கோவை, ஜன. 29: தேனி மாவட்டம் கம்பத்தை சேர்ந்தவர் ராஜ்குமார் (44). இவர் சொந்தமாக லாரி வைத்து தொழில் செய்து வருகிறார். கோவை சூலூரில் விருமாண்டி என்பவருக்கு சொந்தமான இடத்தில் ஷெட் அமைத்து தங்கியிருந்து லாரி ஓட்டி வருகிறார். சில நாட்களுக்கு முன்பு ராஜ்குமார் லாரியில் வைத்திருந்த ரூ.11 ஆயிரத்தை மர்ம நபர்கள் திருடி சென்றதாக கூறப்படுகிறது. இது தொடர்பாக ராஜ்குமார், இட உரிமையாளர் விருமாண்டியிடம் கேட்டுள்ளார். அப்போது விருமாண்டி பணம் திருடு போனது தொடர்பாக தனக்கு எதுவும் தெரியாது என தெரிவித்துள்ளார்.

சம்பவத்தன்று மீண்டும் பணம் திருடு போனது தொடர்பாக ராஜ்குமாருக்கும், விருமாண்டிக்கும் இடையே தகராறு ஏற்பட்டது. அப்போது விருமாண்டிக்கு ஆதரவாக திருப்பூர் அவிநாசி பாளையத்தை சேர்ந்த பார்த்தசாரதி (21) என்ற வாலிபர் ராஜ்குமாரை சரமாரியாக தாக்கியுள்ளார். இதில் காயமடைந்த அவர் கோவை அரசு மருத்துவனையில் சிகிச்சைக்காக சேர்க்கப்பட்டார். ராஜ்குமார் சிங்காநல்லூர் போலீசில் புகார் அளித்தார். புகாரின்பேரில், போலீசார் கைது செய்தனர்.