திண்டுக்கல், ஜன. 21: திண்டுக்கல்- நத்தம் சாலை குள்ளனம்பட்டி அரசினர் தொழிற்பயிற்சி நிலையம் அருகில் கடைகள் ஆக்கிரமித்து வைக்கப்பட்டிருந்தது. இதனை அகற்ற அரசினர் தொழிற்பயிற்சி அதிகாரிகள் சம்பந்தப்பட்ட அதிகாரிகளுக்கு தொடர்ந்து புகார் மனு அளித்தனர். இதை தொடர்ந்து நேற்று தேசிய நெடுஞ்சாலைத்துறை உதவி கோட்ட பொறியாளர் தனபாலன், இளநிலை பொறியாளர் ராமமூர்த்தி ஆகியோரது தலைமையில் தேசிய நெடுஞ்சாலை துறையின் பணியாளர்கள் ஆக்கிரமிப்பு கடைகளை அகற்றினர். அசம்பாவிதத்தை தவிர்க்க திண்டுக்கல் தாலுகா போலீஸ் இன்ஸ்பெக்டர் பாலாண்டி தலைமையில் எஸ்ஐக்கள் விஜய், மலைச்சாமி மற்றும் போலீசார் பாதுகாப்பு பணியில் ஈடுபட்டிருந்தனர்.