காரிமங்கலம், டிச.28: காரிமங்கலம் அருகே விஷ கிழங்கு சாப்பிட்ட முதியவர் உயிரிழந்தது குறித்து போலீசார் விசாரணை நடத்தி வருகின்றனர். காரிமங்கலம் அடுத்த பத்தலஅல்லியை சேர்ந்தவர் முத்து(70), விவசாயியான இவர், அப்பகுதியில் குத்தகைக்கு நிலம் எடுத்து விவசாயம் செய்து கொண்டிருந்தார். நேற்று முன்தினம் இரவு, குளிருக்காக தோட்டத்தில் இருந்த காய்ந்த செடிகளை பற்றவைத்து குளிர் காய்ந்து கொண்டிருந்தார்.

அப்போது அதிலிருந்த கிழங்கு ஒன்றை நெருப்பில் சுட்டு சாப்பிட்டுள்ளார். சிறிது நேரம் கழித்து அவருக்கு வாந்தி மற்றும் வயிற்றுப் போக்கு ஏற்பட்டுள்ளது. இதையடுத்து அவர் சிகிச்சைக்காக தர்மபுரி அரசு மருத்துவமனையில் சேர்க்கப்பட்டார். அங்கு சிகிச்சை பலனின்றி பரிதாபமாக இறந்தார். இதுகுறித்து காரிமங்கலம் போலீசார் வழக்குப்பதிவு செய்து விசாரணை நடத்தி வருகின்றனர்.