ரிக் உள்ளிட்ட 600க்கும் மேற்பட்ட  பள்ளிகளில் 6ம் வகுப்பு முதல் 9ம் வகுப்பு வரை பயிலும் மாணவ, மாணவிகள்  பங்கேற்றனர்.  

போட்டிகளில் முதல் பரிசு, இரண்டாம் பரிசு மற்றும் மூன்றாம்  பரிசு பெறும் மாணவ, மாணவிகளுக்கு அந்தந்த பள்ளிகளில் பரிசு மற்றும்  பாராட்டு சான்றிதழ்கள் வழங்கப்படும் என்றும், முதலிடம் பெறும் மாணவ,  மாணவிகள் ஒன்றிய அளவில் நடைபெறும் போட்டிகளிலும், இதில் வெற்றி பெறும்  மாணவ, மாணவிகள் அடுத்து மாவட்ட அளவில் நடைபெறும் போட்டிகளிலும் பங்கேற்க  உள்ளதாக அதிகாரிகள் கூறினர். இந்நிகழ்ச்சியில், முதன்மை கல்வி அலுவலர்  ராமகிருஷ்ணன், மாவட்ட உடற்கல்வி ஆய்வாளர் முருகன் உள்ளிட்டோர் கலந்து  கொண்டனர்.