மேலூர், ஜன. 21: மேலூர் அருகே வயல் பகுதியில் சுற்றி திரிந்த 8 அடி நீளமுள்ள மலைப்பாம்பை இளைஞர்கள் பிடித்து வனத்துறை வசம் ஒப்படைத்தனர். மதுரை மாவட்டம், மேலூர் அருகே கம்பூர் ஊராட்சியில் உள்ள அலங்கம்பட்டி கோட்டையன்குட்டு பகுதியில் உள்ள வயல் வெளியில் 8 அடி நீளமுள்ள மலைப்பாம்பு ஒன்று சுற்றி திரிந்தது. இதுகுறித்து கிராமத்து இளைஞர்கள் வனத்துறைக்கு தகவல் கொடுத்தனர். வழக்கம் போல் வனத்துறையினர் காலம் தாழ்த்தியுள்ளனர். இதனை தொடர்ந்து கிராம இளைஞர்கள் அஜித், கோபி, சேது, சரவணன் ஆகியோர் அந்த மலைப்பாம்பை பிடித்து பாதுகாப்பாக வைத்திருந்தனர். இதனை தொடர்ந்து நீண்ட நேரத்திற்கு பிறகு வனக்காப்பாளர் சங்கச்சாமியிடம் அந்த பாம்பு ஒப்படைக்கப்பட்டது. பின்னர் அதனை வனத்திற்குள் சென்று வனத்துறையினர் விடுவித்தனர்.